ಭುವಿ ಬದಲು ಪೃಥ್ವಿರಾಜ್
ಎಡಗೈ ವೇಗದ ಬೌಲರ್ ಪೃಥ್ವಿರಾಜ್ ಯಾರ್ರಾ ಅವರ ಸೇರ್ಪಡೆಯನ್ನು ಸನ್ ರೈಸರ್ಸ್ ತಂಡದ ಅಧಿಕೃತ ಟ್ವಿಟ್ಟರ್ ಖಾತೆ ಖಚಿತಪಡಿಸಿದೆ. ಜತೆಗೆ ಭುವನೇಶ್ವರ್ ಕುಮಾರ್ ಅವರ ವೇಗದ ಚೇತರಿಕೆಗೆ ಹಾರೈಸಿದೆ. ಈ ಆವೃತ್ತಿಯ ಉಳಿದ ಪಂದ್ಯಗಳಿಗೆ ಭುವನೇಶ್ವರ್ ಜಾಗದಲ್ಲಿ ಪೃಥ್ವಿರಾಜ್ ಆಡಲಿದ್ದಾರೆ ಎಂದು ಅದು ತಿಳಿಸಿದೆ.
ಎರಡು ಪಂದ್ಯ ಆಡಿದ್ದರು
ಪೃಥ್ವಿ ರಾಜ್ ಯಾರ್ರಾ ಈ ಹಿಂದೆ ಕೋಲ್ಕತಾ ನೈಟ್ ರೈಡರ್ಸ್ ತಂಡದ ಪರ ಆಡಿದ್ದರು. ಆದರೆ ಎರಡು ಪಂದ್ಯದ ಬಳಿಕ ಅವರನ್ನು ಮತ್ತೆ ಆಡಿಸಿರಲಿಲ್ಲ. 2019ರ ಆವೃತ್ತಿಯಲ್ಲಿ ಸನ್ ರೈಸರ್ಸ್ ವಿರುದ್ಧದ ಪಂದ್ಯದಲ್ಲಿ ಪದಾರ್ಪಣೆ ಮಾಡಿದ್ದ ಪೃಥ್ವಿರಾಜ್, 3 ಓವರ್ಗಳಲ್ಲಿ 29 ರನ್ ನೀಡಿ 1 ವಿಕೆಟ್ ಪಡೆದಿದ್ದರು. ಎರಡನೆಯ ಪಂದ್ಯವನ್ನು ರಾಜಸ್ಥಾನ ರಾಯಲ್ಸ್ ತಂಡದ ವಿರುದ್ಧ ಆಡಿದ್ದರು. ಅದರಲ್ಲಿ 2 ಓವರ್ಗಳಲ್ಲಿ 28 ರನ್ ಗಳಿಸಿದ್ದರು. ಅದರ ಬಳಿಕ ಅವರಿಗೆ ಮತ್ತೆ ಅವಕಾಶ ಸಿಕ್ಕಿರಲಿಲ್ಲ.
ಡೆಲ್ಲಿ ವಿರುದ್ಧದ ಆರ್ಸಿಬಿ ಸೋಲಿಗೆ ಕಾರಣ ತಿಳಿಸಿದ ಎಬಿ ಡಿವಿಲಿಯರ್ಸ್
ಪೃಥ್ವಿರಾಜ್ ಸಾಧನೆ
22 ವರ್ಷದ ಪೃಥ್ವಿರಾಜ್, ಆಂಧ್ರಪ್ರದೇಶ ರಣಜಿ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. 11 ಮೊದಲ ದರ್ಜೆ ಪಂದ್ಯಗಳಲ್ಲಿ 39 ವಿಕೆಟ್ಗಳನ್ನು ಪಡೆದಿದ್ದಾರೆ. 11 ಲಿಸ್ಟ್ ಎ ಪಂದ್ಯಗಳಲ್ಲಿ 15 ವಿಕೆಟ್ಗಳನ್ನು ಪಡೆದಿದ್ದಾರೆ. ಹೀಗಾಗಿ ಸ್ಥಳೀಯ ಪ್ರತಿಭೆಗೆ ಅವಕಾಶ ನೀಡಲು ಫ್ರಾಂಚೈಸಿ ಮುಂದಾಗಿದೆ. ಪೃಥ್ವಿ ರಾಜ್ 150 ಕಿಮೀ ವೇಗದಲ್ಲಿ ಚೆಂಡು ಎಸೆಯುವ ಸಾಮರ್ಥ್ಯ ಹೊಂದಿದ್ದಾರೆ.
ಎಸ್ಆರ್ಎಚ್ ವೇಗಿಗಳು
ಸನ್ ರೈಸರ್ಸ್ ಹೈದರಾಬಾದ್ ತಂಡದಲ್ಲಿ ಪ್ರಸ್ತುತ ಅನೇಕ ವೇಗಿಗಳಿದ್ದಾರೆ. ಟಿ. ನಟರಾಜನ್ ಮತ್ತು ಖಲೀಲ್ ಅಹ್ಮದ್ ಅವರ ಜತೆಗೆ ಮೂರನೇ ಎಡಗೈ ವೇಗಿಯಾಗಿ ಪೃಥ್ವಿ ಸೇರ್ಪಡೆಯಾಗಿದ್ದಾರೆ. ಸಂದೀಪ್ ಶರ್ಮಾ, ಬಸಿಲ್ ಥಂಪಿ, ಸಿದ್ಧಾರ್ಥ್ ಕೌಲ್, ಬಿಲ್ಲಿ ಸ್ಟಾನ್ಲೇಕ್ ತಂಡದಲ್ಲಿರುವ ಇತರೆ ವೇಗಿಗಳು.