ಐಪಿಎಲ್‌ನಲ್ಲಿ ಇನ್ಮುಂದೆ ಬರಲಿದ್ದಾರೆ ಗೇಮ್ ಚೇಂಜರ್ 'ಪವರ್ ಪ್ಲೇಯರ್‌'!

ಅನುಮೋದನೆ ದೊರೆತಿದೆ

ಈ ಬಗ್ಗೆ ಐಎಎನ್‌ಎಸ್‌ ಜೊತೆ ಮಾತನಾಡಿದ ಬಿಸಿಸಿಐ ಅಧಿಕಾರಿಗಳು, ಈ ನೂತನ ಪರಿಕಲ್ಪನೆಗೆ ಈಗಾಗಲೇ ಅನುಮೋದನೆ ದೊರೆತಿದೆ. ಆದರೆ ಮಂಗಳವಾರ (ನವೆಂಬರ್ 5) ಮುಂಬೈಯಲ್ಲಿರುವ ಬಿಸಿಸಿಐ ಮುಖ್ಯ ಕಚೇರಿಯಲ್ಲಿ ಐಪಿಎಲ್ ಆಡಳಿತ ಸಮಿತಿ ಜೊತೆ ಸಭೆ ನಡೆಸಿ ಈ ಬಗ್ಗೆ ಇನ್ನೊಂದಿಷ್ಟು ಮಾತುಕತೆ ನಡೆಸಲಿದ್ದೇವೆ ಎಂದಿದ್ದಾರೆ.

ಪ್ಲೇಯಿಂಗ್ XI ಇರಲ್ಲ!

ಆಟದ ವೇಳೆ ಪ್ಲೇಯಿಂಗ್ XI ಘೋಷಿಸದಿರುವ ಪರಿಕಲ್ಪನೆಯತ್ತ ನಾವು ಯೋಚಿಸುತ್ತಿದ್ದೇವೆ. ಅಂದರೆ ಇಲ್ಲಿ 15 ಜನರ ತಂಡ ಘೋಷಿಸಲಾಗುತ್ತದೆ. ತಂಡವೊಂದರ ವಿಕೆಟ್ ಉರುಳಿದಾಗ ಅಥವಾ ಓವರ್‌ನ ಕೊನೆಯಲ್ಲಿ ಬದಲಿ ಆಟಗಾರನನ್ನು ಮೈದಾನಕ್ಕಿಳಿಸಲು ಇಲ್ಲಿ ಅವಕಾಶವಿದೆ.

ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಪರಿಚಯ

ಐಪಿಎಲ್‌ನಲ್ಲಿ ಇದನ್ನು ಪರಿಚಯಿಸುವುದಕ್ಕೂ ಮುನ್ನ ಸೈಯ್ಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಇದನ್ನು ಪರಿಚಯಿಸೋದು ಒಳ್ಳೇದು ಅಂತ ನಮ್ಮ ಆಲೋಚನೆ,' ಎಂದು ಅಧಿಕಾರಿಗಳು ಹೇಳಿದ್ದಾರೆ. ಅಂದರೆ ಮುಂದಿನ ಐಪಿಎಲ್‌ನಲ್ಲಿ ಎಲ್ಲಾ ಪಂದ್ಯಗಳೂ ಬಹುತೇಕ ರೋಚಕವೇ ಎನಿಸಿಕೊಳ್ಳುವುದರಲ್ಲಿದೆ.

ಅಧಿಕಾರಿಗಳು ಕೊಟ್ಟ ವಿವರಣೆ

'ಕೊನೆಯ ಓವರ್‌ನಲ್ಲಿ ನಿಮಗೆ 20 ರನ್‌ಗಳು ಬೇಕಿವೆ ಅಂತಿಟ್ಟುಕೊಳ್ಳಿ. ಪ್ಲೇಯಿಂಗ್ XIನಲ್ಲಿ ಹೆಸರಿಸದಿದ್ದರಿಂದ ಡಗ್‌ ಔಟ್‌ನಲ್ಲಿ ಕೂತಿರುವ ಆ್ಯಂಡ್ರೆ ರಸೆಲ್ ನಿಮ್ಮ ಬಳಿ ಇದ್ದಾರೆ. ಆಗ ಅದೇ ರಸೆಲ್ 'ಪವರ್ ಪ್ಲೇಯರ್' ಆಗಿ ಮೈದಾನಕ್ಕಿಳಿಯಬಹುದು. ಸ್ಫೋಟಕ ಬ್ಯಾಟಿಂಗ್‌ ಮೂಲಕ ಪಂದ್ಯವನ್ನು ಗೆಲ್ಲಿಸಬಹುದು,' ಎಂದು ಅಧಿಕಾರಿಗಳು ವಿವರಿಸಿದರು.