ಕೆಎಲ್ ರಾಹುಲ್ಗೆ ಅವಕಾಶ ಇಲ್ವಾ?
ರಿಷಭ್ ಪಂತ್ ಮತ್ತು ವೃದ್ಧಿಮಾನ್ ಸಾಹ ಇಬ್ಬರು ವಿಕೆಟ್ ಕೀಪರ್ಗಳು ಐಸೊಲೇಶನ್ನಲ್ಲಿರುವುದರಿಂದ ಜುಲೈ 20-22ರ ವರೆಗೆ ನಡೆಯಲಿರುವ ಅಭ್ಯಾಸ ಪಂದ್ಯಕ್ಕೆ ಕೆಎಲ್ ರಾಹುಲ್ ಅವರನ್ನು ಹೆಸರಿಸಲಾಗಿದೆ. ರಾಹುಲ್ ಟೆಸ್ಟ್ ಪಂದ್ಯದಲ್ಲಿ ವಿಕೆಟ್ ಕೀಪಿಂಗ್ ಮಾಡಬಹುದು. ಆದರೆ ರಾಹುಲ್ಗೆ ಟೆಸ್ಟ್ ಕ್ರಿಕೆಟ್ನಲ್ಲಿ ಕೀಪಿಂಗ್ ಮಾಡಿದ ಅನುಭವವಿಲ್ಲ. ಎಲ್ಲದಕ್ಕಿಂತ ಹೆಚ್ಚಾಗಿ ರಾಹುಲ್ 2019ರಿಂದೀಚೆ ಟೆಸ್ಟ್ ಪಂದ್ಯ ಆಡಿಲ್ಲ. ಹೀಗಾಗಿ ರಾಹುಲ್ ಅವರನ್ನು ಆಯ್ಕೆ ಸಮಿತಿ ಪರಿಗಣಿಸುತ್ತಾ ಅನ್ನೋದು ಪ್ರಶ್ನೆಯಾಗಿ ಉಳಿದಿದೆ.
ದಿನೇಶ್ ಕಾರ್ತಿಕ್ಗೆ ಹೆಚ್ಚಿನ ಚಾನ್ಸ್
ಐಸಿಸಿ ವರ್ಲ್ಡ್ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ ಪಂದ್ಯಕ್ಕೆ ಹವಾಮಾನ ವಿಶ್ಲೇಷಕರಾಗಿ ದಿನೇಶ್ ಕಾರ್ತಿಕ್ ಕೂಡ ಇಂಗ್ಲೆಂಡ್ಗೆ ತೆರಳಿದ್ದರು. ಈಗ ಕಾರ್ತಿಕ್ ಇಂಗ್ಲೆಂಡ್ನಲ್ಲೇ ಇದ್ದಾರೆ. ಸದ್ಯ ತಂಡದಲ್ಲಿ ಕೋವಿಡ್ ಭೀತಿ ಕಾಣಿಸಿಕೊಂಡಿರುವುದರಿಂದ ತಂಡದ ಸಕ್ರಿಯ ಆಟಗಾರನಾಗಿರುವ ಕಾರ್ತಿಕ್ ಅವರನ್ನು ಬಳಸಿಕೊಳ್ಳಲು ಟೀಮ್ ಇಂಡಿಯಾಕ್ಕೆ ಅವಕಾಶವಿದೆ. ಇತ್ತೀಚೆಗೆ ರೋಹಿತ್ ಶರ್ಮಾ ಕೂಡ ಸಂವಾದದಲ್ಲಿ ಕಾರ್ತಿಕ್ಗೆ ಇನ್ನೂ ಕ್ರಿಕೆಟ್ನಲ್ಲಿ ಮುಂದುವರೆಯಬಲ್ಲರು ಎಂದಿದ್ದರು. ಮುಖ್ಯವಾಗಿ ನಿದಹಾಸ್ ಟ್ರೋಫಿ ಫೈನಲ್ನಲ್ಲಿ 8 ಎಸೆತಗಳಿಗೆ ಅಜೇಯ 29 ರನ್ ಬಾರಿಸಿ ಭಾರತ ಗೆಲ್ಲಿಸಿದ್ದ ಹೀರೋ ಡಿಕೆ ಮತ್ತೆ ತಂಡಕ್ಕೆ ಆಡುವುದಾದರೆ ಕ್ರಿಕೆಟ್ ಅಭಿಮಾನಿಗಳಿಗೆ ಖುಷಿಯೆ ಅಲ್ಲವೆ?
