ಧೋನಿಗೆ ಅಷ್ಟು ವಯಸ್ಸಾಗಿಲ್ಲ: ವೈರಲ್ ಫೋಟೋ ಬಗ್ಗೆ ಅಮ್ಮನ ಮಾತು

ನಾನೂ ಕೂಡ ಆ ಚಿತ್ರ ನೋಡಿದ್ದೇನೆ

ರಾಂಚಿಯ ತಮ್ಮ ಮನೆಯಿಂದ ಧೋನಿ ತಾಯಿ ದೇವಕಿ ದೇವಿ ಖಾಸಗಿ ಸುದ್ದಿ ಸಂಸ್ಥೆಗೆ ಮದರ್ಸ್ ಡೇ ಅಂಗವಾಗಿ ವಿಶೇಷ ಸಂದೇಶವನ್ನು ನೀಡಿದ್ದರು. ಈ ವೇಳೆ ಅವರು ವೈರಲ್ ಫೋಟೋ ವಿಚಾರವಾಗಿ ಮಾತನಾಡಿದ್ದಾರೆ. ತಾನೂ ಕೂಡ ಆ ಚಿತ್ರವನ್ನು ನೋಡಿದ್ದೇನೆ. ಆದರೆ ಆ ಚಿತ್ರದಲ್ಲಿ ಕಾಣುವಷ್ಟು ವಯಸ್ಸು ಅವನಿಗೆ ಆಗಿಲ್ಲ ಎಂದು ಹೇಳಿದ್ದಾರೆ.

ಆತನೇ ನಿರ್ಧಾರ ತೆಗೆದುಕೊಳ್ಳುತ್ತಾನೆ

ಇದೇ ಸಂದರ್ಭದಲ್ಲಿ ಧೋನಿಯ ತಾಯಿಯವರ ಬಳಿ ಧೋನಿ ಟಿ20 ವಿಶ್ವಕಪ್ ಆಡುವ ಸಾಧ್ಯತೆಯ ಬಗ್ಗೆಯೂ ಕೇಳಲಾಯಿತು. ಅದಕ್ಕೆ ಅವರು "ಟಿ20 ವಿಶ್ವಕಪ್‌ನಲ್ಲಿ ಧೋನಿ ಆಡುವ ಬಗ್ಗೆ ನನಗೂ ಮಾಹಿತಿಯಿಲ್ಲ. ಮೊದಲು ಕೊರೊನಾ ವೈರಸ್ ಸಂಪೂರ್ಣವಾಗಿ ಮುಗಿಯಲಿ. ಆ ಬಳಿಕ ಆತನಿಗೆ ಮುಂದೆ ಯಾವ ನಿರ್ಧಾರವನ್ನು ತೆಗೆದುಕೊಳ್ಳಬೇಕೆಂದು ಚೆನ್ನಾಗಿ ಗೊತ್ತಿದೆ ಎಂದು ಹೇಳಿದ್ದಾರೆ.

ರಾಂಚಿಯಲ್ಲಿ ಕುಟುಂಬದೊಂದಿಗೆ ಧೋನಿ

ಧೋನಿ ಸದ್ಯ ರಾಂಚಿಯ ತಮ್ಮ ಫಾರ್ಮ್ ಹೌಸ್‌ನಲ್ಲಿ ಸಮಯವನ್ನು ಕಳೆಯುತ್ತಿದ್ದಾರೆ. ಸಾಮಾಜಿಕ ಜಾಲತಾಣದಿಂದ ದೂರವಿರುವ ಧೋನಿಯ ಬಗ್ಗೆ ಅವರ ಪತ್ನಿ ಸಾಕಷ್ಟು ವಿಡಿಯೋ ಫೋಟೋಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಪುತ್ರಿ ಜೀವಾ ಹಾಗೂ ಪತ್ನಿ ಸಾಕ್ಷಿ ಜೊತೆಗಿನ ಹಲವು ಫೋಟೋಗಳು ಮತ್ತು ವೀಡಿಯೋಗಳು ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದವು.

ಕ್ರಿಕೆಟ್‌ನಿಂದ ಧೋನಿ ದೂರ

ಕಳೆದ ವಿಶ್ವಕಪ್‌ನಲ್ಲಿ ಟೀಮ್ ಇಂಡಿಯಾ ಸೆಮಿ ಫೈನಲ್‌ನಲ್ಲಿ ನ್ಯೂಜಿಲೆಂಡ್‌ಗೆ ಶರಣಾಗಿ ಹೊರಬಿದ್ದ ಬಳಿಕ ಧೋನಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ದೂರ ಉಳಿದಿದ್ದರು. ಕ್ರಿಕೆಟ್‌ ಭವಿಷ್ಯದ ಬಗ್ಗೆ ಯಾವ ಸ್ಪಷ್ಟನೆಯನ್ನೂ ಕೂಡ ಧೋನಿ ನೀಡಿರಲಿಲ್ಲ. ಮುಂದಿನ ಜುಲೈನ 7ನೇ ದಿನಾಂಕಕ್ಕೆ ಧೋನಿ 39ನೇ ವಯಸ್ಸಿಗೆ ಕಾಲಿಡಲಿದ್ದಾರೆ.