ಆಷಸ್ ಸ್ಪಾಟ್ ಫಿಕ್ಸಿಂಗ್, ಭಾರತೀಯ ಮೂಲದ ಬುಕ್ಕಿಗಳು ಯಾರು?

ಸ್ಪಾಟ್ ಫಿಕ್ಸಿಂಗ್ ಮೊತ್ತ ಎಷ್ಟು? ಯಾರು ಬುಕ್ಕಿಗಳು?

ಭಾರತೀಯ ಮೂಲದ ಸೊಬರ್ಸ್ ಜೊಬನ್ ಹಾಗೂ ಪ್ರಿಯಾಂಕ್ ಅವರು ಇಂಗ್ಲೆಂಡ್ ಹಾಗೂ ಆಸ್ಟ್ರೇಲಿಯಾ ನಡುವಿನ ಆಷಸ್ ಸರಣಿಯ ಮೂರನೇ ಟೆಸ್ಟ್ ಪಂದ್ಯವನ್ನು ಫಿಕ್ಸ್ ಮಾಡಲು ಸರಿ ಸುಮಾರು 140,000 ಪೌಂಡ್ ಬೇಡಿಕೆ ಒಡ್ಡಿದ್ದರು.
ಫಿಕ್ಸ್ ಮಾಡುವುದು ಹೇಗೆ?
* ಯಾವ ಓವರ್ ಗೆ ಎಷ್ಟು ರನ್ ಎಂದು ನಾವು ಹೇಳುತ್ತೇವೆ. ಆಮೇಲೆ ಓವರ್ ಗೆ ಎಷ್ಟು ಬೇಕೋ ಅಷ್ಟು ಬೆಟ್ ಕಟ್ಟಿ.
ಫಿಕ್ಸ್ ಆಗಿರೋದು ಗೊತ್ತಾಗೋದು ಹೇಗೆ?
* ಮೈದಾನದಲ್ಲಿ ಫಿಕ್ಸಿಂಗ್ ನಲ್ಲಿ ಭಾಗಿಯಾದ ಆಟಗಾರರು ಸಿಗ್ನಲ್ ನೀಡುತ್ತಾರೆ. ಗ್ಲೌವ್ಸ್ ಬದಲಾಯಿಸುವುದು, ಮುಂತಾದ ಸಿಗ್ನಲ್ ನೀಡುತ್ತಾರೆ.

ಆಸ್ಟ್ರೇಲಿಯಾ ಟೀಮ್ ಸದಸ್ಯನ ಸಾಥ್

ಮೈದಾನದಲ್ಲಿರುವ ಆಟಗಾರನ ಸಿಗ್ನಲ್ ಸಿಕ್ಕ ಬಳಿಕ ಪ್ರೇಕ್ಷಕರ ಬಳಿ ಕುಳಿತ ಸ್ಪಾಟರ್ ಒಬ್ಬ ಬುಕ್ಕಿಗಳಿಗೆ ಸೂಚನೆ ನೀಡುತ್ತಾನೆ. ಕ್ಷಣಾರ್ಧದಲ್ಲಿ ಮಿಲಿಯನ್ ಗಟ್ಟಲೇ ಹಣದ ಬೆಟ್ಟಿಂಗ್ ಭೂಗತವಾಗಿ ಭಾರತೀಯ ಮಾರುಕಟ್ಟೆಯಲ್ಲಿ ನಡೆಯಲಿದೆ.
ಆಸ್ಟ್ರೇಲಿಯಾ ತಂಡದ ಮೆದು ಸ್ವಭಾವದ ಆಟಗಾರನೊಬ್ಬನನ್ನು ಸದ್ಯಕ್ಕೆ ಟಾರ್ಗೆಟ್ ಮಾಡಿದ್ದೇವೆ. ವಿಶ್ವಕಪ್ ವಿಜೇತ ಆಲ್ ರೌಂಡರ್ ಒಬ್ಬ ಇದಕ್ಕೆ ನೆರವು ನೀಡುತ್ತಿದ್ದಾನೆ ಎಂದು ಬುಕ್ಕಿಗಳು ಹೇಳಿದ್ದಾರೆ.

