ಜೈವಿಕ ಸುರಕ್ಷಾ ಪರದೆ
ಐಪಿಎಲ್ ಅನ್ನು ಆಯೋಜಿಸಲು ಒಪ್ಪಿಕೊಂಡಿರುವ ಯುಎಇ, ಭಾರತದಿಂದ ಯುಎಇಗೆ ಐಪಿಎಲ್ ಸ್ಥಳಾಂತರಿಸುವ ಕುರಿತು, ಭಾರತ ಸರ್ಕಾರದಿಂದ ಅನುಮತಿಗಾಗಿ ಕಾಯುತ್ತಿದೆ. 'ಆಟಗಾರರು, ಸಿಬ್ಬಂದಿಗಳು ಜೈವಿಕ ಸುರಕ್ಷಾ ತಾಣದೊಳಗೆ (ಬಯೋ ಬಬಲ್) ಇರಲಿದ್ದಾರೆ. ಒಮ್ಮೆ ಟೂರ್ನಿ ಶುರುವಾದ ಬಳಿಕ ಅಲ್ಲಿಂದ ಒಬ್ಬರೂ ಹೊರ ಬರುವಂತಿಲ್ಲ, ಯಾರೂ ಒಳ ಹೋಗುವಂತಿಲ್ಲ,' ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೊರೊನಾವೈರಸ್ ಪರೀಕ್ಷೆ
ಯುಎಇನಲ್ಲಿ ಸೆಪ್ಟೆಂಬರ್ 19ರಿಂದ ಆರಂಭವಾಗಲಿರುವ 13ನೇ ಆವೃತ್ತಿಯ ಐಪಿಎಲ್ ವೀಕ್ಷಕರಿಲ್ಲದ ಖಾಲಿ ಮೈದಾನದಲ್ಲಿ ನಡೆಯಲಿದೆ. ಐಪಿಎಲ್ ಇತಿಹಾಸದಲ್ಲಿ ಇದೇ ಮೊದಲಿಗೆ ಇಂಥ ಪರಿಸ್ಥಿತಿ ಬಂದೊದಗಿದೆ. ಇನ್ನು ಟೂರ್ನಿಯಲ್ಲಿ ಪಾಲ್ಗೊಳ್ಳುವ ಎಲ್ಲಾ ಆಟಗಾರರಿಗೆ 2 ವಾರದಲ್ಲಿ 4 ಬಾರಿ ಕೊರೊನಾವೈರಸ್ ಪರೀಕ್ಷೆ ನಡೆಯಲಿದೆ.
ಸ್ಟುಡಿಯೋದೊಳಗೆ 6 ಅಡಿ ಅಂತರ
ಐಪಿಎಲ್ ನಡೆಯುವಾಗ ಕಾಮೆಂಟೇಟರ್ಗಳು ಸ್ಟುಡಿಯೋದೊಳಗೆ 6 ಅಡಿ ಅಂತರ ಕಾಯ್ದುಕೊಳ್ಳಲಿದ್ದಾರೆ. ಡಗ್ಔಟ್ನಲ್ಲೂ ಕಡಿಮೆ ಜನಸಂದಣಿ ಇರಲಿದೆ. ಅಷ್ಟೇ ಅಲ್ಲ ಡ್ರೆಸ್ಸಿಂಗ್ ರೂಮ್ನಲ್ಲೂ 15 ಜನಕ್ಕಿಂತ ಹೆಚ್ಚು ಆಟಗಾರರು ಒಂದೇ ಹೊತ್ತಿನಲ್ಲಿ ಇರುವಂತಿಲ್ಲ. ಬಹುಮಾನ ವಿತರಣೆ ವೇಳೆಯೂ ಆಟಗಾರರಿಂದ ಆಟಗಾರರಿಗೆ ಅಂತರ ಕಾಯ್ದುಕೊಳ್ಳಲಾಗುತ್ತದೆ.
ಸ್ಟ್ಯಾಂಡರ್ಡ್ ಆಪರೇಟಿಂಗ್ ಕಾರ್ಯವಿಧಾನ
ಐಪಿಎಲ್ ವೇಳೆ ಪಾಲಿಸಬೇಕಾದ ಸ್ಟ್ಯಾಂಡರ್ಡ್ ಆಪರೇಟಿಂಗ್ ಕಾರ್ಯವಿಧಾನವನ್ನು ಬೋರ್ಡ್ ಆಫ್ ಕಂಟ್ರೋಲ್ ಫಾರ್ ಕ್ರಿಕೆಟ್ ಇನ್ ಇಂಡಿಯಾ ರೂಪಿಸಿದೆ. ಇದನ್ನು ಎಲ್ಲಾ ಆಟಗಾರರು, ಬೆಂಬಲ ಸಿಬ್ಬಂದಿಗಳು ಮತ್ತು ಅಧಿಕಾರಿಗಳು ಪಾಲಿಸಬೇಕಾಗಿದೆ.ಅಂದ್ಹಾಗೆ, ಗಲ್ಫ್ ನ್ಯೂಸ್ ಪ್ರಕಾರ ಯುಎಇಯಲ್ಲಿ ಸುಮಾರು 59,921 ಕೊರೊನಾ ಕೇಸ್ಗಳಿವೆ. 53,202 ಮಂದಿ ಸುಧಾರಿಸಿದ್ದಾಗಿ ದಾಖಲಾಗಿದೆ.