|
ಟ್ವೀಟ್ ಮಾಡಿದ್ದ ಡಿಕೆ
ಜುಲೈ 15ರಂದು ದಿನೇಶ್ ಕಾರ್ತಿಕ್ ಒಂದು ಟ್ವೀಟ್ ಮಾಡಿದ್ದರು. ಇದರಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಕಿಟ್ ಅನ್ನು ಪೋಸ್ಟ್ ಮಾಡಿದ್ದ ಡಿಕೆ, 'ಸುಮ್ಮನೆ ಹೇಳುತ್ತಿದ್ದೇನೆ' (ಜಸ್ಟ್ ಸೇಯಿಂಗ್) ಎಂದು ಬರೆದುಕೊಂಡಿದ್ದರು. ಈ ಕಿಟ್ ಕೆಕೆಆರ್ಗೆ ಕಾರ್ತಿಕ್ ನಾಯಕರಾಗಿದ್ದಾಗ ಸಿಕ್ಕಿದ್ದು. ಈ ಕಿಟ್ ಅನ್ನು ಟ್ವಿಟರ್ನಲ್ಲಿ ಕಾರ್ತಿಕ್ ಪೋಸ್ಟ್ ಮಾಡಿದ್ದೇಕೆಂದರೆ, ಆಡಲು ಅವಕಾಶ ಸಿಕ್ಕರೆ ನಾನು ಆಡಲು ಸಜ್ಜಾಗಿದ್ದೇನೆ ಅನ್ನೋದನ್ನು ಸೂಚಿಸಲು.
ಕಾರ್ತಿಕ್ ಫಾರ್ಮ್, ಸಾಧನೆ
26 ಟೆಸ್ಟ್ ಪಂದ್ಯಗಳನ್ನಾಡಿರುವ ಡಿಕೆ 25.0ಯ ಸರಾಸರಿಯಲ್ಲಿ 1025 ರನ್ ಗಳಿಸಿದ್ದಾರೆ. ಇದರಲ್ಲಿ 1 ಶತಕ, 7 ಅರ್ಧ ಶತಕಗಳು ಸೇರಿವೆ. ಕಾರ್ತಿಕ್ ಕಡೇಯ ಬಾರಿ ಟೆಸ್ಟ್ ಪಂದ್ಯ ಆಡಿದ್ದು 2018ರಲ್ಲಿ ಇಂಗ್ಲೆಂಡ್ ವಿರುದ್ಧವೆ. ಇದರಲ್ಲಿ ಕಾರ್ತಿಕ್ ಉತ್ತಮ ಬ್ಯಾಟಿಂಗ್ ನೀಡಿರಲಿಲ್ಲ. ಆದರೆ ರಣಜಿ ಕ್ರಿಕೆಟ್ನಲ್ಲಿ ಕಾರ್ತಿಕ್ ತಮಿಳುನಾಡು ತಂಡದ ಪರ ಆಡುತ್ತಿರುವುದರಿಂದ ಮತ್ತು ವಿಕೆಟ್ ಕೀಪಿಂಗ್ನಲ್ಲಿ ಒಳ್ಳೆಯ ಅನುಭವಿ ಆಗಿರುವುದರಿಂದ ಡಿಕೆ ಟೆಸ್ಟ್ ಸರಣಿಯ ವೇಳೆ ಭಾರತೀಯ ಪ್ಲೇಯಿಂಗ್ XIನಲ್ಲಿ ಕಾಣಿಸಿಕೊಳ್ತಾರಾ ಅನ್ನೋದು ಕುತೂಹಲ ಮೂಡಿಸಿದೆ.