ಜೊಬನ್ ಯಾರು?

ಭಾರತದ ರಾಜ್ಯವೊಂದರ ಪರ ಆಡಿದ್ದ ಅನುಭವವಿರುವ ಜೊಬನ್ ಈಗ ಪ್ರಮುಖ ಬುಕ್ಕಿಯಾಗಿದ್ದಾರೆ. 31 ವರ್ಷ ವಯಸ್ಸಿನ ಜೊಬನ್ ಒಮ್ಮೆ ವಿರಾಟ್ ಕೊಹ್ಲಿ ನಾಯಕತ್ವದ ದೆಹಲಿ ವಿರುದ್ಧ ಆಡಿದ್ದಾನೆ ಕೂಡಾ.

ದೆಹಲಿಯ ವಸಂತ್ ವಿಹರ್ ನಲ್ಲಿ ನೆಲೆಸಿದ್ದು, ರಷ್ಯಾದ ಮಾರ್ಷಲ್ ಆರ್ಟಿಸ್ಟ್ ಪಟುವಿನೊಂದಿಗೆ ಮದುವೆ ಗೊತ್ತಾಗಿದೆ.

ಪ್ರಿಯಾಂಕ್ ಸಕ್ಸೇನಾ ಯಾರು?

ಉದ್ಯಮಿ ಪ್ರಿಯಾಂಕ್ ಸಕ್ಸೇನಾ ಹಾಗೂ ಜೊಬೆನ್ ಇಬ್ಬರು ಜೊತೆಗಾರರು. ತಂಬಾಕು ಹಾಗೂ ಮಸಾಲೆ ಪದಾರ್ಥಗಳನ್ನು ದಕ್ಷಿಣ ಆಫ್ರಿಕಾಕ್ಕೆ ಮಾರುತ್ತಿದ್ದಾನೆ.

ಭ್ರಷ್ಟ ಕ್ರಿಕೆಟರ್ ಗಳ ಜತೆ ಸಂಪರ್ಕದಲ್ಲಿದ್ದು, ಜೊಬೆನ್ ತರುವ ಡೀಲ್ ಗಳನ್ನು ಬೆಳೆಸುವುದು ಈತನ ಕೆಲಸ.

ಕ್ರಿಕೆಟ್ ನಲ್ಲಿ ಸ್ಪಾಟ್ ಫಿಕ್ಸಿಂಗ್ ಎಂದರೇನು ?

ಟಾಸ್ ಗೆಲ್ಲುವುದರಿಂದ ಹಿಡಿದು ಆಟಗಾರರ ಮತ್ತು ಬೌಲರುಗಳ ನಿರ್ವಹಣೆಯ ಮೇಲೆ ಪ್ರತಿಯೊಂದು ಓವರಿನ ಆಧಾರದಲ್ಲೂ ಬೆಟ್ಟಿಂಗ್ ನಡೆಯುತ್ತದೆ. ಪ್ರತಿ ಓವರಿನಲ್ಲಿ ಎಷ್ಟು ರನ್ ಹೋಗುತ್ತದೆ, ಮೇಡನ್ ಆಗುತ್ತದೋ ಇಲ್ಲವೋ, ವಿಕೆಟ್ ಬೀಳುತ್ತದೋ ಇಲ್ಲವೋ ಎಂದು ಕೂಡ ಬೆಟ್ ಕಟ್ಟಬಹುದು. ಹೊಸದಾಗಿ ಕ್ರೀಸಿಗೆ ಬರುವ ಬ್ಯಾಟ್ಸ್‌ಮನ್ 10 ರನ್ ಗಳಿಸುತ್ತಾನೋ ಇಲ್ಲವೋ ಅಥವಾ ಮುಂದಿನ ಓವರಿನಲ್ಲಿ ಬೌಂಡರಿ ಬಾರಿಸುತ್ತಾನೋ ಇಲ್ಲವೋ ಮುಂಚಿತಾಗಿಯೂ ಬೆಟ್ ಕಟ್ಟಲಾಗುತ್ತದೆ.