ಕ್ಲೈವ್ ಲಾಯ್ಡ್
ವಿಶ್ವಕಪ್ ನಲ್ಲಿ ತಂಡದ ನಾಯಕತ್ವ ವಹಿಸಿಕೊಂಡು ಶತಕ ಬಾರಿಸಿದ ಹೆಗ್ಗಳಿಗೆ ವೆಸ್ಟ್ ಇಂಡೀಸ್ ಕ್ರಿಕೆಟ್ ದಿಗ್ಗಜ ಕ್ಲೈವ್ ಲಾಯ್ಡ್ ಮತ್ತು ಆಸ್ಟ್ರೇಲಿಯಾ ಕ್ರಿಕೆಟ್ ದಂತಕತೆ ರಿಕಿ ಪಾಂಟಿಂಗ್ ಅವರದ್ದು. ಅದರಲ್ಲೂ ಕ್ಲೈವ್ ಲಾಯ್ಡ್ ಆರಂಭಿಕ ವಿಶ್ವಕಪ್ ಆವೃತ್ತಿಯಲ್ಲೇ ಶತಕ ಬಾರಿಸಿ ವಿಶ್ವದ ಗಮನ ಸೆಳೆದಿದ್ದರು. ಲಾಯ್ಡ್ ಈ ಸಾಧನೆ ಮೆರದಿದ್ದು ಆಸ್ಟ್ರೇಲಿಯಾ ವಿರುದ್ಧ.
85 ಎಸೆತಗಳಿಗೆ 102 ರನ್
1975ರಲ್ಲಿ ನಡೆದಿದ್ದ ಪ್ರುಡೆನ್ಷಿಯಲ್ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಮತ್ತು ವೆಸ್ಟ್ ಇಂಡೀಸ್ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯ ಜೂನ್ 21ರಂದು ಲಂಡನ್ ನ ಲಾರ್ಡ್ಸ್ ನಲ್ಲಿ ನಡೆದಿತ್ತು. ವಿಂಡೀಸ್ ಪರ ಬ್ಯಾಟ್ ಬೀಸಿದ್ದ ನಾಯಕ ಕ್ಲೈವ್ ಲಾಯ್ಡ್ 85 ಎಸೆತಗಳಿಗೆ 102 ರನ್ ಸಿಡಿಸಿದ್ದರು. ಈ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡ 17 ರನ್ಗಳ ರೋಚಕ ಗೆಲುವು ದಾಖಲಿಸಿತ್ತು.
ರಿಕಿ ಪಾಂಟಿಂಗ್
ಐದು ಸಾರಿ ವಿಶ್ವಕಪ್ ಟ್ರೋಫಿ ಜಯಿಸಿ ಕ್ರಿಕೆಟ್ ವಿಶ್ವಕಪ್ ಇತಿಹಾಸದಲ್ಲಿ ಅತೀ ಬಲಿಷ್ಠ ತಂಡವಾಗಿ ಗುರುತಿಸಿಕೊಂಡಿರುವ ಆಸ್ಟ್ರೇಲಿಯಾ ತಂಡದ ನಾಯಕರಾಗಿದ್ದ ರಿಕಿ ಪಾಂಟಿಂಗ್ ವಿಶ್ವಕಪ್ ಫೈನಲ್ನಲ್ಲಿ ಶತಕ ಬಾರಿಸಿ, ಕ್ಲೈವ್ ಲಾಯ್ಡ್ ಜೊತೆ ಅಪರೂಪದ ಸಾಧನೆ ಸಾಲಿನಲ್ಲಿ ಸೇರಿಕೊಂಡಿದ್ದಾರೆ. ಪಾಂಟಿಂಗ್ ಸೆಂಚುರಿ ಬಾರಿಸಿದ್ದು ಭಾರತದ ವಿರುದ್ಧವೆ.
ಅಜೇಯ 140 ರನ್
ದಕ್ಷಿಣ ಆಫ್ರಿಕಾದ ಜೊಹಾನ್ಸ್ಬರ್ಗ್ನ ವಾಂಡರರ್ಸ್ ಸ್ಟೇಡಿಯಂನಲ್ಲಿ 2003ರಲ್ಲಿ ನಡೆದಿದ್ದ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಕಾಂಗರೂ ಬಳಗದಿಂದ ರಿಕಿ ಪಾಂಟಿಗ್ ಶತಕ ಬಾರಿಸಿದ್ದರು. ಮಾರ್ಚ್ 23ರಂದು ನಡೆದಿದ್ದ ಈ ಪಂದ್ಯದಲ್ಲಿ ಭಾರತ ವಿರುದ್ಧ ಪಾಂಟಿಂಗ್ 121 ಎಸೆತಗಳಿಗೆ 140 ರನ್ ಚಚ್ಚಿದ್ದರು. ಮೊದಲು ಇನ್ನಿಂಗ್ಸ್ ಆಡಿದ್ದ ಆಸೀಸ್ 359 ರನ್ ಬಾರಿಸಿತ್ತು. ಗುರಿ ಬೆನ್ನಟ್ಟಿದ ಸೌರವ್ ಗಂಗೂಲಿ ಬಳಗ ವೀರೇಂದ್ರ ಸೆಹ್ವಾಗ್ 82 ರನ್ ಹೊರತಾಗಿಯೂ ಎಲ್ಲಾ ವಿಕೆಟ್ ಕಳೆದು 234 ರನ್ ಪೇರಿಸಿ 125 ರನ್ಗಳಿಂದ ಶರಣಾಗಿತ್ತು.