Click it and Unblock the Notifications
ರಿಟೆನ್ಷನ್ ನಡೆಯುವುದಕ್ಕೂ ಮುನ್ನವೇ ಬೇರೆ ಫ್ರಾಂಚೈಸಿಯೊಂದಿಗೆ ರಾಹುಲ್ ಮತ್ತು ರಶೀದ್ ಖಾನ್ ಸಂಪರ್ಕ
ಪ್ರಸ್ತುತ ಅಸ್ತಿತ್ವದಲ್ಲಿರುವ 8 ಐಪಿಎಲ್ ಫ್ರಾಂಚೈಸಿಗಳಿಗೆ ಬಿಸಿಸಿಐ ರಿಟೆನ್ಷನ್ ಸಲುವಾಗಿ 4 ಆಟಗಾರರನ್ನು ತಂಡದಲ್ಲಿಯೇ ಉಳಿಸಿಕೊಳ್ಳಲು ಅನುಮತಿಯನ್ನು ನೀಡಿದೆ. ಹೀಗಾಗಿ ಪಂಜಾಬ್ ಕಿಂಗ್ಸ್ ತಂಡ ಕೆ ಎಲ್ ರಾಹುಲ್ ಅವರನ್ನು ಮತ್ತು ಸನ್ ರೈಸರ್ಸ್ ಹೈದರಾಬಾದ್ ತಂಡ ರಶೀದ್ ಖಾನ್ ಅವರನ್ನು ಉಳಿಸಿಕೊಳ್ಳುವ ಯತ್ನದಲ್ಲಿದೆ. ಆದರೆ ಇದಕ್ಕೆ ಒಪ್ಪದ ಕೆಎಲ್ ರಾಹುಲ್ ಮತ್ತು ರಶೀದ್ ಖಾನ್ ನೂತನವಾಗಿ ಐಪಿಎಲ್ ಸೇರ್ಪಡೆಯಾಗುತ್ತಿರುವ ಲಖನೌ ತಂಡದ ಫ್ರಾಂಚೈಸಿ ಜತೆ ಸಂಪರ್ಕ ಬೆಳೆಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಹೀಗಾಗಿಯೇ ಸನ್ ರೈಸರ್ಸ್ ಹೈದರಾಬಾದ್ ಮತ್ತು ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿಗಳು ಕೆಎಲ್ ರಾಹುಲ್ ಮತ್ತು ರಶೀದ್ ಖಾನ್ ವಿರುದ್ಧ ದೂರನ್ನು ನೀಡಿವೆ ಎನ್ನಲಾಗುತ್ತಿದೆ. ಬಿಸಿಸಿಐ ನಿಯಮದ ಪ್ರಕಾರ ಆಟಗಾರನೋರ್ವ ಪ್ರಸ್ತುತ ತಾನು ಪ್ರತಿನಿಧಿಸುತ್ತಿರುವ ಫ್ರಾಂಚೈಸಿಯಿಂದ ಅಧಿಕೃತವಾಗಿ ಆಚೆ ಬರುವ ತನಕ ಮತ್ತೊಂದು ಫ್ರಾಂಚೈಸಿ ಜತೆ ಸಂಪರ್ಕ ಬೆಳೆಸುವುದಾಗಲಿ ಅಥವಾ ಆ ಫ್ರಾಂಚೈಸಿಯನ್ನು ಸೇರುವ ಕುರಿತಾದ ಚರ್ಚೆಯನ್ನು ಮಾಡುವುದಾಗಲಿ ಮಾಡಿದರೆ ಅದೊಂದು ಅಪರಾಧವಾಗಲಿದೆ.
