ಮತ್ತೆ ಟೆಸ್ಟ್ ಕ್ರಿಕೆಟ್ಗೆ ಮರಳುವಂತೆ ಧೋನಿ ಮನವೊಲಿಸಲು ಮುಂದಾಗಿದ್ದ ರವಿಶಾಸ್ತ್ರಿ
ಮಹೇಂದ್ರ ಸಿಂಗ್ ಧೋನಿ ಟೆಸ್ಟ್ ಕ್ರಿಕೆಟ್ನಿಂದ 2014ರ ಸಮಯದಲ್ಲಿ ದೂರ ಸರಿದು ನಿವೃತ್ತಿಯನ್ನು ಘೋಷಿಸಿದರು. ಟೆಸ್ಟ್ ಕ್ರಿಕೆಟ್ಗೆ ದಿಢೀರ್ ನಿವೃತ್ತಿ ಘೋಷಿಸಿದ ಎಂಎಸ್ ಧೋನಿ ಅವರ ನಿರ್ಧಾರ ಕ್ರೀಡಾಭಿಮಾನಿಗಳಲ್ಲಿ ಆಶ್ಚರ್ಯವನ್ನು ಮೂಡಿಸಿತ್ತು. ಹೀಗೆ ಟೆಸ್ಟ್ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ್ದ ಎಂಎಸ್ ಧೋನಿ ಮನವೊಲಿಸಲು ರವಿಶಾಸ್ತ್ರಿ ಮುಂದಾಗಿದ್ದರಂತೆ. 90 ಟೆಸ್ಟ್ ಪಂದ್ಯಗಳನ್ನಾಡಿದ ಬಳಿಕ ಎಂಎಸ್ ಧೋನಿ ನಿವೃತ್ತಿ ಘೋಷಿಸಿದ್ದರು, ಹೀಗಾಗಿ 100 ಪಂದ್ಯಗಳ ಮೈಲಿಗಲ್ಲನ್ನಾದರೂ ಎಂಎಸ್ ಧೋನಿ ಮುಟ್ಟಬೇಕು ಎಂಬ ಉದ್ದೇಶದಿಂದ ಮತ್ತೆ ಟೆಸ್ಟ್ ಕ್ರಿಕೆಟ್ಗೆ ಮರಳುವಂತೆ ಧೋನಿ ಬಳಿ ರವಿಶಾಸ್ತ್ರಿ ಮನವಿಯನ್ನು ಮಾಡಿದ್ದರಂತೆ.
ಗಟ್ಟಿ ನಿರ್ಧಾರ ಕೈಗೊಂಡಿದ್ದ ಎಂಎಸ್ ಧೋನಿ
ರವಿಶಾಸ್ತ್ರಿ ಎಂಎಸ್ ಧೋನಿಯವರನ್ನು ಮತ್ತೆ ಟೆಸ್ಟ್ ಕ್ರಿಕೆಟ್ ಆಡುವಂತೆ ಮನವೊಲಿಸಲು ಮುಂದಾದಾಗ ರವಿಶಾಸ್ತ್ರಿಗೆ ಹೆಚ್ಚೇನೂ ಮಾತನಾಡಲೂ ಬಿಡದ ಎಂಎಸ್ ಧೋನಿ ರವಿಶಾಸ್ತ್ರಿ ಅವರ ಮನವೊಲಿಕೆಗೆ ಆರಂಭದಲ್ಲಿಯೇ ಬ್ರೇಕ್ ಹಾಕಿದ್ದರು. ಹೀಗಾಗಿ ಎಂಎಸ್ ಧೋನಿ ಮನವೊಲಿಸುವ ಯತ್ನವನ್ನು ಪೂರ್ಣಗೊಳಿಸಲಾಗದ ರವಿಶಾಸ್ತ್ರಿ ಧೋನಿಯವರ ವಿದಾಯದ ಹಿಂದೆ ದೃಢವಾದ ನಿರ್ಧಾರವಿತ್ತು ಎಂದು ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ.ಹಲವಾರು ಕ್ರಿಕೆಟಿಗರು ಮೈಲಿಗಲ್ಲು ಮುಟ್ಟಬೇಕು ಹಾಗೂ ಬೀಳ್ಕೊಡುಗೆ ಪಂದ್ಯವನ್ನಾಡಬೇಕು ಎಂದು ಆಸೆಯನ್ನು ಇಟ್ಟುಕೊಂಡಿರುತ್ತಾರೆ. ಆದರೆ ಧೋನಿಗೆ ಆ ರೀತಿಯ ಆಸೆಗಳೇ ಇರಲಿಲ್ಲ ಎಂದು ರವಿಶಾಸ್ತ್ರಿ ಹೇಳಿದ್ದಾರೆ.
ಕೇವಲ ಭಾರತವಲ್ಲ, ಧೋನಿ ವಿಶ್ವ ಶ್ರೇಷ್ಠ ಆಟಗಾರ
ಇನ್ನೂ ಮುಂದುವರಿದು ಎಂ ಎಸ್ ಧೋನಿ ಕುರಿತು ಬರೆದುಕೊಂಡಿರುವ ರವಿಶಾಸ್ತ್ರಿ 'ಎಂಎಸ್ ಧೋನಿ ಕೇವಲ ಭಾರತ ಮಾತ್ರವಲ್ಲ ಇಡೀ ವಿಶ್ವದ ಶ್ರೇಷ್ಠ ಕ್ರಿಕೆಟ್ ನಾಯಕ, 2 ವಿಶ್ವಕಪ್ ಟ್ರೋಫಿಗಳು ಸೇರಿದಂತೆ ಒಟ್ಟು 3 ಐಸಿಸಿ ಟ್ರೋಫಿಗಳನ್ನು ತನ್ನ ನಾಯಕತ್ವದಲ್ಲಿ ಭಾರತಕ್ಕೆ ಗೆಲ್ಲಿಸಿಕೊಟ್ಟಿರುವ ಎಂ ಎಸ್ ಧೋನಿ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿಯೂ ಓರ್ವ ಯಶಸ್ವಿ ನಾಯಕನಾಗಿದ್ದಾರೆ' ಎಂದು ಶ್ಲಾಘಿಸಿದ್ದಾರೆ.