Click it and Unblock the Notifications
ಏರುತ್ತಿರೋ ಕೊರೊನಾ ಸೋಂಕಿತರು
ಭಾರತದಲ್ಲಿ ಕೊರೊನಾವೈರಸ್ ಸೋಂಕಿತರ ಸಂಖ್ಯೆ ಈಗಾಗಲೇ 2 ಲಕ್ಷ ಗಡಿ ದಾಟಿದೆ. ಅಲ್ಲದೆ ಪ್ರತೀ ದಿನವೂ ಸುಮಾರು 8000-10000 ಹೊರ ಪ್ರಕರಣಗಳು ಭಾರತದಾದ್ಯಂತ ದಾಖಲಾಗುತ್ತಿದೆ. ಕೊರೊನಾ ಪ್ರಕರಣಗಳು ಹೀಗೆ ಆತಂಕಕಾರಿಯಾಗಿ ಏರುತ್ತಿದ್ದರೆ ಸಹಜವಾಗೇ ಭಾರತದಲ್ಲಿ ಪ್ರಮುಖ ಕ್ರೀಡಾಕೂಟಗಳನ್ನು ನಡೆಸಲು ಕಷ್ಟವಾಗುತ್ತದೆ.
ವಿದೇಶದಲ್ಲಿ ಐಪಿಎಲ್ ನಡೆಸುವ ಯೋಚನೆ
'ಭಾರತದ ಸದ್ಯದ ಪರಿಸ್ಥಿತಿಯನ್ನು ಗಮನಿಸಿ ನಾವು ಇಂಡಿಯನ್ ಪ್ರೀಮಿಯರ್ ಲೀಗ್ ನಡೆಸುವ ಬಗ್ಗೆ ಎಲ್ಲಾ ಆಯ್ಕೆಗಳನ್ನು ಮುಂದಿಟ್ಟುಕೊಂಡು ಆಲೋಚಿಸುತ್ತಿದ್ದೇವೆ. ಒಂದು ವೇಳೆ ಐಪಿಎಲ್ ಎನ್ನು ವಿದೇಶದಲ್ಲಿ ನಡೆಸಬೇಕಾಗಿ ಬಂದರೆ ನಡೆಸುತ್ತೇವೆ. ಆದರೆ ಆ ಆಯ್ಕೆಯನ್ನು ಸದ್ಯ ನಾವು ಕೊನೆಯಾಗಿ ಇಟ್ಟುಕೊಂಡಿದ್ದೇವೆ,' ಎಂದು ಬಿಸಿಸಿಐ ಖಜಾಂಚಿ ಅರುಣ್ ಧುಮಾಲ್ ಎಎನ್‌ಐಗೆ ಮಾಹಿತಿ ನೀಡಿದ್ದಾರೆ.
ಈ ಮೊದಲೂ ವಿದೇಶಲ್ಲಿ ಐಪಿಎಲ್ ನಡೆದಿದೆ
'ವಿದೇಶದಲ್ಲಿ ಐಪಿಎಲ್ ನಡೆಸೋದೇ ಕೊನೆಯ ಆಯ್ಕೆಯಾದರೆ ನಾವದನ್ನು ಪರಿಗಣಿಸುತ್ತೇವೆ. ನಾವು ಈ ಮೊದಲೂ ವಿದೇಶಲ್ಲಿ (ದಕ್ಷಿಣ ಆಫ್ರಿಕಾದಲ್ಲಿ) ಐಪಿಎಲ್ ನಡೆಸಿದ್ದೇವೆ. ಆದರೆ ಸದ್ಯಕ್ಕಂತೂ ನಮ್ಮ ಮೊದಲ ಆಯ್ಕೆ ಐಪಿಎಲ್ ಅನ್ನು ಭಾರತದಲ್ಲೇ ಆಯೋಜಿಸೋದಾಗಿದೆ,' ಎಂದು ಧುಮಾಲ್ ಹೇಳಿದ್ದಾರೆ.
ಶ್ರೀಲಂಕಾದಲ್ಲಿ ಐಪಿಎಲ್ ನಡೆಸಲು ಮನವಿ
ಮಾರ್ಚ್ 29ರಂದು ಆರಂಭವಾಗಬೇಕಿದ್ದ ಐಪಿಎಲ್, ಕೊರೊನಾವೈರಸ್‌ನಿಂದಾಗಿ ಏಪ್ರಿಲ್ 15ಕ್ಕೆ ಮುಂದೂಡಲ್ಪಟ್ಟಿತ್ತು. ಏಪ್ರಿಲ್ 15ಕ್ಕೂ ಕೊರೊನಾ ಹತೋಟಿಕೆ ಬಾರದಿದ್ದಾಗ ಐಪಿಎಲ್ ಅನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಲಾಗಿದೆ. ಈಗ ಸೋಂಕಿತರ ಸಂಖ್ಯೆ ಮತ್ತೂ ಏರುತ್ತಿರುವುದರಿಂದ ಐಪಿಎಲ್ ಭಾರತದಲ್ಲಿ ನಡೆಸೋದೇ ಕಷ್ಟವೆನಿಸಿದೆ. ಯಾಕೆಂದರೆ ಭಾರತದಲ್ಲಿ ಸೋಂಕಿತರ ಸಂಖ್ಯೆ ಇಳಿಮುಖವಾಗದಿದ್ದರೆ ವಿದೇಶಿ ಆಟಗಾರರು ಭಾರತಕ್ಕೆ ಬರಲು ಹಿಂದೇಟು ಹಾಕುತ್ತಾರೆ, ವಿದೇಶಿಗರಿಲ್ಲದಿದ್ದರೆ ಐಪಿಎಲ್ ಕಳೆಗುಂದುತ್ತದೆ. ಅಂದ್ಹಾಗೆ ಈ ಮೊದಲು ಶ್ರೀಲಂಕಾ, ನಾವು ಐಪಿಎಲ್ ನಡೆಸಲು ಆಸಕ್ತಿ ಹೊಂದಿದ್ದೇವೆ ಎಂದು ಬಿಸಿಸಿಐ ಜೊತೆ ಹೇಳಿಕೊಂಡಿತ್ತು.
