ಯುವ ಆಟಗಾರರೇ ಹೆಚ್ಚಾಗಿರುವ ತಂಡ ಕಿಂಗ್ಸ್
ಕಿಂಗ್ಸ್ ಇಲವೆನ್ ಪಂಜಾಬ್ ತಂಡದಲ್ಲಿ ಕೂಡ ಯುವ ಆಟಗಾರರೇ ಹೆಚ್ಚಾಗಿ ತುಂಬಿಕೊಂಡಿದ್ದಾರೆ. ಇಂತಾ ಸನ್ನಿವೇಶದಲ್ಲಿ ತಂಡಕ್ಕೆ ಹಿರಿಯ ಆಟಗಾರರ ಅನುಭವಗಳು ಬಹಳ ಮುಖ್ಯವೆನಿಸುತ್ತದೆ. ಹೊಸ ಆಟಗಾರರಿಗೆ ವಿಶ್ವಮಟ್ಟದ ಆಟಗಾರರನ್ನು ಎದುರಿಸಲು ಸಹಾಯ ಮಾಡಲು ಅನುಭವಿಗಳಿಂದ ಸಾಧ್ಯವಿದೆ. ಇದನ್ನು ಅನಿಲ್ ಕುಂಬ್ಳೆ ಕ್ರಿಸ್ ಗೇಲ್ ಅವರಿಂದ ನಿರೀಕ್ಷಿಸುತ್ತಿದ್ದಾರೆ.
"ಮೆಂಟರ್ ಆಗಿ ನೋಡಲು ಬಯಸುತ್ತೇನೆ"
"ಕ್ರಿಸ್ ಆಟಗಾರನಾಗಿ ಪ್ರಮುಖ ಪಾತ್ರವನ್ನು ಹೊಂದಿದ್ದಾರೆ. ಅದರ ಜೊತೆಗೆ ಅವರ ನಾಯಕತ್ವ, ಅವರ ಅನುಭವ ಯುವಕರಿಗೆ ದೊಡ್ಡ ಅಸ್ತ್ರವಾಗಿದೆ. ಕ್ರಿಸ್ ಗೇಲ್ ಅವರನ್ನು ಬ್ಯಾಟ್ಸ್ಮನ್ ಆಗಿ ಮಾತ್ರ ನಾವು ನೋಡುತ್ತಿಲ್ಲ. ಯುವ ಆಟಗಾರರ ಬೆಳವಣಿಗೆಗೆ ಅವರ ನಾಯಕತ್ವ ಗುಣದ ಪಾತ್ರ ಮಹತ್ವ ವಹಿಸುತ್ತದೆ. ಅವರು ಮಾರ್ಗದರ್ಶಕನ ಪಾತ್ರದಲ್ಲಿ ಸಕ್ರಿಯರಾಗಬೇಕೆಂದು ನಾನು ಬಯಸುತ್ತೇನೆ" ಎಂದು ಅನಿಲ್ ಕುಂಬ್ಳೆ ಹೇಳಿದ್ದಾರೆ.
2018ರಿಂದ ಪಂಜಾಬ್ ತಂಡದಲ್ಲಿ ಗೇಲ್
ಐಪಿಎಲ್ನಲ್ಲಿ ಸುದೀರ್ಘ ಕಾಲ ಆರ್ಸಿಬಿ ತಂಡದ ಪ್ರಮುಖ ಆಟಗಾರನಾಗಿದ್ದ ಕ್ರಿಸ್ ಗೇಲ್ 2018ರಲ್ಲಿ ಮೊದಲ ಸುತ್ತಿನಲ್ಲಿ ಅನ್ಸೋಲ್ಡ್ ಆಗಿ ಉಳಿದುಕೊಂಡಿದ್ದರು. ಬಳಿಕ ಕಿಂಗ್ಸ್ ಇಲವೆನ್ ಪಂಜಾಬ್ ತಂಡ ಕ್ರಿಸ್ ಗೇಲ್ ಅವರನ್ನು ಮೂಲ ಬೆಲೆ 2 ಕೋಟಿಗೆ ಖರೀದಿಸಿತ್ತು. 2018ರ ಆವೃತ್ತಿಯಲ್ಲಿ 368 ರನ್ ಗಳಿಸಿದ್ದ ಗೇಲ್ ಕಳೆದ ವರ್ಷದ ಆವೃತ್ತಿಯಲ್ಲಿ 490 ರನ್ ಗಳಿಸಿ ಮಿಂಚಿದ್ದರು. ಈ ಬಾರಿಯೂ ಅದೇ ರೀತಿ ಮಿಂಚು ಹರಸುವ ಯತ್ತಾಹದಲ್ಲಿದ್ದಾರೆ ಕ್ರಿಸ್ ಗೇಲ್.
ಭಾರತೀಯ ಕೋಚ್ಗಳ ಬಗ್ಗೆ ಕುಂಬ್ಳೆ ಅಭಿಪ್ರಾಯ
ಇದೇ ಸಂದರ್ಭದಲ್ಲಿ ಅನಿಲ್ ಕುಂಬ್ಳೆ ಐಪಿಎಲ್ನಲ್ಲಿ ಭಾರತೀಯ ಹಿರಿಯ ಕ್ರಿಕೆಟಿಗರನ್ನು ಕೋಚ್ ಹುದ್ದೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ನೋಡಲು ಬಯಸುತ್ತೇನೆ ಎಂದಿದ್ದಾರೆ. ಐಪಿಎಲ್ನಲ್ಲಿ ಭಾರತೀಯ ಕೋಚ್ಗಳ ಕೊರತೆಯ ಬಗ್ಗೆ ಅವರು ವಿಷಾದವನ್ನು ವ್ಯಕ್ತಪಡಿಸಿದರು. ಎಂಟು ತಂಡಗಳ ಪೈಕಿ ಮುಖ್ಯ ಕೋಚ್ ಆಗಿ ಕರ್ತವ್ಯ ನಿರ್ವಹಿಸುತ್ತಿರುವ ಏಕೈಕ ಭಾರತೀಯ ಅನಿಲ್ ಕುಂಬ್ಳೆ ಆಗಿದ್ದಾರೆ. ಉಳಿದೆಲ್ಲಾ ಪ್ರಾಂಚೈಸುಗಳು ಕೂಡ ವಿದೇಶಿ ಕೋಚ್ಗಳನ್ನೇ ಮುಖ್ಯ ಕೋಚ್ ಸ್ಥಾನದಲ್ಲಿರಿಸಿಕೊಂಡಿದೆ.