ಐಪಿಎಲ್ ಯಾವಾಗ ಆರಂಭ?
ದ್ವಿತೀಯ ಹಂತದ ಐಪಿಎಲ್ ಪಂದ್ಯಗಳು ಯುಎಇಯಲ್ಲಿ ಸೆಪ್ಟೆಂಬರ್ 19ರಿಂದ ಆರಂಭಗೊಳ್ಳಲಿವೆ. ನಡೆಯಲಿರುವ 31 ಪಂದ್ಯಗಳಲ್ಲಿ 13 ಪಂದ್ಯಗಳು ದುಬೈ ಇಂಟರ್ ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆಯಲಿವೆ. ಮೊದಲ ಕ್ವಾಲಿಫೈಯರ್ ಮತ್ತು ಫೈನಲ್ ಪಂದ್ಯಗಳು ಇದೇ ಸ್ಟೇಡಿಯಂನಲ್ಲಿ ನಡೆಯಲಿವೆ. ಶಾರ್ಜಾ ಸ್ಟೇಡಿಯಂನಲ್ಲಿ 10 ಪಂದ್ಯಗಳು ನಡೆಯಲಿವೆ. ಇದರಲ್ಲಿ ದ್ವಿತೀಯ ಕ್ವಾಲಿಫೈಯರ್ ಮತ್ತು ಎಲಿಮಿನೇಟರ್ ಪಂದ್ಯ ಸೇರಿದೆ.
ಡಬಲ್ ಹೆಡರ್ ಪಂದ್ಯಗಳೆಷ್ಟು?
ಐಪಿಎಲ್ ದ್ವಿತೀಯ ಹಂತದ ಪಂದ್ಯಗಳ ವೇಳೆ ಒಟ್ಟು 7 ಡಬಲ್ ಹೆಡ್ಡರ್ ಪಂದ್ಯಗಳು ನಡೆಯಲಿವೆ. ಮೊದಲ ಡಬಲ್ ಹೆಡ್ಡರ್ ಪಂದ್ಯ ಸೆಪ್ಟೆಂಬರ್ 25ರಂದು ನಡೆಯಲಿದೆ. ಕಳೆದ ಸೀಸನ್ನಂತೆ ಡಬಲ್ ಹೆಡ್ಡರ್ ವೇಳೆ ಮೊದಲ ಪಂದ್ಯ ಭಾರತೀಯ ಕಾಲಮಾನ 3:30 PMಕ್ಕೆ (14:00 ಯುಎಇ ಸಮಯ) ನಡೆದರೆ, ಎರಡನೇ ಪಂದ್ಯ 7:30 PMಗೆ (18:00) ಶುರುವಾಗಲಿದೆ.
ಡೆಲ್ಲಿಗೆ 3 ಮಧ್ಯಾಹ್ನದ ಪಂದ್ಯ
ಡಬಲ್ ಹೆಡ್ಡರ್ ವೇಳೆ ಎಲ್ಲಾ ತಂಡಗಳಿಗೂ ಕನಿಷ್ಠ ಒಂದು ಪಂದ್ಯ ಮಧ್ಯಾಹ್ನ ಸಿಗಲಿದೆ. ಇದರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ 3 ಮಧ್ಯಾಹ್ನದ ಪಂದ್ಯಗಳನ್ನಾಡಿದರೆ, ಚೆನ್ನೈ ಸೂಪರ್ ಕಿಂಗ್ಸ್, ಮುಂಬೈ ಇಂಡಿಯನ್ಸ್, ಕೋಲ್ಕತ್ತಾ ನೈಟ್ ರೈಡರ್ಸ್ ಮತ್ತು ಪಂಜಾಬ್ ಕಿಂಗ್ಸ್ ಎರಡೆರಡು ಮಧ್ಯಾಹ್ನದ ಪಂದ್ಯಗಳನ್ನಾಡಲಿವೆ.
ಸಿಎಸ್ಕೆ-ಎಂಐ ಮುಖಾಮುಖಿ
ಐಪಿಎಲ್ ದ್ವಿತೀಯ ಹಂತದಲ್ಲಿ ಮೊದಲ ಪಂದ್ಯವಾಗಿ ಹಾಲಿ ಚಾಂಪಿಯನ್ಸ್ ಮುಂಬೈ ಇಂಡಿಯನ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಮುಖಾಮುಖಿಯಾಗಲಿವೆ. ಈವರೆಗೆ ಆಡಿರುವ ಪಂದ್ಯಗಳಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮತ್ತು ಪಂಜಾಬ್ ಕಿಂಗ್ಸ್ ತಂಡಗಳು 8 ಪಂದ್ಯಗಳನ್ನಾಡಿವೆ. ಉಳಿದ ಎಲ್ಲಾ ತಂಡಗಳೂ ತಲಾ 7 ಪಂದ್ಯಗಳನ್ನಾಡಿವೆ. ಸದ್ಯದ ಪಾಯಿಂಟ್ಸ್ ಟೇಬಲ್ನಲ್ಲಿ ಡೆಲ್ಲಿ ತಂಡ ಮೊದಲ ಸ್ಥಾನದಲ್ಲಿದೆ. ಚೆನ್ನೈ ಸೂಪರ್ ಕಿಂಗ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಅನಂತರದ ಸ್ಥಾನಗಳಲ್ಲಿವೆ.