ಆಸ್ಟ್ರೇಲಿಯಾ ವಿರುದ್ಧ ಅತೀ ಕೆಟ್ಟ ದಾಖಲೆ ನಿರ್ಮಿಸಿದ ಟೀಮ್ ಇಂಡಿಯಾ!

ಅತೀ ಕಡಿಮೆ ರನ್ ದಾಖಲೆ

1955ರಲ್ಲಿ ಆಕ್ಲೆಂಡ್‌ನಲ್ಲಿ ನಡೆದಿದ್ದ ಟೆಸ್ಟ್ ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡ ಇಂಗ್ಲೆಂಡ್ ವಿರುದ್ಧ ಇನ್ನಿಂಗ್ಸ್‌ ಒಂದರಲ್ಲಿ 26 ರನ್ ಬಾರಿಸಿತ್ತು. ಟೆಸ್ಟ್ ಕ್ರಿಕೆಟ್‌ ಇತಿಹಾಸದಲ್ಲಿ ದಾಖಲಾಗಿರುವ ಅತೀ ಕಡಿಮೆ ಒಟ್ಟು ರನ್ ಇದು. ಅದು ಬಿಟ್ಟರೆ 1896ರಲ್ಲಿ ದಕ್ಷಿಣ ಆಫ್ರಿಕಾ ತಂಡ ಪೋರ್ಟ್ ಎಲಿಝಬೆತ್‌ನಲ್ಲಿ ನಡೆದಿದ್ದ ಇಂಗ್ಲೆಂಡ್‌ ವಿರುದ್ಧ ಪಂದ್ಯದಲ್ಲಿ ಬಾರಿಸಿದ್ದ 30 ರನ್ ದ್ವಿತೀಯ ಕೆಟ್ಟ ದಾಖಲೆಯೆನಿಸಿದೆ.

ಭಾರತ ನೀರಸ ಬ್ಯಾಟಿಂಗ್‌

ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಭಾರತ ರನ್ ಪಟ್ಟಿ ನೋಡಿದರೆ, ಪೃಥ್ವಿ ಶಾ 4, ಮಾಯಾಂಕ್ ಅಗರ್ವಾಲ್ 9, ಚೇತೇಶ್ವರ ಪೂಜಾರ 0, ವಿರಾಟ್ ಕೊಹ್ಲಿ (ಸಿ) 4, ಅಜಿಂಕ್ಯ ರಹಾನೆ 0, ಹನುಮಾ ವಿಹಾರಿ 8, ವೃದ್ಧಿಮಾನ್ ಸಹಾ (ವಿಕೆ) 4, ರವಿಚಂದ್ರನ್ ಅಶ್ವಿನ್ 0, ಉಮೇಶ್ ಯಾದವ್ 4, ಮೊಹಮ್ಮದ್ ಶಮಿ 1, ಜಸ್ಪ್ರೀತ್ ಬುಮ್ರಾ 2 ರನ್ ಬಾರಿಸಿದ್ದರು.

ಮುನ್ನಡೆಯಲ್ಲಿದ್ದ ಭಾರತಕ್ಕೆ ಹಿನ್ನಡೆ

ಟಾಸ್ ಗೆದ್ದು ಬ್ಯಾಟಿಂಗ್‌ ಆಯ್ದುಕೊಂಡಿದ್ದ ಭಾರತ, ಮೊದಲ ಇನ್ನಿಂಗ್ಸ್‌ನಲ್ಲಿ 93.1 ಓವರ್‌ಗೆ 244 ಪೇರಿಸಿದ್ದರೆ, ಆಸ್ಟ್ರೇಲಿಯಾ ತಂಡ ಮೊದಲ ಇನ್ನಿಂಗ್ಸ್‌ನಲ್ಲಿ 72.1 ಓವರ್‌ಗೆ 191 ರನ್ ಗಳಿಸಿ ಹಿನ್ನಡೆ ಅನುಭವಿಸಿತ್ತು. ಶುಕ್ರವಾರ (ಡಿಸೆಂಬರ್ 18) ಎರಡನೇ ದಿನದಾಟದ ಅಂತ್ಯಕ್ಕೆ ದ್ವಿತೀಯ ಇನ್ನಿಂಗ್ಸ್‌ ಆಡುತ್ತಿದ್ದ ಭಾರತ ಆರಂಭಿಕ ಬ್ಯಾಟ್ಸ್‌ಮನ್ ಪೃಥ್ವಿ ಶಾ (4 ರನ್) ವಿಕೆಟ್ ಕಳೆದುಕೊಂಡಿತ್ತು. ಶನಿವಾರ ಭಾರತ ಇನ್ನೂ ಕೆಟ್ಟ ಬ್ಯಾಟಿಂಗ್ ಪ್ರದರ್ಶಿಸಿತು.