ನಾನೂ ತಂಡದ ಬಲವಾಗಿ ನಿಲ್ಲಬಲ್ಲೆ
'ವಿರಾಟ್, ಎಬಿಡಿಯಂತೆ ನಾನೂ ತಂಡವನ್ನು ಜಯದತ್ತ ಕೊಂಡೊಯ್ಯಬಲ್ಲೆ. ಅಂಥ ಸಂದರ್ಭಗಳು ಪ್ರತೀಸಾರಿ ಬರಲಾರದು. ಆದರೆ ಕೊಹ್ಲಿ-ಎಬಿಡಿ ಆರ್ಸಿಬಿ ತಂಡಕ್ಕೆ ಬಲವಾಗಿ ನಿಲ್ಲುವಂತೆ ನಾನೂ ನಿಲ್ಲಬಲ್ಲೆ ಎಂದು ಭಾವಿಸಿದ್ದೇನೆ. ಆ ವಿಶ್ವಾಸ ನನಗಿದೆ' ಎಂದು ಇಎಸ್ಪಿಎನ್ ಕ್ರಿಕ್ ಇನ್ಫೋ ಜೊತೆ ಮಾತನಾಡುತ್ತ ಅಲಿ ಹೇಳಿದ್ದಾರೆ.
ಕೊಹ್ಲಿ-ಎಬಿಡಿ ಮೇಲಿನ ಒತ್ತಡ ಇಳಿಸಬೇಕು
'ತಂಡದಲ್ಲಿದ್ದು ಕೊಹ್ಲಿ-ಎಬಿಡಿ ಮೇಲಿನ ಒತ್ತಡವನ್ನು ಕಡಿಮೆಗೊಳಿಸುವುದು ನನ್ನ ಕರ್ತವ್ಯ. ತಂಡದ ಗೆಲುವು ಇಬ್ಬರೇ ಬ್ಯಾಟ್ಸ್ಮನ್ಗಳನ್ನು ಅವಲಂಬಿಸಿದೆ ಎಂದು ನಾವು ಬಿಂಬಿಸುತ್ತಾ ಹೋದಷ್ಟು ಆ ಇಬ್ಬರೂ ಆಟಗಾರರು ಹೆಚ್ಚು ಒತ್ತಡವನ್ನು ಅನುಭವಿಸಬೇಕಾಗುತ್ತದೆ. ತಂಡದ ಗೆಲುವು ಕಠಿಣವಾಗುತ್ತದೆ' ಎಂದು ಮೊಯೀನ್ ವಿವರಿಸಿದರು.
ತಂಡ ಬೆಂಬಲಿಸೋದು ನನ್ನ ಜವಾಬ್ದಾರಿ
ಮಾತು ಮುಂದುವರೆಸಿದ 31ರ ಹರೆಯದ ಇಂಗ್ಲೆಂಡ್ ಕ್ರಿಕೆಟರ್ ಅಲಿ, 'ಬ್ಯಾಟಿಂಗ್ ಸರದಿ ಬಂದಾಗ ಬಂದು ಒಂದಷ್ಟು ರನ್ ಗಳಿಸಿ ತಂಡದ ಗೆಲುವಿನ ಭಾಗವಾಗುವ ಮೂಲಕ ಬ್ಯಾಟಿಂಗ್ ವಿಭಾಗವನ್ನು ಬೆಂಬಲಿಸೋದು ನನ್ನ ಜವಾಬ್ದಾರಿ' ಎಂದರು.
ಈ ಐಪಿಎಲ್ನಲ್ಲಿ ಕೊನೆಯ ಪಂದ್ಯ
ಈ ಬಾರಿಯ ಐಪಿಎಲ್ನಲ್ಲಿ ಆರ್ಸಿಬಿ ಪರ ಅಲಿ ಒಟ್ಟು 216 ರನ್ ಗಳಿಸಿದ್ದಾರೆ. ಏಪ್ರಿಲ್ 24ರ ಬುಧವಾರ ನಡೆಯುವ ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧದ ಪಂದ್ಯ 2019ರ ಐಪಿಎಲ್ನಲ್ಲಿ ಅಲಿಯ ಕೊನೆಯ ಪಂದ್ಯವಾಗಲಿದೆ. ಅನಂತರ ಅಲಿ ವಿಶ್ವಕಪ್ ತಯಾರಿಯ ನಿಮಿತ್ತ ಇಂಗ್ಲೆಂಡ್ಗೆ ತೆರಳಲಿದ್ದಾರೆ.