Click it and Unblock the Notifications
1. ವಿಂಡೀಸ್ ದಿಗ್ಗಜ ಕ್ರಿಸ್ ಗೇಲ್- 30 ಎಸೆತ
ಟಿ20 ಕ್ರಿಕೆಟ್‌ನ ಅತ್ಯಂತ ಸ್ಪೋಟಕ ಆಟಗಾರ ಕ್ರಿಸ್ ಗೇಲ್ ಐಪಿಎಲ್ ಇತಿಹಾಸದ ಸ್ಪೋಟಕ ಶತಕಗಳಿಸಿದ ಪಟ್ಟಿಯಲ್ಲಿ ಪ್ರಥಮ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. 2013ರಲ್ಲಿ ಆರ್‌ಸಿಬಿ ತಂಡದ ಪರವಾಗಿ ಕಣಕ್ಕಿಳಿದಿದ್ದ ಗೇಲ್ ಪುಣೆ ವಾರಿಯರ್ಸ್ ವಿರುದ್ಧ ಕೇವಲ 66 ಎಸೆತಗಳಲ್ಲಿ 175 ರನ್ ಸಿಡಿಸಿದ ದಾಖಲೆ ಸೃಷ್ಟಿಸಿದ್ದಾರೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಗೇಲ್ ತಮ್ಮ ಶತಕವನ್ನು ಸಂಪೂರ್ಣಗೊಳಿಸಲು ತೆಗೆದುಕೊಂಡಿದ್ದು ಕೇವಲ 30 ಎಸೆತಗಳನ್ನು ಮಾತ್ರ. ಈ ಇನ್ನಿಂಗ್ಸ್‌ನಲ್ಲಿ 17 ಸಿಕ್ಸರ್ ಹಾಗೂ 13 ಬೌಡರಿಗಳನ್ನು ಬಾರಿಸಿದ್ದರು ಬ್ಯಾಟಿಂಗ್ ದೈತ್ಯ ಗೇಲ್. ಈ ಪಂದ್ಯದಲ್ಲಿ ಆರ್‌ಸಿಬಿ ಐದು ವಿಕೆಟ್ ಕಳೆದುಕೊಂಡು ಭರ್ಜರಿ 263 ರನ್‌ಗಳನ್ನು ಗಳಿಸಿತ್ತು. 130 ರನ್‌ಗಳ ಬೃಹತ್ ಅಂತರದಿಂದ ಈ ಪಂದ್ಯವನ್ನು ಆರ್‌ಸಿಬಿ ಗೆದ್ದುಕೊಂಡಿತ್ತು.
2. ಯೂಸುಫ್ ಪಠಾಣ್- 37 ಎಸೆತ
2010ರ ಆವೃತ್ತಿಯಲ್ಲಿ ಮುಂಬೈ ಇಂಡಿಯನ್ಸ್ 212/6 ರನ್‌ಗಳ ದೊಡ್ಡ ಗುರಿಯನ್ನು ರಾಜಸ್ಥಾನ ರಾಯಲ್ಸ್‌ಗೆ ನೀಡಿತ್ತು. ಇದನ್ನು ಬೆನ್ನತ್ತಿದ ಆರ್‌ಆರ್ ತಂಡ 9.2 ಓವರ್‌ಗಳಲ್ಲಿ 66/4 ಗಳಿಸಿ ಸೋಲಿನತ್ತ ಮುಖಮಾಡಿತ್ತು. ಆದರೆ ಬಳಿಕ ಕಣಕ್ಕಿಳಿದ ಯುಸೂಫ್ ಪಠಾಣ್ ಮೈದಾನದಲ್ಲಿ ರುದ್ರಾವತಾರ ತಾಳಿದರು. 37 ಎಸೆತಗಳಲ್ಲಿ ಶತಕವನ್ನು ಗಳಿಸಿದ ಯುಸೂಫ್ ಪಠಾಣ್ ತಂಡವನ್ನು ಗೆಲ್ಲಿಸಲು ಕಠಿಣ ಸಾಹಸ ಮಾಡಿದರಾದರೂ ಕೇವಲ 4 ರನ್‌ಗಳ ಅಂತರದಿಂದ ರಾಜಸ್ಥಾನ್ ರಾಯಲ್ಸ್ ಸೋಲು ಕಂಡಿತ್ತು.
3. ಡೇವಿಡ್ ಮಿಲ್ಲರ್- 38 ಎಸೆತ
2013ರ ಐಪಿಎಲ್ ಆವೃತ್ತಿಯಲ್ಲಿ ಕಿಂಗ್ಸ್ XI ಪಂಜಾಬ್ ತಂಡದ ಪರವಾಗಿ ಡೇವಿಡ್ ಮಿಲ್ಲರ್ ಸ್ಪೋಟಕ ಶತಕವನ್ನು ಬಾರಿಸಿ ಮಿಂಚಿದ್ದರು. ಆರ್‌ಸಿಬಿ ತಂಡದ ವಿರುದ್ಧ ನಡೆದ ಪಂದ್ಯದಲ್ಲಿ ಡೇವಿಡ್ ಮಿಲ್ಲರ್ ಕೇವಲ 38 ಎಸೆತಗಳಲ್ಲಿ ಮೂರಂಕಿ ದಾಟಿದ್ದರು. ಮೊದಲು ಬ್ಯಾಟಿಂಗ್ ಮಾಡಿದ್ದ ಆರ್‌ಸಿಬಿ 190 ರನ್‌ಗಳ ಬೃಹತ್ ಗುರಿಯನ್ನು ನೀಡಿತ್ತು. ಇದಕ್ಕೆ ಪ್ರತಿಯಾಗಿ ಪಂಜಾಬ್ ಮೊದಲ 10 ಓವರ್‌ಗಳಲ್ಲಿ 64 ರನ್‌ಗೆ 4 ವಿಕೆಟ್ ಕಳೆದುಕೊಂಡು ಸೋಲಿನ ಭೀತಿಯನ್ನು ಎದುರಿಸಿತ್ತು. ಆದರೆ ಡೇವಿಡ್ ಮಿಲ್ಲರ್ ಬ್ಯಾಟಿಂಗ್‌ಗೆ ಇಳಿದ ನಂತರ ಪಂದ್ಯದ ಪಲಿತಾಂಶವೇ ಬದಲಾಗಿ ಬಿಟ್ಟಿತು. ರಾಜ್‌ಗೋಪಾಲ್ ಸತೀಶ್ ಜೊತೆಗೆ ಸೇರಿಕೊಂಡ ಡೇವಿಡ್ ಮಿಲ್ಲರ್ ಮುಂದಿನ 8 ಓವರ್‌ಗಳಲ್ಲಿ 130 ರನ್ ಸೂರೆಗೈದರು. ಇನ್ನೂ ಎರಡು ಓವರ್‌ಗಳು ಉಳಿದಿರುವಂತೆಯೇ ಕಿಂಗ್ಸ್ ವಿಜಯವನ್ನಾಚರಿಸಿತು.
