ಸ್ಥಾನ ಉತ್ತಮಪಡಿಸಿಕೊಂಡ ವಿರಾಟ್
ವಿರಾಟ್ ಕೊಹ್ಲಿ ಈ ಪಟ್ಟಿಯಲ್ಲಿ 66ನೇ ಸ್ಥಾನದಲ್ಲಿದ್ದಾರೆ. 26 ಮಿಲಿಯನ್ ಡಾಲರ್ ವಾಋ್ಷಿಕ ಆದಾಯವನ್ನು ಗಳಿಸಿದ್ದಾರೆ ಎಂದು ಫೋರ್ಬ್ಸ್ ಲೆಕ್ಕಾಚಾರ ಹಾಕಿದೆ. ಈ ಪಟ್ಟಿಯಲ್ಲಿ ವಿರಾಟ್ 2018ರಲ್ಲಿ 83ನೇ ಸ್ಥಾನದಲ್ಲಿದ್ದರು. ಆದರೆ ಕಳೆದ ವರ್ಷ 100ನೇ ಸ್ಥಾನಕ್ಕೆ ಜಾರಿದ್ದರು. ಈ ವರ್ಷ ತನ್ನ ಸ್ಥಾನವನ್ನು ಮತ್ತಷ್ಟು ಉತ್ತಮ ಪಡಿಸಿಕೊಂಡಿದ್ದಾರೆ.
ಮೊದಲ ಟೆನ್ನಿಸ್ ಪ್ಲೇಯರ್
ಫೋರ್ಬ್ಸ್ ಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಪಡೆದುಕೊಂಡ ಕ್ರೀಡಾಪಟು ಅಂದರೆ ಅದು ಟೆನಿಸ್ ದಿಗ್ಗಜ ರೋಜರ್ ಫೆಡರರ್. ಇದೇ ಮೊದಲ ಬಾರಿಗೆ ಟೆನ್ನಿಸ್ ಆಟಗಾರನೋರ್ವ ಈ ಪಟ್ಟಿಯಲ್ಲಿ ಮೊದಲ ಸ್ಥಾನವನ್ನು ಪಡೆದು ಫೆಡರರ್ ದಾಖಲೆ ಬರೆದಿದ್ದಾರೆ. 106.3 ಮಿಲಿಯನ್ ಡಾಲರ್ ವಾರ್ಷಿಕ ಆದಾಯದೊಂದಿಗೆ ಫೆಡರರ್ ಮೊದಲ ಸ್ಥಾನವನ್ನು ಸಂಪಾದಿಸಿಕೊಂಡಿದ್ದಾರೆ.
ರೊನಾಲ್ಡೋ, ಮೆಸ್ಸಿಗೆ ನಂತರದ ಸ್ಥಾನ
ಫುಟ್ಬಾಲ್ ದಿಗ್ಗಜರಾದ ಕ್ರಿಶ್ಚಿಯಾನೋ ರೊನಾಲ್ಡೋ ಎರಡನೇ ಸ್ಥಾನವನ್ನು ಪಡೆದುಕೊಂಡಿದ್ದರೆ ಮೂರನೇ ಸ್ಥಾನದಲ್ಲಿ ಲಿಯೋನೆಲ್ ಮೆಸ್ಸಿ, ನಾಲ್ಕನೇ ಸ್ಥಾನದಲ್ಲಿ ನೇಮಾರ್ ಇದ್ದಾರೆ. ಬಾಸ್ಕೆಟ್ ಬಾಲ್ ದಿಗ್ಗಜನಾದ ಅಮೆರಿಕಾದ ಲಿಬ್ರಾನ್ ಜೇಮ್ಸ್ ಈ ಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿದ್ದಾರೆ.
ನವೋಮಿ ಒಸಕಾ ನಂ 1
ಮಹಿಳಾ ಕ್ರೀಡಾಪಟುಗಳ ಪಟ್ಟಿಯಲ್ಲಿ ಜಪಾನ್ನ ನವೋಮಿ ಒಸಕಾ ಮೊದಲ ಸ್ಥಾನವನ್ನು ಸಂಪಾದಿಸಿಕೊಂಡಿದ್ದಾರೆ. ಸೆರೆನಾ ವಿಲಿಯಮ್ಸ್ ಎರಡನೇ ಸ್ಥಾನಕ್ಕೆ ಜಾರಿದ್ದಾರೆ. ಮಹಿಳಾ ಕ್ರೀಡಾಪಟುಗಳ ಪಟ್ಟಿಯಲ್ಲಿ ಈ ವರ್ಷವೂ ಟೆನ್ನಿಸ್ ಆಟಗಾರರ ಪ್ರಾಬಲ್ಯ ಮುಂದಿವರಿದಿದೆ.