ಈ ವಿವಾದದ ಕುರಿತು ಬಿಸಿಸಿಐ ಹೇಳಿದ್ದಿಷ್ಟು
ಕೆಎಲ್ ರಾಹುಲ್ ಮತ್ತು ರಶೀದ್ ಖಾನ್ ವಿಚಾರವಾಗಿ ನಮಗೆ ಯಾವುದೇ ರೀತಿಯ ಲಿಖಿತ ದೂರುಗಳು ಬಂದಿಲ್ಲ. ಆದರೆ ಈ ಇಬ್ಬರೂ ಸಹ ಫ್ರಾಂಚೈಸಿಯೊಂದರ ಆಟಗಾರರಾಗಿರುವಾಗಲೇ ಮತ್ತೊಂದು ಫ್ರಾಂಚೈಸಿ ಜತೆ ಮಾತುಕತೆ ನಡೆಸಿದ್ದಾರೆ ಎಂಬ ಮೌಖಿಕ ದೂರುಗಳು ನಮಗೆ ಬಂದಿವೆ. ಹೀಗಾಗಿ ಈ ಕುರಿತಾಗಿ ಸೂಕ್ತ ತನಿಖೆಯನ್ನು ನಡೆಸಲಿದ್ದು ಆರೋಪಗಳು ಸಾಬೀತಾದರೆ ಇಬ್ಬರ ವಿರುದ್ಧವೂ ಕೂಡ ಸೂಕ್ತ ಕ್ರಮ ಜರುಗಿಸಲಾಗುವುದು ಎಂದು ಬಿಸಿಸಿಐ ಸ್ಪಷ್ಟನೆ ನೀಡಿದೆ. ಹೀಗಾಗಿ ಕೆಎಲ್ ರಾಹುಲ್ ಹಾಗೂ ರಶೀದ್ ಖಾನ್ ಲಕ್ನೋ ಫ್ರಾಂಚೈಸಿ ಜತೆ ಸಂಪರ್ಕ ಬೆಳೆಸಿದ್ದಾರೆ ಎಂಬ ಕಾರಣಕ್ಕೆ ಆರೋಪ ಸಾಬೀತಾದರೆ 1 ವರ್ಷ ಬ್ಯಾನ್ ಆಗುವ ಸಾಧ್ಯತೆಗಳಿವೆ.
ತಂಡವೊಂದರ ಆಟಗಾರನಾಗಿರುವಾಗಲೇ ಬೇರೆ ಫ್ರಾಂಚೈಸಿಯೊಂದರ ಸಂಪರ್ಕ ಬೆಳೆಸಿದ್ದಕ್ಕೆ ಈ ಹಿಂದೆಯೂ ವಿಧಿಸಲಾಗಿತ್ತು 1 ವರ್ಷ ಬ್ಯಾನ್ ಶಿಕ್ಷೆ
ಕೆಎಲ್ ರಾಹುಲ್ ಮತ್ತು ರಶೀದ್ ಖಾನ್ ತಂಡವೊಂದರ ಆಟಗಾರರಾಗಿರುವಾಗಲೇ ಬೇರೆ ಫ್ರಾಂಚೈಸಿಯೊಂದರ ಸಂಪರ್ಕ ಬೆಳೆಸಿದ್ದಕ್ಕೆ 1 ವರ್ಷ ಬ್ಯಾನ್ ಆಗುವ ಸಾಧ್ಯತೆಗಳಿವೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಆದರೆ ಈ ರೀತಿಯ ಘಟನೆ ನಡೆಯುತ್ತಿರುವುದು ಇದೇ ಮೊದಲೇನಲ್ಲ, ಈ ಹಿಂದೆಯೂ ನಡೆದಿದ್ದಕ್ಕೆ ಉದಾಹರಣೆಯೊಂದಿದೆ. ಹೌದು, 2010ರ ಸಮಯದಲ್ಲಿ ರಾಜಸ್ತಾನ್ ರಾಯಲ್ಸ್ ತಂಡದಲ್ಲಿದ್ದ ರವೀಂದ್ರ ಜಡೇಜಾ, ತಂಡದಲ್ಲಿರುವಾಗಲೇ ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ ಜತೆ ಸಂಪರ್ಕ ಬೆಳೆಸಿದ್ದಕ್ಕೆ ಬಿಸಿಸಿಐ ರವೀಂದ್ರ ಜಡೇಜಾರನ್ನು ಆ ಐಪಿಎಲ್ ಆವೃತ್ತಿಯಿಂದ ಬ್ಯಾನ್ ಮಾಡಿತ್ತು.
