'ಕೊಹ್ಲಿಯದ್ದು ಹೊಲಸು ಬಾಯಿ, ಆತ ಸಚಿನ್, ವಿಲಿಯಮ್ಸನ್ ಮತ್ತು ರೂಟ್ ಹಂತಕ್ಕೆ ಯಾವತ್ತೂ ಬರಲಾರ!'
ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಎರಡನೇ ಟೆಸ್ಟ್ ಪಂದ್ಯ ಮುಗಿದು 2 ದಿನಗಳು ಕಳೆದ ಬಳಿಕ ಪಂದ್ಯದಲ್ಲಿ ನಡೆದ ವಾಕ್ಸಮರಗಳ ಕುರಿತು ಇಂಗ್ಲೆಂಡ್ ತಂಡದ ಮಾಜಿ ಆಟಗಾರ ನಿಕ್ ಕಾಂಪ್ಟನ್ ಮಾತನಾಡಿದ್ದು ಕೊಹ್ಲಿಯದ್ದು ಕೆಟ್ಟ ಬಾಯಿ ಎಂದು ಕಿಡಿಕಾರಿದ್ದಾರೆ. 'ವಿರಾಟ್ ಕೊಹ್ಲಿ ಓರ್ವ ಹೊಲಸು ಬಾಯಿಯ ವ್ಯಕ್ತಿಯಲ್ಲವೇ? 2012ರಲ್ಲಿ ಭಾರತ ಪ್ರವಾಸ ಕೈಗೊಂಡಿದ್ದಾಗ ವಿರಾಟ್ ಕೊಹ್ಲಿ ನನ್ನ ವಿರುದ್ಧ ಬಳಸಿದ ಅವಾಚ್ಯ ಶಬ್ದಗಳನ್ನು ಕೇಳಿ ದಿಗ್ಭ್ರಮೆಗೊಂಡಿದ್ದೆ ಹಾಗೂ ಅದನ್ನು ನನ್ನ ಜೀವನಪೂರ್ತಿ ಮರೆಯುವುದಿಲ್ಲ. ಆದರೆ ಜೋ ರೂಟ್, ಕೇನ್ ವಿಲಿಯಮ್ಸನ್ ಮತ್ತು ಸಚಿನ್ ತೆಂಡೂಲ್ಕರ್ ವಿರಾಟ್ ಕೊಹ್ಲಿ ರೀತಿಯಲ್ಲ ಅವರೆಲ್ಲರೂ ಶಾಂತ ಸ್ವಭಾವದವರು' ಎಂದು ನಿಕ್ ಕಾಂಪ್ಟನ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.ಇನ್ನು ತಮ್ಮ ಟ್ವಿಟ್ಟರ್ ಖಾತೆಯ ಮೂಲಕ ವಿರಾಟ್ ಕೊಹ್ಲಿ ಕುರಿತು ಈ ವಿಷಯವನ್ನು ಟ್ವೀಟ್ ಮಾಡಿದ್ದ ನಿಕ್ ಕಾಂಪ್ಟನ್ ಸದ್ಯ ಆ ಟ್ವೀಟ್ನ್ನು ಡಿಲಿಟ್ ಮಾಡಿದ್ದಾರೆ.
ವಿರಾಟ್ ಕೊಹ್ಲಿಗೆ ಕೋಪ ಸ್ವಭಾವವೇ ಸರಿ ಎಂದಿದ್ದ ಇನ್ಜಮಾಮ್ ಉಲ್ ಹಕ್
ಇಂಗ್ಲೆಂಡ್ ತಂಡದ ಮಾಜಿ ಆಟಗಾರ ನಿಕ್ ಕಾಂಪ್ಟನ್ ವಿರಾಟ್ ಕೊಹ್ಲಿ ಬಾಯಿ ಸರಿಯಿಲ್ಲ ಆತ ಅವಾಚ್ಯ ಶಬ್ಧಗಳನ್ನು ಹೆಚ್ಚಾಗಿ ಬಳಸುತ್ತಾರೆ, ಮೈದಾನದಲ್ಲಿ ಸುಮ್ಮನೆ ಕೂಗುತ್ತಾರೆ ಎಂದು ಆಪಾದನೆ ಮಾಡಿದ್ದಾರೆ. ಆದರೆ ಇದೇ ಪಂದ್ಯದ ನಂತರ ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಇನ್ಜಮಾಮ್ ಉಲ್ ಹಕ್ ಮಾತನಾಡಿ ವಿರಾಟ್ ಕೊಹ್ಲಿ ಯಾವತ್ತೂ ಸಹ ತಮ್ಮ ಕೋಪ ಸ್ವಭಾವವನ್ನು ಬಿಟ್ಟು ಕೊಡಬಾರದು, ಅವರು ಕೋಪ ಸ್ವಭಾವದಿಂದ ಆಡಿದರೆ ಮಾತ್ರ ತಮ್ಮ ಅಸಲಿ ಆಟವನ್ನು ಪ್ರದರ್ಶಿಸುತ್ತಾರೆ. ಹೀಗಾಗಿ ಯಾವಾಗಲೂ ವಿರಾಟ್ ಕೊಹ್ಲಿ ತಮ್ಮದೇ ಶೈಲಿಯಲ್ಲಿ ಆಡಬೇಕು ಎಂದು ಇನ್ಜಮಾಮ್ ಉಲ್ ಹಕ್ ತಮ್ಮ ಪಾಲಿನ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದರು.
ಭಾರತೀಯರನ್ನು ಕೆಣಕಬೇಡಿ ಎಂದಿದ್ದ ಮೈಕಲ್ ವಾನ್!
ಒಂದೆಡೆ ಇಂಗ್ಲೆಂಡ್ ತಂಡದ ಮಾಜಿ ಆಟಗಾರ ನಿಕ್ ಕಾಂಪ್ಟನ್ ವಿರಾಟ್ ಕೊಹ್ಲಿ ವಿರುದ್ಧ ಈ ರೀತಿಯ ಆಪಾದನೆಯನ್ನು ಮಾಡಿದ್ದರೆ ಮತ್ತೊಂದೆಡೆ ಇಂಗ್ಲೆಂಡ್ ಕ್ರಿಕೆಟ್ನ ದಿಗ್ಗಜ ಮಾಜಿ ಆಟಗಾರ ಮೈಕಲ್ ವಾನ್ ಭಾರತೀಯರನ್ನು ಕೆಣಕಬೇಡಿ ಎಂದು ಇಂಗ್ಲೆಂಡ್ ತಂಡದ ಆಟಗಾರರಿಗೆ ಎಚ್ಚರಿಕೆಯನ್ನು ನೀಡಿದ್ದರು. ವಿರಾಟ್ ಕೊಹ್ಲಿ ಹುಡುಗರು ತುಂಬಾ ತುಂಬಾ ಶಕ್ತಿವಂತರು, ಅವರನ್ನು ಕೆಣಕುವ ಅಗತ್ಯವಿಲ್ಲ ಎಂದು ಮೈಕಲ್ ವಾನ್ ಇಂಗ್ಲೆಂಡ್ ಆಟಗಾರರಿಗೆ ಎಚ್ಚರಿಕೆ ನೀಡಿದ್ದರು.