2 ನೂತನ ತಂಡಗಳಿಗೆ ಸೂಚಿಸಲಾಗಿರುವ 6 ನಗರಗಳ ಕಿರುಪಟ್ಟಿ
ಮುಂದಿನ ವರ್ಷದ ಇಂಡಿಯನ್ ಪ್ರಿಮಿಯರ್ ಲೀಗ್ ಟೂರ್ನಿಯಲ್ಲಿ ಒಟ್ಟು 10 ತಂಡಗಳು ಕಣಕ್ಕಿಳಿಯಲಿದ್ದು ಈಗಿರುವ 8 ತಂಡಗಳ ಜತೆಗೆ ಮತ್ತೆರಡು ಹೊಸ ತಂಡಗಳು ಸೇರ್ಪಡೆಯಾಗಲಿವೆ. ಹೀಗೆ ನೂತನವಾಗಿ ಸೇರ್ಪಡೆಯಾಗಿರುವ 2 ತಂಡಗಳಿಗೆ ಈ ಕೆಳಕಂಡ ಒಟ್ಟು 6 ನಗರಗಳನ್ನು ಸೂಚಿಸಿ ಬಿಸಿಸಿಐ ಕಿರು ಪಟ್ಟಿಯಲ್ಲಿ ಸೇರಿಸಿದೆ.
1. ಗುವಾಹಟಿ
2. ರಾಂಚಿ
3. ಕಟಕ್
4. ಅಹ್ಮದಾಬಾದ್
5. ಲಕ್ನೋ
6. ಧರ್ಮಶಾಲಾ
ಹಿಂದಿ ಮಾತನಾಡುವ ವಲಯಗಳಿಗೆ ಹೆಚ್ಚಿನ ಪ್ರಾಶಸ್ತ್ಯ ನೀಡಿದ ಬಿಸಿಸಿಐ
ಮುಂದಿನ ವರ್ಷ ಸೇರ್ಪಡೆಯಾಗಲಿರುವ 2 ಹೊಸ ತಂಡಗಳು ಹೆಚ್ಚು ಹಿಂದಿ ಭಾಷೆಯನ್ನು ಮಾತನಾಡುವ ಜನರು ಇರುವಂತಹ ನಗರಗಳಾಗಿರಬೇಕು ಎಂದು ಬಿಸಿಸಿಐ ತೀರ್ಮಾನಿಸಿದೆ. ಇತ್ತೀಚೆಗಷ್ಟೇ ಸೋನಿ ಪಿಕ್ಚರ್ಸ್ ನೆಟ್ವರ್ಕ್ನ ಸೋನಿ ಟೆನ್ 3 ಹಿಂದಿ ಚಾನೆಲ್ ದೇಶದ ನಂ.1 ಸ್ಪೋರ್ಟ್ಸ್ ಚಾನಲ್ ಆಗಿ ಹೊರಹೊಮ್ಮಿದೆ. ಹಿಂದಿ ಭಾಷೆಯ ಚಾನೆಲ್ ಆಗಿರುವ ಸೋನಿ ಟೆನ್ 3 ಸ್ಪೋರ್ಟ್ಸ್ ಚಾನೆಲ್ ಶೇ. 50. 7 ವೀಕ್ಷಣೆಯನ್ನು ಪಡೆದುಕೊಂಡಿದ್ದು ವ್ಯವಹಾರದ ದೃಷ್ಟಿಯಿಂದ ಚಿಂತನೆ ನಡೆಸಿರುವ ಬಿಸಿಸಿಐ ಹಿಂದಿ ಮಾತನಾಡುವ ನಗರಗಳಿಗೆ ಹೆಚ್ಚಿನ ಪ್ರಾಶಸ್ತ್ಯವನ್ನು ನೀಡಿದೆ.
ಹಾಗೂ ದಕ್ಷಿಣ ಭಾರತದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಸನ್ ರೈಸರ್ಸ್ ಹೈದರಾಬಾದ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳಿದ್ದು ಬಹುತೇಕ ದಕ್ಷಿಣ ಭಾರತದ ಕ್ರೀಡಾಭಿಮಾನಿಗಳು ಈ ತಂಡಗಳನ್ನೇ ಬೆಂಬಲಿಸುತ್ತಿದ್ದು ಮತ್ತೊಂದು ತಂಡ ರಚಿಸುವ ಅವಶ್ಯಕತೆಯಿಲ್ಲ ಎಂಬ ಚಿಂತನೆಯನ್ನು ಸಹ ಬಿಸಿಸಿಐ ನಡೆಸಿದೆ.
ಹೊಸ ತಂಡಗಳ ಮೂಲಬೆಲೆ 2000 ಕೋಟಿ!
ವಿಶ್ವದ ಅತ್ಯಂತ ಶ್ರೀಮಂತ ಕ್ರಿಕೆಟ್ ಪ್ರೀಮಿಯರ್ ಲೀಗ್ ಆಗಿರುವ ಇಂಡಿಯನ್ ಪ್ರಿಮಿಯರ್ ಲೀಗ್ ಟೂರ್ನಿಗೆ ಮುಂದಿನ ವರ್ಷ ಹೊಸದಾಗಿ ಸೇರ್ಪಡೆಯಾಗಲಿರುವ 2 ತಂಡಗಳಿಗೆ ಮೂಲಬೆಲೆಯನ್ನಾಗಿ ತಲಾ 2000 ಕೋಟಿ ರೂಪಾಯಿಗಳನ್ನು ನಿಗದಿಪಡಿಸಲಾಗಿದೆ. ಅಷ್ಟೇ ಅಲ್ಲದೆ ಇದರಿಂದ ಬಿಸಿಸಿಐಗೆ ಬರೋಬ್ಬರಿ 5000 ಕೋಟಿ ರೂಪಾಯಿ ಲಾಭ ಬರುವ ನಿರೀಕ್ಷೆ ಇದೆ.