ಮುಂಬೈ-ಚೆನ್ನೈ ಕುತೂಹಲಕಾರಿ ಕದನ
ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ ನಡೆಯಲಿರುವ 13ನೇ ಆವೃತ್ತಿಯ ಐಪಿಎಲ್ನ ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್ ಮತ್ತು ಹಾಲಿ ರನ್ನರ್ಸ್ ಚೆನ್ನೈ ಸೂಪರ್ ಕಿಂಗ್ಸ್ ಕಾದಾಡಲಿವೆ. ಐಪಿಎಲ್ ಇತಿಹಾಸದಲ್ಲಿ ಎರಡೂ ಅತ್ಯಂತ ಬಲಿಷ್ಠ ತಂಡಗಳೆ. ಎಂಐ ಒಟ್ಟು 4 ಬಾರಿ ಐಪಿಎಲ್ ಟ್ರೋಫಿ ಗೆದ್ದಿದ್ದರೆ, ಸಿಎಸ್ಕೆ 3 ಬಾರಿ ಚಾಂಪಿಯನ್ಸ್ ಆಗಿ ಮಿನುಗಿದೆ.
ಸಿಎಸ್ಕೆಯಲ್ಲಿ ಗುಣಮಟ್ಟದ ಬೌಲರ್ಗಳು
ಬ್ಯಾಟ್ಸ್ಮನ್ಗಳಿಗೆ ಅತೀ ಸವಾಲಿನ ತಂಡವಾಗಿ ಸಿಎಸ್ಕೆ ಕಾಣಿಸಿಕೊಂಡಿದೆ ಏಕೆಂದರೆ ಸಿಎಸ್ಕೆಯಲ್ಲಿ ಗುಣಮಟ್ಟದ ಬೌಲರ್ಗಳಿದ್ದಾರೆ. ಈಗಿನ ತಂಡದ ಬಗ್ಗೆ ಹೇಳೋದಾದ್ರೆ, ಲುಂಗಿ ಸಾನಿ ಎನ್ಗಿಡಿ, ಡ್ವೇನ್ ಬ್ರಾವೊ, ಇಮ್ರಾನ್ ತಾಹಿರ್, ರವೀಂದ್ರ ಜಡೇಜಾ, ಸ್ಯಾಮ್ ಕರನ್ ಮತ್ತು ದೀಪಕ್ ಚಹಾರ್ ಇಂಥ ಅಪಾಯಕಾರಿ ಬೌಲರ್ಗಳಿದ್ದಾರೆ. ಆಲ್ ರೌಂಡರ್ಗಳೂ ಸಿಎಸ್ಕೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ.
ಕೊಹ್ಲಿ ಹೆಸರಲ್ಲಿ ಹೆಚ್ಚು ರನ್ ದಾಖಲೆ
ಬೌಲಿಂಗ್ನಲ್ಲಿ ಬಲಿಷ್ಠವಾಗಿರುವ ಸಿಎಸ್ಕೆ ವಿರುದ್ಧ ಹೆಚ್ಚು ರನ್ ಗಳಿಸಿದವರಲ್ಲಿ ಸದ್ಯ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಮೊದಲ ಸ್ಥಾನದಲ್ಲಿದ್ದಾರೆ. ಕೊಹ್ಲಿ ಸಿಎಸ್ಕೆ ವಿರುದ್ಧ 747 ರನ್ ಗಳಿಸಿದ್ದಾರೆ. ಆದರೆ ಐಪಿಎಲ್ ಮೊದಲ ಪಂದ್ಯದಲ್ಲೇ ರೋಹಿತ್ ಶರ್ಮಾ ಅವರು ಕೊಹ್ಲಿ ದಾಖಲೆ ಮುರಿಯುವ ಸಾಧ್ಯತೆಯಿದೆ.
ವಿರಾಟ್ ದಾಖಲೆ ಮುರಿಯುತ್ತ ಶರ್ಮಾ ಚಿತ್ತ
ಎಂಐ ನಾಯಕ ರೋಹಿತ್ ಶರ್ಮಾ ಸಿಎಸ್ಕೆ ವಿರುದ್ಧ 27 ಪಂದ್ಯಗಳಲ್ಲಿ 705 ರನ್ ಗಳಿಸಿದ್ದಾರೆ. ಮೊದಲ ಪಂದ್ಯದಲ್ಲಿ ಹಿಟ್ಮ್ಯಾನ್ ರೋಹಿತ್ 43 ರನ್ ಬಾರಿಸಿದರೂ ಕೊಹ್ಲಿ ದಾಖಲೆ ಬದಿಗೆ ಸರಿಯಲಿದೆ. ಬಲಿಷ್ಠ ಸಿಎಸ್ಕೆ ವಿರುದ್ಧ ಅತೀ ಹೆಚ್ಚು ರನ್ ಬಾರಿಸಿದವರಲ್ಲಿ ಮೊದಲ ಸ್ಥಾನ ಶರ್ಮಾಗೆ ಲಭಿಸಲಿದೆ. ಸೆಪ್ಟೆಂಬರ್ 19ರಂದು ಎಂಐ ಪರ ಆರಂಭಿಕರಾಗಿ ರೋಹಿತ್ ಮತ್ತು ಕ್ವಿಂಟನ್ ಡಿ ಕಾಕ್ ಇಳಿಯುತ್ತಿರುವುದರಿಂದ ಇದೇ ಪಂದ್ಯದಲ್ಲಿ ವಿರಾಟ್ ದಾಖಲೆ ಬದಿಗೆ ಸರಿಯುವ ನಿರೀಕ್ಷೆ ಹೆಚ್ಚಿದೆ.