ಮಾರ್ಚ್ 28ಕ್ಕೆ ನಿಷೇಧ ಅಂತ್ಯ
ಕಳೆದ ವರ್ಷ ಮಾರ್ಚ್ 28ರಂದು ಆಸ್ಟ್ರೇಲಿಯಾ ನಾಯಕರಾಗಿದ್ದ ಸ್ಟೀವ್ ಸ್ಮಿತ್ ಮತ್ತು ಉಪನಾಯಕ ಡೇವಿಡ್ ವಾರ್ನರ್ ಕ್ರಿಕೆಟ್ ಆಸ್ಟ್ರೇಲಿಯಾದಿಂದ 12 ತಿಂಗಳ ನಿಷೇಧಕ್ಕೆ ಗುರಿಯಾಗಿದ್ದರು. ದಕ್ಷಿಣ ಆಪ್ರಿಕಾ ವಿರುದ್ಧದ ಟೆಸ್ಟ್ ವೇಳೆ ಬಾಲ್ ಟ್ಯಾಂಪರಿಂಗ್ನಲ್ಲಿ ಪಾಲ್ಗೊಂಡಿದ್ದರಿಂದ ಈ ಜೋಡಿ ಶಿಕ್ಷೆಗೆ ಒಳಗಾಗಿತ್ತು. ಆದರೆ ಇದೇ ಮಾರ್ಚ್ 28ಕ್ಕೆ ಇಬ್ಬರ ಮೇಲಿನ ನಿಷೇಧ ಕೊನೆಗೊಳ್ಳಲಿದೆ.
ಐಪಿಎಲ್ 11ನೇ ಸೀಸನ್ನಿಂದ ಹೊರಕ್ಕೆ
ಸ್ಮಿತ್-ವಾರ್ನರ್ ಮೇಲಿನ ನಿಷೇಧ ಕ್ಲಬ್ ಪಂದ್ಯಗಳನ್ನು ಒಳಗೊಂಡಿರಲಿಲ್ಲ. ಆದರೂ ಐಪಿಎಲ್ ಆಡಳಿತ ಸಮಿತಿ ಇಬ್ಬರೂ ಆಟಗಾರರನ್ನು ಐಪಿಎಲ್ 11ನೇ ಆವೃತ್ತಿಯಿಂದ ಹೊರಗಿಟ್ಟಿತ್ತು. ಆಟಗಾರರನ್ನು ಆಡಿಸಿ ವಿವಾದ ಸೃಷ್ಟಿಯಾಗುವುದನ್ನು ತಪ್ಪಿಸಲು ಬಿಸಿಸಿಐ ಸ್ಮಿತ್-ವಾರ್ನರ್ ಅವರನ್ನು ಕಳೆದ ವರ್ಷ ಐಪಿಎಲ್ನಲ್ಲಿ ಆಡಿಸಿರಲಿಲ್ಲ.
ಗಾಯದಿಂದ ಚೇತರಿಕೆ
ಇಬ್ಬರೂ ಕ್ರಿಕೆಟಿಗರು ಇತ್ತೀಚೆಗೆ ಬಾಂಗ್ಲಾದೇಶ ಪ್ರೀಮಿಯರ್ ಲೀಗ್ (ಬಿಪಿಎಲ್)ನಲ್ಲಿ ಪಾಲ್ಗೊಂಡಿದ್ದರು. ಆದರೆ ಮೊಣ ಕೈ ಗಾಯಕ್ಕೀಡಾಗಿ ಟೂರ್ನಿಯಿಂದ ಹೊರಬಿದ್ದಿದ್ದರು. ಈಗ ಗಾಯದಿಂದ ಚೇತರಿಸಿಕೊಂಡಾಗಿದೆ. ಐಪಿಎಲ್ ಗೆ ಸಜ್ಜಾಗಿಯೂ ಆಗಿದೆ. ಇನ್ನೇನಿದ್ದರೂ ಐಪಿಎಲ್ ನಲ್ಲಿ ಉತ್ತಮ ಪ್ರದರ್ಶನ ನೀಡಿ ವಿಶ್ವಕಪ್ಗಾಗಿ ಅಸೀಸ್ ಆಯ್ಕೆ ಸಮಿತಿಯ ಗಮನ ಸೆಳೆಯುವ ಯೋಜನೆ ಇಬ್ಬರದ್ದೂ!
ವಿಶ್ವಕಪ್ ಅದೃಷ್ಟ ಪರೀಕ್ಷೆ
ಐಪಿಎಲ್ನಲ್ಲಿ ಸ್ಮಿತ್-ವಾರ್ನರ್ ಇಬ್ಬರೂ ಆಕರ್ಷಕ ಬ್ಯಾಟಿಂಗ್ಗಾಗಿ ಗಮನ ಸೆಳೆದವರೆ. ಈ ಬಾರಿ ಸ್ಟೀವ್ ಸ್ಮಿತ್ ರಾಜಸ್ಥಾನ್ ರಾಯಲ್ಸ್ಗೆ ಬಲ ತುಂಬಿದರೆ, ಡೇವಿಡ್ ವಾರ್ನರ್ ಸನ್ ರೈಸರ್ಸ್ ಹೈದರಾಬಾದ್ಗೆ ಪರ ಮಿಂಚಲಿದ್ದಾರೆ. ಒಟ್ಟಿನಲ್ಲಿ ಇಬ್ಬರೂ ಆಟಗಾರರು ಐಪಿಎಲ್ನಲ್ಲಿ ಉತ್ತಮ ಬ್ಯಾಟಿಂಗ್ ತೋರಿಸಿದರೆ ವಿಶ್ವಕಪ್ನಲ್ಲಿ ಆಸೀಸ್ ತಂಡದಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ.