ಅಫ್ಘನ್-ನಬಿ ಜತೆಯಾಟ
ಐದನೇ ವಿಕೆಟ್ಗೆ ಜತೆಯಾದ ಅಸ್ಗರ್ ಅಫ್ಘನ್ ಮತ್ತು ಮೊಹಮ್ಮದ್ ನಬಿ 79 ರನ್ ಪೇರಿಸಿ ತಂಡಕ್ಕೆ ಬಲ ನೀಡಿದರು. ಕಳೆದ ಪಂದ್ಯದಲ್ಲಿ ಜಿಂಬಾಬ್ವೆ ವಿರುದ್ಧ ಅಬ್ಬರಿಸಿದ್ದ ಮೊಹಮ್ಮದ್ ನಬಿ, ಈ ಪಂದ್ಯದಲ್ಲಿ ಕೂಡ ಬಾಂಗ್ಲಾ ಬೌಲರ್ಗಳನ್ನು ಚೆಂಡಾಡಿದರು. ಅಫ್ಘನ್ 37 ಎಸೆತಗಳಲ್ಲಿ 3 ಬೌಂಡರಿ 2 ಸಿಕ್ಸರ್ ಸಹಿತ 40 ರನ್ಗಳ ಕಾಣಿಕೆ ನೀಡಿದರು.
ನಬಿ ಅಬ್ಬರದ ಬ್ಯಾಟಿಂಗ್
ಅಫ್ಘನ್ ಔಟಾದ ಬಳಿಕ ಬಂದ ಗುಲ್ಬದೀನ್ ನೈಬ್ ಶೂನ್ಯಕ್ಕೆ ಔಟಾದರು. ಆದರೆ ನಿರಾತಂಕವಾಗಿ ಬ್ಯಾಟ್ ಬೀಸುತ್ತಿದ್ದ ನಬಿ ಅಬ್ಬರಕ್ಕೆ ಕಡಿವಾಣ ಹಾಕಲು ಬಾಂಗ್ಲಾಕ್ಕೆ ಸಾಧ್ಯವಾಗಲಿಲ್ಲ. ಮುರಿಯದ ಆರನೇ ವಿಕೆಟ್ಗೆ ಕರೀಮ್ ಜನತ್ ಜತೆಗೂಡಿ ಕೇವಲ 19 ಎಸೆತಗಳಲ್ಲಿ 43 ರನ್ ಸೇರಿಸಿದರು. ಇದರಲ್ಲಿ ಜನತ್ ಕೊಡುಗೆ 6 ಎಸೆತಗಳಲ್ಲಿ ಕೇವಲ 5 ರನ್. ಉಳಿದ ರನ್ ನಬಿ ಬ್ಯಾಟ್ನಿಂದ ಹರಿದುಬಂತು. 54 ಎಸೆತಗಳನ್ನು ಎದುರಿಸಿದ ನಬಿ, ಏಳು ಸಿಕ್ಸರ್ ಮತ್ತು ಮೂರು ಬೌಂಡರಿಗಳೊಂದಿಗೆ 84 ರನ್ ಚಚ್ಚಿದರು.
ಅಫ್ಘಾನಿಸ್ತಾನ 20 ಓವರ್ಗಳಲ್ಲಿ ಆರು ವಿಕೆಟ್ ಕಳೆದುಕೊಂಡು 164 ರನ್ ಗಳಿಸಿತು. ಬಾಂಗ್ಲಾ ಪರ ಮೊಹಮ್ಮದ್ ಸೈಫುದ್ದೀನ್ 33 ರನ್ ನೀಡಿ 4 ವಿಕೆಟ್ ಕಿತ್ತರು. ನಾಯಕ ಶಕೀಬ್ ಅಲ್ ಹಸನ್ 18 ರನ್ ನೀಡಿದ 2 ವಿಕೆಟ್ ಕಬಳಿಸಿದರು.
ಶಿಖರ್ ಧವನ್ ಪ್ರಶ್ನೆಗೆ ಹಲ್ಲು ಕಿಸಿದ ವಿರಾಟ್ ಕೊಹ್ಲಿ: ಗಮ್ಮತ್ತಿನ ವಿಡಿಯೋ!
ಮುಜೀಬ್ ದಾಳಿಗೆ ಬಾಂಗ್ಲಾ ತತ್ತರ
ಸವಾಲಿನ ಗುರಿ ಬೆನ್ನತ್ತಿದ ಬಾಂಗ್ಲಾ ಹುಲಿಗಳಿಗೆ ಅಫ್ಘನ್ ಬೌಲರ್ಗಳು ಆರಂಭದಿಂದಲೇ ಪೆಟ್ಟು ನೀಡಿದರು. ಮುಜೀಬ್ ಉರ್ ರೆಹಮಾನ್ ಸ್ಪಿನ್ ದಾಳಿಗೆ ಬಾಂಗ್ಲಾ ಬ್ಯಾಟ್ಸ್ಮನ್ಗಳ ಬಳಿ ಉತ್ತರವಿರಲಿಲ್ಲ. ಮಹಮದುಲ್ಲಾ ಮಾತ್ರ ಕೊಂಚ ಪ್ರತಿರೋಧ ತೋರಿದರು. ಅಂತಿಮವಾಗಿ ಇನ್ನೂ ಒಂದು ಎಸೆತ ಬಾಕಿ ಇರುವಾಗಲೇ 139 ರನ್ಗಳಿಗೆ ಬಾಂಗ್ಲಾ ತನ್ನೆಲ್ಲ ವಿಕೆಟ್ಗಳನ್ನು ಕಳೆದುಕೊಂಡು 25 ರನ್ಗಳ ಸೋಲೊಪ್ಪಿಕೊಂಡಿತು.
ಮಹಮದುಲ್ಲಾ ಏಕಾಂಗಿ ಹೋರಾಟ
ಮಹಮದುಲ್ಲಾ 44 ರನ್ ಗಳಿಸಿದರೆ, ಶಬ್ಬೀರ್ ರಹಮಾನ್ 24 ರನ್ ಬಾರಿಸಿದರು. ಅಫ್ಘನ್ ಪರ ಮುಜೀಬ್ ಕೇವಲ 15 ರನ್ ನೀಡಿ 4 ವಿಕೆಟ್ ಪಡೆದರು. ಫರೀದ್ ಮಲಿಕ್, ನಾಯಕ ರಶೀದ್ ಖಾನ್ ಮತ್ತು ಗುಲ್ಬದೀನ್ ನೈಬ್ ತಲಾ 2 ವಿಕೆಟ್ ಕಬಳಿಸಿ ಬಾಂಗ್ಲಾ ತಂಡವನ್ನು ಹೆಡೆಮುರಿಗೆ ಕಟ್ಟಿದರು.