ಇಂಗ್ಲೆಂಡ್ನಲ್ಲಿ ವರ್ಣಭೇದ
ಇಂಗ್ಲೆಂಡ್ನಲ್ಲಿ ಲೀಗ್ ಕ್ರಿಕೆಟ್ನಲ್ಲಿ ಪಾಲ್ಗೊಳ್ಳುವಾಗ ತಾನು ಕೂಡ ವರ್ಣಭೇದ ನೀತಿಯನ್ನು ಎದುರಿಸಬೇಕಾಗಿ ಬಂದಿತ್ತು, ಜನಾಂಗೀಯ ನಿಂದನೆಗೆ ಒಳಗಾಗಬೇಕಾಗಿ ಬಂದಿತ್ತು ಎಂದು ಟೀಮ್ ಇಂಡಿಯಾದ ಮಾಜಿ ಆರಂಭಿಕ ಬ್ಯಾಟ್ಸ್ಮನ್, ಈಗ ಕಾಮೆಂಟೇಟರ್ ಅಗಿರುವ ಆಕಾಶ್ ಚೋಪ್ರಾ ಹೇಳಿಕೊಂಡಿದ್ದಾರೆ.
13 ವರ್ಷಗಳ ಹಿಂದಿನ ಘಟನೆ
ಯೂ ಟ್ಯೂಬ್ ಚಾನೆಲ್ನಲ್ಲಿ ಮಾತನಾಡಿರುವ ಚೋಪ್ರಾ, ಈ ಘಟನೆ ನಡೆದಿದ್ದು 2007ರಲ್ಲಿ ಇಂಗ್ಲೆಂಡ್ನಲ್ಲಿ ಮೇರಿಲೆಬೋನ್ ಕ್ರಿಕೆಟ್ ಕ್ಲಬ್ ಪರ ಆಡುತ್ತಿದ್ದಾಗ ಎಂದಿದ್ದಾರೆ. ಆಗ ಚೋಪ್ರಾ ಅವರನ್ನು 'ಪಾಕಿ' ಎಂದು ಕರೆದಿದ್ದರಂತೆ. ಸೌತ್ ಏಷ್ಯನ್ ಮೂಲದ ಜನರಿಗೆ ಕರಿಯರು ಎಂಬರ್ಥದಲ್ಲಿ ಇಂಗ್ಲಿಷ್ನಲ್ಲಿ ಮಾತನಾಡುವ ಮಂದಿ ಹೀಗೆ ಕರೆಯುತ್ತಾರೆ ಎಂದು ಆಕಾಶ್ ಹೇಳಿದ್ದಾರೆ.
ನಿಂದಿಸಿ ಖುಷಿಪಟ್ಟುಕೊಳ್ಳುತ್ತಿದ್ದರು
'ನಾವು (ಕ್ರಿಕೆಟಿಗರು) ಒಂದಿಲ್ಲ ಒಂದು ವಿಧದಲ್ಲಿ ವರ್ಣಭೇಧ ನೀತಿ ಎದುರಿಸಿರುತ್ತೇವೆ. ನಾನು ಇಂಗ್ಲೆಂಡ್ನಲ್ಲಿ ಲೀಗ್ ಕ್ರಿಕೆಟ್ ಆಡುತ್ತಿದ್ದಾಗ, ಎದುರಾಳಿ ತಂಡದಲ್ಲಿ ಇಬ್ಬರು ದಕ್ಷಿಣ ಆಫ್ರಿಕನ್ ಆಟಗಾರರಿದ್ದರು. ಅವರಿಬ್ಬರೂ ಬೇರೆಯವರನ್ನು ಜನಾಂಗೀಯವಾಗಿ ನಿಂದಿಸಿ ಖುಷಿಪಟ್ಟುಕೊಳ್ಳುತ್ತಿದ್ದರು,' ಎಂದು ಚೋಪ್ರಾ ವಿವರಿಸಿದ್ದಾರೆ.
ನನ್ನನ್ನು 'ಪಾಕಿ' ಎಂದು ಕರೆದರು
'ನಾನು ನಾನ್ ಸ್ಟ್ರೈಕರ್ಸ್ನ ಕೊನೆಯಲ್ಲಿದ್ದಾಗ ಆ ಇಬ್ಬರು ದಕ್ಷಿಣ ಆಫ್ರಿಕನ್ನರು ನನ್ನನ್ನೂ ನಿಂದಿಸತೊಡಗಿದ್ದರು. ಅವರು ನನ್ನನ್ನು ಪದೇ ಪದೇ 'ಪಾಕಿ' ಎಂದು ಕರೆಯುತ್ತಿದ್ದರು. ಪಾಕಿ ಎಂದರೆ ಪಾಕಿಸ್ತಾನದ ಶಾರ್ಟ್ ಫಾರ್ಮ್ ಎಂದು ಎಲ್ಲರೂ ಅಂದುಕೊಳ್ಳುತ್ತಾರೆ. ಆದರೆ ಅದಲ್ಲ, ನೀವೊಂದು ವೇಳೆ ಕಂದು ಬಣ್ಣದವರಾಗಿದ್ದರೆ, ನೀವು ಯಾವುದೇ ಏಷ್ಯಾ ಖಂಡದಿಂದ ಬಂದಿದ್ದರೆ ನಿಮ್ಮನ್ನು ವರ್ಣಭೇದ ರೀತಿಯಲ್ಲಿ 'ಪಾಕಿ' ಎಂದು ಕರೆಯಲಾಗುತ್ತದೆ,' ಎಂದು ಚೋಪ್ರಾ ಹೇಳಿಕೊಂಡಿದ್ದಾರೆ.