4. ಆಡಂ ಗಿಲ್‌ಕ್ರಿಸ್ಟ್- 42 ಎಸೆತ
ಐಪಿಎಲ್‌ನ ಆರಂಭಿಕ ಆವೃತ್ತಿಯಲ್ಲಿ ಈ ವೇಗದ ಶತಕವನ್ನು ಸಿಡಿಸಿದ ಸಾಧನೆಯನ್ನು ಆಸ್ಟ್ರೇಲಿಯಾದ ದಿಗ್ಗಜ ಆಟಗಾರ ಗಿಲ್‌ಕ್ರಿಸ್ಟ್ ಮಾಡಿದ್ದಾರೆ. ಡಿವೈ ಪಾಟೀಲ್ ಸ್ಟೇಡಿಯಮ್‌ನಲ್ಲಿ ಮುಂಬೈ ಇಂಡಿಯನ್ಸ್ ಹಾಗೂ ಕಿಂಗ್ಸ್ XI ಪಂಜಾಬ್ ತಂಡಗಳ ನಡುವಿನ ಪಂದ್ಯದಲ್ಲಿ ಮುಂಬೈ ಮೊದಲು ಬ್ಯಾಟಿಂಗ್ ಮಾಡಿ ನಿಗದಿತ 20 ಓವರ್‌ಗಳಲ್ಲಿ ಏಳು ವಿಕೆಟ್ ಕಳೆದುಕೊಂಡು 154 ರನ್‌ಗಳಿಸಿತ್ತು. ಇದನ್ನು ಬೆನ್ನತ್ತಿದ ಪಂಜಾಬ್ ಗಿಲ್‌ಕ್ರಿಸ್ಟ್ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. 42 ಎಸೆತಗಳಲ್ಲಿ ಗಿಲ್‌ಕ್ರಿಸ್ ಶತಕವನ್ನು ಬಾರಿಸಿದರು. 10 ಸಿಕ್ಸರ್ ಹಾಗೂ 9 ಬೌಂಡರಿ ಸಿಡಿಸಿ 12 ಓವರ್‌ಗಳಲ್ಲಿ 10 ವಿಕೆಟ್‌ಗಳ ಗೆಲುವು ದಾಖಲಾಗಲು ಕಾರಣರಾದರು. ಆರಂಭಿಕರಾಗಿ ಇನ್ನೊಂದು ತುದಿಯಲ್ಲಿ ಸಾಥ್ ನೀಡಿದ ವಿವಿಎಸ್ ಲಕ್ಷ್ಮಣ್ 26 ಎಸೆತಗಳಲ್ಲಿ ಅಜೇಯ 37 ರನ್ ಗಳಿಸಿದ್ದರು.
5. ಎಬಿ ಡಿವಿಲಿಯರ್ಸ್- 43 ಎಸೆತ
ಗುಜರಾತ್ ಲಯನ್ಸ್ ತಂಡದ ವಿರುದ್ಧ ಆರ್‌ಸಿಬಿ ತಂಡದ ಬ್ಯಾಟಿಂಗ್ ದಿಗ್ಗಜರಾದ ವಿರಾಟ್ ಕೊಹ್ಲಿ ಹಾಗೂ ಎಬಿ ಡಿವಿಲಿಯರ್ಸ್ ಶತಕಗಳ ನೆರವಿನಿಂದ ಆರ್‌ಸಿಬಿ 248/3 ರನ್ ಗಳಿಸಿತ್ತು. ಎಬಿಡಿ ಈ ಪಂದ್ಯದಲ್ಲಿ 52 ಎಸತಗಳಲ್ಲಿ 129 ರನ್ ಚಚ್ಚಿದ್ದರು. ಈ ಸ್ಪೋಟಕ ಇನ್ನಿಂಗ್ಸ್‌ನಲ್ಲಿ 12 ಸಿಕ್ಸರ್ ಹಾಗೂ 10 ಬೌಂಡರಿ ಸೇರಿತ್ತು. ಈ ಪಂದ್ಯದಲ್ಲಿ ನೂರು ರನ್‌ಗಳ ಗಡಿ ದಾಟಲು ಎಬಿಡಿ ತೆಗೆದುಕೊಂಡಿದ್ದು 43 ಎಸೆತಗಳನ್ನು ಮಾತ್ರ. 248.07ರ ಸ್ಟ್ರೈಕ್‌ರೇಟ್‌ನಲ್ಲಿ ಎಬಿಡಿ ಬ್ಯಾಟ್ ಬೀಸಿದ್ದರು. ಆರ್‌ಸಿಬಿ ನಾಯಕ ವಿರಾಟ್ ಕೊಹ್ಲಿ ಈ ಪಂದ್ಯದಲ್ಲಿ ಐವತ್ತೈದು ಎಸೆತದಲ್ಲಿ 109 ರನ್ ಗಳಿಸಿ ಬೃಹತ್ ಮೊತ್ತಕ್ಕೆ ಕಾರಣರಾದರು.
