ವಿಶ್ವಕಪ್ ತಂಡದಲ್ಲಿ ಕ್ಸೇವಿಯರ್
38ರ ಹರೆಯದ ನಿವೃತ್ತ ಸ್ಪಿನ್ನರ್ ಕ್ಸೇವಿಯರ್ ಡೊಹೆರ್ಟಿ 2015ರಲ್ಲಿ ವಿಶ್ವಕಪ್ ವಿಜೇತ ಆಸ್ಟ್ರೇಲಿಯಾ ತಂಡದಲ್ಲಿದ್ದರು. ಆ ಟೂರ್ನಿಯಲ್ಲಿ ಮೈಕಲ್ ಕ್ಲಾರ್ಕ್ ಆಸೀಸ್ ತಂಡ ಮುನ್ನಡೆಸಿದ್ದರು. ಆವತ್ತು ಫೈನಲ್ನಲ್ಲಿ ಆಸ್ಟ್ರೇಲಿಯಾ ತಂಡ ನ್ಯೂಜಿಲೆಂಡ್ ವಿರುದ್ಧ 7 ವಿಕೆಟ್ ಗೆಲುವನ್ನಾಚರಿಸಿತ್ತು. ಇದೇ ಟೂರ್ನಿಯ ಒಂದು ಪಂದ್ಯದಲ್ಲಿ ಕ್ಸೇವಿಯರ್ 7 ಓವರ್ ಎಸೆದು 60 ರನ್ ನೀಡಿ ಒಂದೇ ಒಂದು ವಿಕೆಟ್ ಪಡೆದಿರಲಿಲ್ಲ. ಹೀಗಾಗಿ ಮುಂದೆ ಕ್ಸೇವಿಯರ್ಗೆ ತಂಡದಲ್ಲಿ ಸ್ಥಾನ ಸಿಗಲಿಲ್ಲ. ಆದರೆ ಕ್ರಿಕೆಟ್ ನಿವೃತ್ತಿ ಬಳಿಕ ಕ್ಸೇವಿಯರ್ ಬದುಕಿಗೆ ಹೊಸ ವೃತ್ತಿ ಕಂಡುಕೊಂಡಿದ್ದಾರೆ.
ಡೊಹೆರ್ಟಿ ವೃತ್ತಿ ಬದುಕಿನ ಸಾಧನೆ
ಆಸ್ಟ್ರೇಲಿಯನ್ ಕ್ರಿಕೆಟರ್ಸ್ ಅಸೋಸಿಯೇಶನ್ (ಎಸಿಎ) ಒಂದು ವಿಡಿಯೋ ಅಪ್ಲೋಡ್ ಮಾಡಿದೆ. ಇದರಲ್ಲಿ ಡೊಹೆರ್ಟಿ ತಾನು ಹೇಗೆ ಈ ಬಡಗಿಯ ವೃತ್ತಿಗೆ ಸೇರಿದೆ, ಈಗ ಹೇಗೆ ಕೆಲಸವನ್ನು ಎಂಜಾಯ್ ಮಾಡುತ್ತಿದ್ದೇನೆ ಎಂದೆಲ್ಲ ಹೇಳಿದ್ದಾರೆ. ಸಂಕಷ್ಟದ ಸಮಯದಲ್ಲಿ ತನ್ನ ನೆರವಿಗೆ ಬಂದ ಎಸಿಎಗೆ ಕ್ಸೇವಿಯರ್ ಧನ್ಯವಾದಗಳನ್ನೂ ಸಲ್ಲಿಸಿದ್ದಾರೆ. 2015ರಲ್ಲಿ ಕಡೇಯ ಬಾರಿ ರಾಷ್ಟ್ರೀಯ ತಂಡಕ್ಕೆ ಆಡಿರುವ ಕ್ಸೇವಿಯರ್, 4 ಟೆಸ್ಟ್ ಪಂದ್ಯಗಳಲ್ಲಿ 7 ವಿಕೆಟ್, 60 ಏಕದಿನ ಪಂದ್ಯಗಳಲ್ಲಿ 55 ವಿಕೆಟ್, 11 ಟಿ20ಐ ಪಂದ್ಯಗಳಲ್ಲಿ 10 ವಿಕೆಟ್ ದಾಖಲೆ ಹೊಂದಿದ್ದಾರೆ.
|
'ಒಂದು ವರ್ಷ ತುಂಬಾ ಪರದಾಡಿದ್ದೆ'
'ನಾನೀಗ ಕಾರ್ಪೆಂಟರ್ ಕೆಲಸದ ಮೂಲಕ ಬದುಕನ್ನು ಕಳೆಯುತ್ತಿದ್ದೇನೆ. ಜಾಗದಲ್ಲಿ ಮನೆಗಳನ್ನು ನಿರ್ಮಿಸೋದು ನನ್ನ ಕೆಲಸ. ನಾನಿದನ್ನು ಸಂಭ್ರಮಿಸುತ್ತಿದ್ದೇನೆ. ಹೊರಾಂಗಣದಲ್ಲಿ ಕೈಗಳಲ್ಲಿ ಕೆಲಸ ಮಾಡುತ್ತ ನಾನು ಹೊಸ ವಿಚಾರಗಳನ್ನು ಕಲಿಯುತ್ತಿದ್ದೇನೆ. ಕ್ರಿಕೆಟ್ಗೆ ಸಂಪೂರ್ಣ ವಿಭಿನ್ನ ಸಂಗತಿಯನ್ನು ನಾನು ಕಲಿಯುತ್ತಿದ್ದೇನೆ. ಕ್ರಿಕೆಟ್ ಮುಗಿಸಿದಾಗ ನನಗೆ ಮುಂದೇನು ಮಾಡಬೇಕೆಂದು ತೋಚಿರಲಿಲ್ಲ. ಆಗ ನಾನು ಸುಮಾರು 12 ತಿಂಗಳ ಕಾಲ ಏನೇನೋ ಕೆಲಸ ಮಾಡಿದೆ. ಲ್ಯಾಂಡ್ಸ್ಕೇಪಿಂಗ್, ಆಫೀಸ್ ಕೆಲಸ, ಕ್ರಿಕೆಟ್ ಕೆಲಸ ಹೀಗೆ ಇಂಥದನ್ನು ಮಾಡಿ ಕೊನೆಗೆ ಕಾರ್ಪೆಂಟರ್ ಕೆಲಸದಲ್ಲಿ ಬದುಕು ಕಂಡುಕೊಂಡೆ,' ಎಂದು ಕ್ಸೇವಿಯರ್ ಹೇಳಿದ್ದಾರೆ.