ಮತ್ತೊಂದು ಮೈಲಿಗಲ್ಲು
ಆಸ್ಟ್ರೇಲಿಯಾ ವಿರುದ್ಧ 50ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ಏಕದಿನ ಪಂದ್ಯಗಳನ್ನು ಗೆದ್ದಿರುವ ವಿಶ್ವದ ತಂಡಗಳಲ್ಲಿ ಇಂಗ್ಲೆಂಡ್ ಮೊದಲ ಸ್ಥಾನದಲ್ಲಿದೆ. ವೆಸ್ಟ್ ಇಂಡೀಸ್ ದ್ವಿತೀಯ ಸ್ಥಾನದಲ್ಲಿದೆ. ಇನ್ನೊಂದು ಏಕದಿನ ಪಂದ್ಯ ಗೆದ್ದರೆ ಭಾರತ ಮೂರನೇ ಸ್ಥಾನದಲ್ಲಿ ಗುರುತಿಸಿಕೊಳ್ಳಲಿದೆ.
ಭಾರತಕ್ಕೆ ಮೂರನೇ ಸ್ಥಾನ
ಆಸೀಸ್ ವಿರುದ್ಧ ಏಕದಿನ ಪಂದ್ಯಗಳ ಗೆಲುವಿನ ಆಧಾರದಲ್ಲಿ ಭಾರತ ಈಗಾಗಲೇ ಮೂರನೇ ಸ್ಥಾನದಲ್ಲಿದೆ. ಆದರೆ ಇನ್ನೊಂದು ಪಂದ್ಯ ಗೆದ್ದರೆ ಆಸೀಸ್ ಎದುರು ಭಾರತ ಭರ್ತಿ 50 ಪಂದ್ಯಗಳನ್ನು ಗೆದ್ದಂತಾಗುತ್ತದೆ. ಈಗ ಭಾರತ ಆಸೀಸ್ ವಿರುದ್ಧ ಆಡಿರುವ 133 ಏಕದಿನ ಪಂದ್ಯಗಳಲ್ಲಿ 49ರಲ್ಲಿ ಗೆದ್ದು 74 ಪಂದ್ಯಗಳನ್ನು ಸೋತಿದೆ.
ಇಂಗ್ಲೆಂಡ್ ಮೊದಲಿಗ
ಇದೇ ಯಾದಿಯಲ್ಲಿ ಮೊದಲ ಸ್ಥಾನದಲ್ಲಿರುವ ಇಂಗ್ಲೆಂಡ್ ಆಡಿರುವ 147 ಪಂದ್ಯಗಳಲ್ಲಿ 61ರಲ್ಲಿ ಜಯ ಕಂಡಿದ್ದರೆ, 81 ಪಂದ್ಯಗಳಲ್ಲಿ ಕಾಂಗರೂ ಪಡೆಗೆ ಶರಣಾಗಿದೆ. ಇನ್ನು ದ್ವಿತೀಯ ಸ್ಥಾನದಲ್ಲಿರುವ ವೆಸ್ಟ್ ಇಂಡೀಸ್ 139 ಪಂದ್ಯಗಳಲ್ಲಿ 60 ಗೆಲುವು, 73 ಸೋಲುಗಳನ್ನು ಕಂಡಿದೆ.
ವಿನ್ ರೇಟ್ನಲ್ಲಿ ಆಫ್ರಿಕಾ ಮುಂದು
ಆಸ್ಟ್ರೇಲಿಯಾ ವಿರುದ್ಧ ಆಡಿದ ಅಂತಾರಾಷ್ಟ್ರೀಯ ಏಕದಿನ ಪಂದ್ಯಗಳಲ್ಲಿ ಅತೀ ಹೆಚ್ಚು ಗೆಲುವು ದಾಖಲಿಸಿದ ಹೆಗ್ಗಳಿಕೆ ದಕ್ಷಿಣ ಆಫ್ರಿಕಾ ತಂಡದ್ದು. ಆಫ್ರಿಕಾ ತಂಡ ಆಸೀಸ್ ವಿರುದ್ಧ ಆಡಿದ 99 ಪಂದ್ಯಗಳಲ್ಲಿ 47 ಗೆಲುವು ಮತ್ತು 48 ಸೋಲುಗಳನ್ನು ಕಂಡಿದೆ. ಹೀಗಾಗಿ 47.47 ವಿನ್ ರೇಟ್ ಹೊಂದಿರುವ ಆಫ್ರಿಕಾ ತಂಡ ಆಸ್ಟ್ರೇಲಿಯಾ ಎದುರು ಕೊಂಚ ಬಲಿಷ್ಠ ತಂಡ ಅನ್ನೋದನ್ನು ಅಂಕಿ ಅಂಶಗಳು ಹೇಳುತ್ತವೆ!