Click it and Unblock the Notifications
ಐಪಿಎಲ್, ವಿದೇಶಿ ಟೂರ್ನಿಗಳೆಲ್ಲ ರದ್ದು
ನೋವೆಲ್ ಕೊರೊನಾ ವೈರಸ್‌ನಿಂದಾಗಿ ಮಾರ್ಚ್ 29ರಿಂದ ಆರಂಭವಾಗಬೇಕಿದ್ದ ಐಪಿಎಲ್ ಸದ್ಯಕ್ಕೆ ರದ್ದಾಗಿದೆ. ಐಪಿಎಲ್ ಅನ್ನು ಏಪ್ರಿಲ್ 15ರ ಬಳಿಕ ನಡೆಸಲು ಬಿಸಿಸಿಐ ನಿರ್ಧರಿಸಿದೆ. ವೇಳಾಪಟ್ಟಿಯ ಪ್ರಕಾರ ನಡೆಸಲು ಸಿದ್ಧವಾಗಿದ್ದ ಅಂತಾರಾಷ್ಟ್ರೀಯ ಕ್ರಿಕೆಟ್ ಟೂರ್ನಿಗಳೂ ರದ್ದಾಗಿವೆ, ಮುಂದೂಡಲ್ಪಟ್ಟಿವೆ. ಬಹು ನಿರೀಕ್ಷಿತ ಟಿ20 ವಿಶ್ವಕಪ್ ಕೂಡ ರದ್ದಾಗಲಿದೆಯ? ಮುಂದೂಡಲ್ಪಡಲಿದೆಯಾ?
ಗೊಂದಲಕ್ಕೆ ತೆರೆ ಎಳೆದ ಆಸ್ಟ್ರೇಲಿಯಾ
ಪುರುಷರ ಟಿ20 ವಿಶ್ವಕಪ್ ಬಗೆಗೆ ಕ್ರಿಕೆಟ್ ಅಭಿಮಾನಿಗಳಲ್ಲಿದ್ದ ಗೊಂದಲಕ್ಕೆ ಕ್ರಿಕೆಟ್ ಆಸ್ಟ್ರೇಲಿಯಾ ತೆರೆ ಎಳೆದಿದೆ. ಕೊವಿಡ್‌19 ಭೀತಿಯಿದ್ದರೂ ಪುರುಷರ ಟಿ20 ವಿಶ್ವಕಪ್ ಅನ್ನು ಈಗಿನ ವೇಳಾಪಟ್ಟಿಯಂತೆಯೇ ನಡೆಸುವ ಭರವಸೆಯಲ್ಲಿದ್ದೇವೆ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾ ಹೇಳಿದೆ.
ಎಲ್ಲಾ ಕ್ರೀಡಾಸ್ಪರ್ಧೆಗಳೂ ಮತ್ತೆ ಚಾಲೂ
'ಕೆಲವೇ ವಾರಗಳು ಅಥವಾ ತಿಂಗಳುಗಳಲ್ಲಿ ಎಲ್ಲಾ ಕ್ರೀಡಾಸ್ಪರ್ಧೆಗಳು ಮತ್ತೆ ನಡೆಸಲ್ಪಡುತ್ತವೆ ಎಂಬ ಭರವಸೆ ನಮಗಿದೆ. ಇಂಥ ಸಂದರ್ಭದಲ್ಲಿ ಹೀಗೆಂದೇ ಹೇಳೋಕೆ ಇಲ್ಲಿ ನಾವ್ಯಾರೂ ಪ್ರವೀಣರಲ್ಲ. ಆದರೆ ಅಕ್ಟೋಬರ್ ಮತ್ತು ನವೆಂಬರ್ ವೇಳೆಗೆ ಪರಿಸ್ಥಿತಿ ಸಾಮಾನ್ಯ ಸ್ಥಿತಿಗೆ ಮರಳಲಿದೆ ಎಂಬ ವಿಶ್ವಾಸ ನಮ್ಮದು,' ಎಂದು ಕ್ರಿಕೆಟ್ ಆಸ್ಟ್ರೇಲಿಯಾದ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಕೆವಿನ್ ರೋಬರ್ಟ್ಸ್ ಹೇಳಿದ್ದಾರೆ.
ಎಂಸಿಜಿ ಭರ್ತಿಯಾಗಲಿದೆ
ಮಾತು ಮುಂದುವರೆಸಿದ ರೋಬರ್ಟ್ಸ್, 'ಅಕ್ಟೋಬರ್ ವೇಳೆಗೆ ಪರಿಸ್ಥಿತಿ ಸುಧಾರಿಸುವುದರಿಂದ ಆ ವೇಳೆ ಎಣಿಕೆಯಂತೆ ಪುರುಷರ ಟಿ20 ವಿಶ್ವಕಪ್ ನಡೆಯಲಿದೆ. ನವೆಂಬರ್ 15ರ ಹೊತ್ತಿಗೆ ಮೆಲ್ಬರ್ನ್ ಕ್ರಿಕೆಟ್ ಗ್ರೌಂಡ್‌ (ಎಂಸಿಜಿ) ಕ್ರಿಕೆಟ್ ಅಭಿಮಾನಿಗಳಿಂದ ತುಂಬಿರಲಿದೆ,' ಎಂದು ಭರವಸೆ ವ್ಯಕ್ತಪಡಿಸಿದವರು. ಈಗಿನ ವೇಳಾಪಟ್ಟಿಯಂತೆ ಟಿ20 ವಿಶ್ವಕಪ್ ನಡೆದರೆ, ಉದ್ಘಾಟನಾ ಪಂದ್ಯದಲ್ಲಿ ಶ್ರೀಲಂಕಾ-ಐರ್ಲೆಂಡ್ ಸೆಣಸಾಡಲಿದೆ.
