3 ಕೋಟಿ ಕಡಿಮೆ ಮೊತ್ತಕ್ಕೆ ರಿಟೈನ್ ಆದ ಎಂ ಎಸ್ ಧೋನಿ
ಈ ಬಾರಿ ನಡೆದ ರಿಟೆನ್ಷನ್ ಪ್ರಕ್ರಿಯೆಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿ ತಮ್ಮ ತಂಡದ ನಾಯಕ ಎಂಎಸ್ ಧೋನಿಗೆ 12 ಕೋಟಿ ಸಂಭಾವನೆಯನ್ನು ನೀಡುವುದರ ಮೂಲಕ ರಿಟೈನ್ ಮಾಡಿಕೊಂಡಿದೆ. ಈ ಮೂಲಕ ಎಂಎಸ್ ಧೋನಿ 5 ವರ್ಷಗಳ ಬಳಿಕ 15 ಕೋಟಿಗಿಂತ ಕಡಿಮೆ ಮೊತ್ತದ ಸಂಭಾವನೆಯನ್ನು ಪಡೆಯುತ್ತಿದ್ದಾರೆ. ಹೌದು, 2018, 2019, 2020 ಮತ್ತು 2021ನೇ ಸಾಲಿನ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಗಳಲ್ಲಿ ಎಂಎಸ್ ಧೋನಿ 15 ಕೋಟಿ ಸಂಭಾವನೆಯನ್ನು ಪಡೆದಿದ್ದರು. ಆದರೆ ಈ ಬಾರಿ ಎಂ ಎಸ್ ಧೋನಿ 12 ಕೋಟಿಗೆ ರಿಟೇನ್ ಆಗಿದ್ದು ಮಾತ್ರವಲ್ಲದೆ ತಂಡದ ಆದ್ಯತೆಯ ಎರಡನೇ ಆಟಗಾರನಾಗಿ ರಿಟೇನ್ ಆಗಿರುವುದು ಅಚ್ಚರಿ ಮೂಡಿಸಿದೆ.
ರವೀಂದ್ರ ಜಡೇಜಾಗೋಸ್ಕರ ಕಡಿಮೆ ಮೊತ್ತ ಪಡೆದ ಎಂ ಎಸ್ ಧೋನಿ
ಚೆನ್ನೈ ಸೂಪರ್ ಕಿಂಗ್ಸ್ ಈ ಬಾರಿಯ ರಿಟೆನ್ಷನ್ ಪ್ರಕ್ರಿಯೆಯಲ್ಲಿ ರವೀಂದ್ರ ಜಡೇಜಾಗೆ 15 ಕೋಟಿ, ಎಂ ಎಸ್ ಧೋನಿಗೆ 12 ಕೋಟಿ, ಮೊಯಿನ್ ಅಲಿಗೆ 8 ಕೋಟಿ ಮತ್ತು ರುತುರಾಜ್ ಗಾಯಕ್ವಾಡ್ಗೆ 6 ಕೋಟಿ ನೀಡಿ ತಂಡದಲ್ಲಿಯೇ ಉಳಿಸಿಕೊಂಡಿದೆ. ಹೀಗೆ ಎಂಎಸ್ ಧೋನಿಗಿಂತ ರವೀಂದ್ರ ಜಡೇಜಾಗೆ ಹೆಚ್ಚಿನ ಆದ್ಯತೆ ಮತ್ತು ಮೊತ್ತ ಸಿಕ್ಕಿದ್ದು, ಇದರ ಹಿಂದಿನ ಕಾರಣವನ್ನು ತಂಡದ ಬೌಲಿಂಗ್ ಕೋಚ್ ಲಕ್ಷ್ಮಿಪತಿ ಬಾಲಾಜಿ ಬಿಚ್ಚಿಟ್ಟಿದ್ದಾರೆ. ಎಂಎಸ್ ಧೋನಿ ಅವರೇ ರವೀಂದ್ರ ಜಡೇಜಾಗೆ ರಿಟೆನ್ಷನ್ ಪ್ರಕ್ರಿಯೆಯಲ್ಲಿ ಪ್ರಥಮ ಸ್ಥಾನವನ್ನು ಬಿಟ್ಟುಕೊಟ್ಟರು, ಓರ್ವ ನಾಯಕನಾಗಿ ತಂಡಕ್ಕೆ ಏನು ಬೇಕಿದೆ ಎಂಬುದು ಧೋನಿಯವರಿಗೆ ಚೆನ್ನಾಗಿ ತಿಳಿದಿದೆ ಎಂದು ಲಕ್ಷ್ಮೀಪತಿ ಬಾಲಾಜಿ ತಿಳಿಸಿದರು.
ಚೆನ್ನೈನಲ್ಲಿಯೇ ತನ್ನ ಕೊನೆಯ ಐಪಿಎಲ್ ಪಂದ್ಯವನ್ನು ಆಡುವ ಆಸೆ ವ್ಯಕ್ತಪಡಿಸಿದ್ದ ಧೋನಿ
ಈ ಬಾರಿಯ ಐಪಿಎಲ್ ಟೂರ್ನಿಯಲ್ಲಿ ಚಾಂಪಿಯನ್ಸ್ ಆಗಿ ಹೊರಹೊಮ್ಮಿದ ನಂತರ ಸಂಭ್ರಮಾಚರಣೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಎಂ ಎಸ್ ಧೋನಿ ತನ್ನ ಕೊನೆಯ ಐಪಿಎಲ್ ಪಂದ್ಯವನ್ನು ಚೆನ್ನೈನ ಚೆಪಾಕ್ ಕ್ರೀಡಾಂಗಣದಲ್ಲಿ ಆಡುವ ಆಸೆಯನ್ನು ವ್ಯಕ್ತಪಡಿಸಿದ್ದರು. ಈ ಮೂಲಕ ತಮ್ಮ ಮತ್ತು ತಮ್ಮ ನೆಚ್ಚಿನ ಫ್ರಾಂಚೈಸಿ ಚೆನ್ನೈ ಸೂಪರ್ ಕಿಂಗ್ಸ್ ನಡುವೆ ಇರುವ ಉತ್ತಮ ಸಂಬಂಧವನ್ನು ಎಂಎಸ್ ಧೋನಿ ಮತ್ತೊಮ್ಮೆ ಬಹಿರಂಗಪಡಿಸಿದ್ದರು.