1. ಕ್ವಿಂಟನ್ ಡಿ ಕಾಕ್
2019ರ ಐಪಿಎಲ್ ಆವೃತ್ತಿಯಿಂದ ಮುಂಬೈ ಇಂಡಿಯನ್ಸ್ ತಂಡದ ಪರ ಸ್ಟಾರ್ ಆಟಗಾರನಾಗಿ ಮಿಂಚುತ್ತಿರುವ ಕ್ವಿಂಟನ್ ಡಿ ಕಾಕ್ 2018ರ ಐಪಿಎಲ್ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಿಂದ ಕಡೆಗಣಿಸಲ್ಪಟ್ಟಿದ್ದರು. ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಸಾಲು ಸಾಲು ಅವಕಾಶಗಳು ಸಿಕ್ಕ ಕಾರಣ ಕ್ವಿಂಟನ್ ಡಿ ಕಾಕ್ ಭರ್ಜರಿ ರನ್ ಗಳಿಸಿದರು. ಆದರೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿದ್ದಾಗ ಉತ್ತಮ ಆಟವನ್ನಾಡಿದರೂ ಕ್ವಿಂಟನ್ ಡಿ ಕಾಕ್ ಬದಲು ಪಾರ್ಥಿವ್ ಪಟೇಲ್ಗೆ ಅವಕಾಶ ನೀಡುವುದರ ಮೂಲಕ ಡಿಕಾಕ್ ಕಡೆಗಣಿಸಲ್ಪಟ್ಟಿದ್ದರು.
2. ನಾಥನ್ ಕೌಲ್ಟರ್ ನೈಲ್
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಬೌಲರ್ಗಳ ಆಯ್ಕೆ ವಿಚಾರದಲ್ಲಿ ಪದೇ ಪದೇ ಎಡವುತ್ತಲೇ ಇತ್ತು. ಪ್ರತಿ ಹರಾಜಿನಲ್ಲಿಯೂ ಹೊಚ್ಚ ಹೊಸ ಬೌಲರ್ಗಳನ್ನು ಖರೀದಿಸುತ್ತಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಹಲವಾರು ಬಾರಿ ಆ ಬೌಲರ್ಗಳಿಗೆ ಅವಕಾಶ ನೀಡದೆ ಕಡೆಗಣಿಸಿದ್ದುಂಟು. 2018ರ ಐಪಿಎಲ್ ಆವೃತ್ತಿಯಲ್ಲಿ ನಾಥನ್ ಕೌಲ್ಟರ್ ನೈಲ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪಾಲಾಗಿದ್ದರು. ಈ ಹಿಂದೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕೊಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ 49 ರನ್ಗಳಿಗೆ ಆಲ್ಔಟ್ ಆಗಿದ್ದಾಗ ಇದೇ ಕೌಲ್ಟರ್ ನೈಲ್ ಕೊಲ್ಕತ್ತಾ ತಂಡದ ಬೌಲರ್ ಆಗಿದ್ದರು. ಅಂತಹ ಉತ್ತಮ ಬೌಲರ್ನ್ನು ಖರೀದಿಸಿದರೂ ಸಹ ಒಂದೇ ಒಂದು ಪಂದ್ಯದಲ್ಲಿಯೂ ಅವಕಾಶ ನೀಡದೇ ಇದ್ದದ್ದು ನಿಜಕ್ಕೂ ಆಶ್ಚರ್ಯಕರ ನಿಲುವಾಗಿತ್ತು.
3. ಕೆಎಲ್ ರಾಹುಲ್
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಕನ್ನಡಿಗರೇ ಇಲ್ಲ, ಇದ್ದ ಕನ್ನಡಿಗರನ್ನು ಬೆಂಗಳೂರು ತಂಡ ಬಿಟ್ಟುಕೊಟ್ಟಿದೆ ಎಂಬ ಕೂಗು ಆಗಾಗ ಕೇಳಿಬರುತ್ತಿತ್ತು. ಈ ರೀತಿಯ ಕೂಗು ಕೇಳಿ ಬರಲು ಕಾರಣರಾದ ಕನ್ನಡಿಗರ ಪೈಕಿ ಕೆಎಲ್ ರಾಹುಲ್ ಕೂಡ ಒಬ್ಬರು. 2016ರ ಐಪಿಎಲ್ ಆವೃತ್ತಿಯಲ್ಲಿ ಬೆಂಗಳೂರು ಪರ ರಾಹುಲ್ 397 ರನ್ ಬಾರಿಸಿದರೂ ಸಹ ಮುಂದಿನ ಆವೃತ್ತಿಯಲ್ಲಿ ತಂಡದಿಂದ ಕೈಬಿಡಲಾಯಿತು. ತದನಂತರ ಕೆಎಲ್ ರಾಹುಲ್ ಪಂಜಾಬ್ ಕಿಂಗ್ಸ್ ಪರ ಪ್ರತಿ ಆವೃತ್ತಿಯಲ್ಲಿಯೂ ಹೆಚ್ಚಿನ ರನ್ ಗಳಿಸಿ ಮಿಂಚುತ್ತಿದ್ದಾರೆ.
4. ಶೇನ್ ವಾಟ್ಸನ್
2016ರ ಐಪಿಎಲ್ ಆವೃತ್ತಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಶೇನ್ ವಾಟ್ಸನ್ 20 ವಿಕೆಟ್ ಪಡೆದು ಮಿಂಚಿದರು, ಆದರೆ ಅದೇ ಆವೃತ್ತಿಯಲ್ಲಿ ಶೇನ್ ವಾಟ್ಸನ್ ಬ್ಯಾಟಿಂಗ್ನಲ್ಲಿ ನೆಲ ಕಚ್ಚಿದ್ದರು. ಆ ಆವೃತ್ತಿಯಲ್ಲಿ ಒಂದೇ ಒಂದು ಅರ್ಧ ಶತಕವನ್ನು ಬಾರಿಸಿದ ವಾಟ್ಸನ್ ತೀರಾ ಕೆಳಮಟ್ಟದ ಪ್ರದರ್ಶನವನ್ನು ನೀಡಿದ್ದರು. ಇನ್ನು ಬೆಂಗಳೂರು ತಂಡದಲ್ಲಿದ್ದಾಗ ವ್ಯಾಟ್ಸನ್ಗೆ ಕೆಳ ಕ್ರಮಾಂಕದ ಬ್ಯಾಟ್ಸ್ಮನ್ ಆಗಿ ಅವಕಾಶ ನೀಡುತ್ತಾ ಇದ್ದದ್ದೇ ಆತ ಕಳಪೆಯಾಗಲು ಕಾರಣ ಎಂಬ ವಾದವೂ ಇದೆ. ಬೇರೆ ತಂಡಗಳಲ್ಲಿ ಮೇಲಿನ ಕ್ರಮಾಂಕದ ಆಟಗಾರನಾಗಿ ವಾಟ್ಸನ್ ಕಣಕ್ಕಿಳಿಯುತ್ತಿದ್ದ ಕಾರಣ ಉತ್ತಮ ಪ್ರದರ್ಶನವನ್ನು ನೀಡಿದರು ಎಂಬ ಮಾತುಗಳು ಸಹ ಕೇಳಿ ಬಂದಿದ್ದವು. ವಾಟ್ಸನ್ ಕಳಪೆ ಪ್ರದರ್ಶನ ನೀಡಿದ ನಂತರ ಬೆಂಗಳೂರು ತಂಡ ಆತನನ್ನು ಕೈಬಿಟ್ಟಿತು.