ಗಪ್ಟಿಲ್ ಶತಕ
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲೆಂಡ್ ತಂಡದ ಪರ ಆರಂಭಿಕ ಆಟಗಾರನಾಗಿ ಕಣಕ್ಕಿಳಿದ ಮಾರ್ಟಿನ್ ಗಪ್ಟಿಲ್ 126 ಎಸೆತಗಳಲ್ಲಿ 115 ರನ್ ಬಾರಿಸಿ ಶತಕ ಸಿಡಿಸಿದರು. ಮಾರ್ಟಿನ್ ಗಪ್ಟಿಲ್ ಅವರ ಈ ಇನ್ನಿಂಗ್ಸ್ನಲ್ಲಿ 15 ಬೌಂಡರಿ ಮತ್ತು 2 ಸಿಕ್ಸರ್ ಕೂಡ ಸೇರಿದ್ದವು.
ಅಬ್ಬರಿಸಿದ ಹೆನ್ರಿ ನಿಕೋಲ್ಸ್
ಒಂದೆಡೆ ಮಾರ್ಟಿನ್ ಗಪ್ಟಿಲ್ ಶತಕದ ನೆರವಿನಿಂದ ನ್ಯೂಜಿಲೆಂಡ್ ಉತ್ತಮ ಆರಂಭವನ್ನು ಪಡೆದುಕೊಂಡರೆ ಮತ್ತೋರ್ವ ಆರಂಭಿಕ ಆಟಗಾರನಾದ ಫಿನ್ ಅಲೆನ್ 33 ರನ್ ಗಳಿಸಿ ನಿರ್ಗಮಿಸಿದರು. ನಂತರ ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ವಿಲ್ ಯಂಗ್ 3 ರನ್, ನಾಯಕ ಟಾಮ್ ಲಾಥಮ್ 30 ರನ್, ಹೆನ್ರಿ ನಿಕೊಲ್ಸ್ 79 ರನ್ ಮತ್ತು ಗ್ಲೆನ್ ಫಿಲಿಪ್ಸ್ 47 ರನ್ ಬಾರಿಸಿದರು. ಹಾಗೂ ಮೈಕೆಲ್ ಬ್ರೇಸ್ ವೆಲ್ ಅಜೇಯ 21 ಮತ್ತು ಮಿಚೆಲ್ ಸ್ಯಾಂಟ್ನರ್ ಅಜೇಯ 14 ರನ್ ಕಲೆ ಹಾಕಿದರು. ಐದನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಹೆನ್ರಿ ನಿಕೊಲ್ಸ್ 54 ಎಸೆತಗಳಲ್ಲಿ 79 ರನ್ ಚಚ್ಚಿದರೆ, ಗ್ಲೆನ್ ಫಿಲಿಪ್ಸ್ 30 ಎಸೆತಗಳಲ್ಲಿ 47 ರನ್ ಬಾರಿಸಿದರು. ಹೀಗೆ ಮಧ್ಯಮ ಕ್ರಮಾಂಕದಲ್ಲಿ ಈ ಇಬ್ಬರ ಅಬ್ಬರದಿಂದ ನ್ಯೂಜಿಲೆಂಡ್ ರನ್ ವೇಗ ಹೆಚ್ಚಿತು.
ನ್ಯೂಜಿಲೆಂಡ್ ತಂಡವನ್ನು ಕಟ್ಟಿಹಾಕುವಲ್ಲಿ ವಿಫಲವಾದ ಐರ್ಲೆಂಡ್ ಪರ ಜೋಶ್ವಾ ಲಿಟಲ್ 2 ವಿಕೆಟ್ ಪಡೆದರೆ, ಕ್ರೈಗ್ ಯಂಗ್, ಕರ್ಟಿಸ್ ಕ್ಯಾಂಪರ್ ಮತ್ತು ಗ್ಯಾರೆತ್ ಡಿಲಾನಿ ತಲಾ ಒಂದೊಂದು ವಿಕೆಟ್ ಪಡೆದರು.
ಆಡುವ ಬಳಗಗಳು
ಐರ್ಲೆಂಡ್: ಪಾಲ್ ಸ್ಟಿರ್ಲಿಂಗ್, ಆಂಡ್ರ್ಯೂ ಬಾಲ್ಬಿರ್ನಿ (ನಾಯಕ), ಆಂಡಿ ಮ್ಯಾಕ್ಬ್ರೈನ್, ಹ್ಯಾರಿ ಟೆಕ್ಟರ್, ಕರ್ಟಿಸ್ ಕ್ಯಾಂಫರ್, ಲೋರ್ಕನ್ ಟಕರ್ (ವಿಕೆಟ್ ಕೀಪರ್), ಜಾರ್ಜ್ ಡಾಕ್ರೆಲ್, ಕ್ರೇಗ್ ಯಂಗ್, ಜೋಶುವಾ ಲಿಟಲ್, ಗರೆಥ್ ಡೆಲಾನಿ, ಗ್ರಹಾಂ ಹ್ಯೂಮ್
ನ್ಯೂಜಿಲೆಂಡ್: ಮಾರ್ಟಿನ್ ಗಪ್ಟಿಲ್, ಫಿನ್ ಅಲೆನ್, ವಿಲ್ ಯಂಗ್, ಟಾಮ್ ಲ್ಯಾಥಮ್ (ನಾಯಕ & ವಿಕೆಟ್ ಕೀಪರ್), ಹೆನ್ರಿ ನಿಕೋಲ್ಸ್, ಗ್ಲೆನ್ ಫಿಲಿಪ್ಸ್, ಮೈಕೆಲ್ ಬ್ರೇಸ್ವೆಲ್, ಮಿಚೆಲ್ ಸ್ಯಾಂಟ್ನರ್, ಮ್ಯಾಟ್ ಹೆನ್ರಿ, ಬ್ಲೇರ್ ಟಿಕ್ನರ್, ಲಾಕಿ ಫರ್ಗುಸನ್