ಟೀಮ್ ಇಂಡಿಯಾದ ಸ್ಪಿನ್ನರ್
ಆರೋನ್ ಫಿಂಚ್ ಟ್ವಿಟ್ಟರ್ನಲ್ಲಿ ಅಭಿಮಾನಿ ಕೇಳಿದ ಪ್ರಶ್ನೆಗೆ ಉತ್ತರಿಸುವ ಸಂದರ್ಭದಲ್ಲಿ ನೀಡಿದ ಉತ್ತರ ಓರ್ವ ಸ್ಪಿನ್ನರ್ನ ಹೆಸರು. ಟೀಮ್ ಇಂಡಿಯಾದಲ್ಲಿ ದಶಕಕ್ಕೂ ಹೆಚ್ಚು ಕಾಲ ಅದ್ಭುತ ಪ್ರದರ್ಶನವನ್ನು ನೀಡಿ ಭಾರತದ ಅನೇಕ ಗೆಲುವಿಗೆ ಕಾರಣವಾಗಿದ್ದ ಬೌಲರ್ನ್ನು ಫಿಂಚ್ ಹೆಸರಿಸಿದ್ದಾರೆ.
ಯಾರು ಆ ಬೌಲರ್
ಆರೋನ್ ಫಿಂಚ್ ಹೆಸರಿಸಿದ ಆ ಬೌಲರ್ ಬೇರೆ ಯಾರೂ ಅಲ್ಲ. ಟೀಮ್ ಇಂಡಿಯಾದ ಟರ್ಬನೇಟರ್ ಹರ್ಭಜನ್ ಸಿಂಗ್. ಫಿಂಚ್ಗೆ ಟೀಮ್ ಇಂಡಿಯಾದ ಬೌಲರ್ಗಳ ಪೈಕಿ ಭಜ್ಜಿ ಅಚ್ಚುಮೆಚ್ಚು ಎಂದು ಭಾರತದ ಅಭಿಮಾನಿಯೋರ್ವ ಟ್ವಿಟ್ಟರ್ನಲ್ಲಿ ಕೇಳಿದ ಪ್ರಶ್ನೆಗೆ ಉತ್ತರಿಸಿದ್ದಾರೆ.
2016ರ ಬಳಿಕ ಭಜ್ಜಿ ಟೀಮ್ ಇಂಡಿಯಾದಿಂದ ದೂರ
ಟೀಮ್ ಇಂಡಿಯಾದ ಪ್ರಮುಖ ಬೌಲರ್ ಆಗಿ ಮೆರೆದಾಡಿದ ಹರ್ಭಜನ್ ಸಿಂಗ್ 2016ರ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಕಾಣಿಸಿಕೊಂಡಿಲ್ಲ. ಪ್ರದರ್ಶನದಲ್ಲಿ ಇಳಿಮುಖವನ್ನು ಕಂಡ ಭಜ್ಜಿ ಯುವ ಬೌಲರ್ಗಳ ಪ್ರದರ್ಶನ ಮುಂದೆ ಮಂಕಾದರು. ಸದ್ಯ ಐಪಿಎಲ್ನಲ್ಲಿ ಸಕ್ರಿಯವಾಗಿರುವ ಹರ್ಭಜನ್ ಸಿಂಗ್ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಭಜ್ಜಿ ಸಾಧನೆ
ಟೀಮ್ ಇಂಡಿಯಾದ ಪ್ರಮುಖ ಸ್ಪಿನ್ನರ್ ಆಗಿದ್ದ ಹರ್ಭಜನ್ ಸಿಂಗ್ 103 ಟೆಸ್ಟ್ ಪಂದ್ಯಗಳಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದು 417 ವಿಕೆಟ್ ಪಡೆದುಕೊಂಡಿದ್ದಾರೆ. 236 ಏಕದಿನ ಪಂದ್ಯಗಳಲ್ಲಿ 269 ವಿಕೆಟ್ ಪಡೆದು ಮಿಂಚಿದ್ದಾರೆ ಹರ್ಭಜನ್ ಸಿಂಗ್. ಭಾರತದ ಪಿಚ್ನಲ್ಲಿ ಹರ್ಭಜನ್ ಸಿಂಗ್ ಅತ್ಯಂತ ಪರಿಣಾಮಕಾರಿಯಾಗಿದ್ದರು.
ಆಸ್ಟ್ರೇಲಿಯಾ ವಿರುದ್ಧ ಭಜ್ಜಿ ಅಬ್ಬರ
ವಿಶೇಷವೇನೆಂದರೆ ಟೀಮ್ ಇಂಡಿಯಾದ ಈ ಬೌಲರ್ ಆಸ್ಟ್ರೇಲಿಯಾ ತಂಡದ ವಿರುದ್ಧವೇ ಅದ್ಭುತ ಪ್ರದರ್ಶನವನ್ನು ನೀಡಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ಆಡಿದ 18 ಟೆಸ್ಟ್ ಪಂದ್ಯಗಳಲ್ಲಿ ಹರ್ಭಜನ್ ಸಿಂಗ್ 95 ವಿಕೆಟ್ ಪಡೆದು ಮಿಂಚಿದ್ದಾರೆ. ಇದರಲ್ಲಿ 2001ರ ಅವಿಸ್ಮರಣೀಯ ಈಡನ್ ಗಾರ್ಡನ್ ಟೆಸ್ಟ್ ಪಂದ್ಯದ ಹ್ಯಾಟ್ರಿಕ್ ವಿಕೆಟ್ ಕೂಡ ಸೇರಿದೆ.