Click it and Unblock the Notifications
ಐಪಿಎಲ್ ಪಂದ್ಯಗಳು ನಡೆಯೋದೆಲ್ಲಿ?
ಈ ಬಾರಿಯ ಐಪಿಎಲ್ ಭಾರತದಲ್ಲಿ ನಡೆಯೋದಾದ್ರೆ ಎಲ್ಲಿ ನಡೆಯುತ್ತವೆ? ಐಪಿಎಲ್‌ನ ಲೀಗ್ ಹಂತದ ಎಲ್ಲಾ ಪಂದ್ಯಗಳು ಮುಂಬೈಯ ಮೂರು ತಾಣಗಳಲ್ಲಿ ಮತ್ತು ನಾಕೌಟ್ ಹಂತದ ಪಂದ್ಯಗಳು ಅಹ್ಮದಾಬಾದ್‌ನ ಮೊಟೆರಾ ಸ್ಟೇಡಿಯಂನಲ್ಲಿ ನಡೆಯಲಿವೆ ಎಂದು ಐಪಿಎಲ್ ಫ್ರಾಂಚೈಸಿ ಮೂಲವೊಂದು ತಿಳಿಸಿದೆ. ಆದರೆ ಈ ಬಗ್ಗೆ ಅಂತಿಮ ನಿರ್ಧಾರ ಪ್ರಕಟಗೊಂಡಿಲ್ಲ.
ಐಪಿಎಲ್ ನಿಲ್ಲಿಸುವ ಬೆದರಿಕೆ!
ಹೈದರಾಬಾದ್‌ನ ಖೈರತ್‌ಬಾದ್‌ನಲ್ಲಿರುವ ಟಿಆರ್ಎಸ್ ಎಂಎಲ್‌ಎ ದನಮ್ ನಾಗೇಂದರ್ ಅವರು ಹೈದರಾಬಾದ್‌ನಲ್ಲಿ ಐಪಿಎಲ್ ಪಂದ್ಯಗಳನ್ನು ನಿಲ್ಲಿಸುವ ಬೆದರಿಕೆಯೊಡ್ಡಿದ್ದಾರೆ. 2021ರ ಆಟಗಾರರ ಹರಾಜಿನ ವೇಳೆ ಸ್ಥಳೀಯ ಆಟಗಾರರನ್ನು ಹೈದರಾಬಾದ್ ಫ್ರಾಂಚೈಸಿ ಆರಿಸಿಲ್ಲ ಎಂಬ ಕಾರಣಕ್ಕಾಗಿ ಹೈದರಾಬಾದ್‌ನಲ್ಲಿ ಪಂದ್ಯ ನಡೆಯಲು ಬಿಡುವುದಿಲ್ಲ ಎಂದು ನಾಗೇಂದರ್ ಬೆದರಿಕೆಯೊಡ್ಡಿದ್ದಾರೆ.
'ಒಬ್ಬನೇ ಒಬ್ಬ ಆಟಗಾರನಿಲ್ಲ'
ಶನಿವಾರ ಫಿಲ್ಮ್‌ನಗರಲ್ಲಿ ನಡೆದ ಟಿಆರ್ಎಸ್ ಸದಸ್ಯತ್ವ ಸಭೆಯಲ್ಲಿ ಮಾತನಾಡಿದ ದನಮ್ ನಾಗೇಂದರ್, 'ಬೇರೆ ತಂಡಗಳನ್ನು ಗಮನಿಸಿದರೆ ಪ್ರತೀ ತಂಡದಲ್ಲೂ ಅವರ ಸ್ಥಳೀಯ ಆಟಗಾರರಿದ್ದಾರೆ. ಆದರೆ ಜಾಗತಿಕವಾಗಿ ಮೆಚ್ಚುಗೆಗೆ ಪಾತ್ರವಾಗಿರುವ ಹೈದರಾಬಾದ್‌ನಲ್ಲಿ ಸಾಕಷ್ಟು ಪ್ರತಿಭಾನ್ವಿತ ಆಟಗಾರರಿದ್ದರೂ ಸನ್ ರೈಸರ್ಸ್ ಹೈದರಾಬಾದ್ ತಂಡದಲ್ಲಿ ಒಬ್ಬನೇ ಒಬ್ಬ ಸ್ಥಳೀಯ ಆಟಗಾರನಿಲ್ಲ' ಎಂದು ದೂರಿದ್ದಾರೆ.
ವಾರ್ನರ್‌ಗೆ ನಾಯಕತ್ವ ಬೇಡ
ಮಾತು ಮುಂದುವರೆಸಿದ ನಾಗೇಂದರ್, 'ಮೊಹಮ್ಮದ್ ಸಿರಾಜ್ ಒಬ್ಬರೇ ಅಲ್ಲ, ರಣಜಿ ಟ್ರೋಫಿ, ಅಂಡರ್ 19ನಲ್ಲಿ ಆಡಿದ ಸಾಕಷ್ಟು ಆಟಗಾರರು ಇಲ್ಲಿದ್ದಾರೆ. ಅವರನ್ನೆಲ್ಲ ಸನ್ ರೈಸರ್ಸ್ ಹೈದರಾಬಾದ್ ಪ್ರೋತ್ಸಾಹಿಸಬೇಕು. ಚೆಂಡು ವಿರೂಪ ಪ್ರಕರಣದಲ್ಲಿ ಪಾಲ್ಗೊಂಡ ಡೇವಿಡ್ ವಾರ್ನರ್ ಹೈದರಾಬಾದ್ ತಂಡದ ನಾಯಕರಾಗಿದ್ದಾರೆ. ಅವರು ಹೈದರಾಬಾದ್ ನಾಯಕರಾಗಿರುದನ್ನು ನಾವು ವಿರೋಧಿಸುತ್ತೇವೆ,' ಎಂದೂ ಹೇಳಿದ್ದಾರೆ.
