ನಮ್ಮೂರ ಪ್ರತಿಭೆ: ಕಿರಿಯ ವಯಸ್ಸಿನಲ್ಲಿಯೇ ಹಲವು ಸಾಧನೆಗೈದ ತುಮಕೂರಿನ ಕುವರಿ ಪ್ರಿಯಾ ಮೋಹನ್

ಪ್ರಿಯ ಮೋಹನ್ ಕಿರುಪರಿಚಯ

ಮೂಲತಃ ತುಮಕೂರು ಜಿಲ್ಲೆಯ ಪ್ರಿಯಾ ಮೋಹನ್ ಅವರ ತಂದೆ ಎಚ್ ಎ ಮೋಹನ್ ಬೆಳಗಾವಿ ಜಿಲ್ಲಾ ನ್ಯಾಯಾಲಯದಲ್ಲಿ ನ್ಯಾಯಾಧೀಶರಾಗಿ ಕೆಲಸ ನಿರ್ವಹಿಸುತ್ತಿದ್ದಾರೆ ಮತ್ತು ತಾಯಿ ಚಂದ್ರಕಲಾ ಗೃಹಿಣಿ. ಪ್ರಿಯಾ ಮೋಹನ್ ಜೈನ್ ವಿಶ್ವವಿದ್ಯಾನಿಲಯದಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ.

ಶಾಲಾ ಮಟ್ಟದಿಂದ ಅಂತರರಾಷ್ಟ್ರೀಯ ಕ್ರೀಡಾಕೂಟಗಳಿಗೆ

ಇನ್ನು 2018ರಲ್ಲಿ ಐಸಿಎಸ್ಇ ಸ್ಕೂಲ್ಸ್ ನ್ಯಾಷನಲ್ಸ್ ಕ್ರೀಡಾಕೂಟದಲ್ಲಿ ಪ್ರಿಯ ಮೋಹನ್ ಭಾಗವಹಿಸಿದ್ದಾಗ ಆಕೆಯನ್ನು ಗುರುತಿಸಿದ ಕೋಚ್ ಅರ್ಜುನ್ ಅಜಯ್ ನಂತರದ ದಿನಗಳಲ್ಲಿ ಆಕೆಗೆ ತರಬೇತಿ ನೀಡುತ್ತಾ ಬಂದಿದ್ದಾರೆ. ಅರ್ಜುನ್ ಅಜಯ್ ಮಾರ್ಗದರ್ಶನದಲ್ಲಿ ಪ್ರಿಯ ಮೋಹನ್ 400 ಮೀಟರ್ ಕ್ರಮಿಸಲು ತೆಗೆದುಕೊಳ್ಳುತ್ತಿದ್ದ ಸಮಯದಲ್ಲಿ ಸುಧಾರಣೆಯನ್ನು ಕಂಡರು. ಇದಕ್ಕೂ ಮುನ್ನ 400 ಮೀಟರ್ ಕ್ರಮಿಸಲು 1 ನಿಮಿಷ 5 ಸೆಕೆಂಡ್ ತೆಗೆದುಕೊಳ್ಳುತ್ತಿದ್ದ ಪ್ರಿಯ ಮೋಹನ್ ನಂತರ ಕೇವಲ 57.81 ಸೆಕೆಂಡುಗಳಲ್ಲಿ 400 ಮೀಟರ್ ಓಟವನ್ನು ಪೂರೈಸಿದರು. ನಂತರ 1 ವರ್ಷದಲ್ಲಿ ಮತ್ತೆ ತೆಗೆದುಕೊಳ್ಳುತ್ತಿದ್ದ ಸಮಯದಲ್ಲಿ ಇಳಿಕೆ ಕಂಡ ಪ್ರಿಯ ಮೋಹನ್ 53.62 ಸೆಕೆಂಡುಗಳಲ್ಲಿ 400 ಮೀಟರ್ ಓಟವನ್ನು ಪೂರೈಸಿದರು ಹಾಗೂ ಅದೇ ವರ್ಷದಲ್ಲಿ ನಡೆದ ಏಷಿಯನ್ ಯೂತ್ ಅಥ್ಲೆಟಿಕ್ ಚಾಂಪಿಯನ್‍ಶಿಪ್ ಕ್ರೀಡಾಕೂಟದಲ್ಲಿ ರಿಲೇ ವಿಭಾಗದಲ್ಲಿ ಪದಕವನ್ನು ಕೂಡ ಗೆದ್ದರು.

ಪ್ರಿಯ ಮೋಹನ್ ಪದಕ ಸಂಪಾದನೆ ಮತ್ತು ಸಾಧನೆಗಳು

• 2019ರಲ್ಲಿ ನಡೆದ ಸೌತ್ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ - 400 ಮೀ ಓಟ - ಬೆಳ್ಳಿ ಪದಕ

• ಪಟಿಯಾಲಾದಲ್ಲಿ ನಡೆದ ರಾಷ್ಟ್ರೀಯ ಅಂತರರಾಜ್ಯ ಸೀನಿಯರ್ ಅಥ್ಲೆಟಿಕ್ ಚಾಂಪಿಯನ್‍ಶಿಪ್ ಕ್ರೀಡಾಕೂಟದಲ್ಲಿ 400 ಮೀ ಓಟದಲ್ಲಿ 2016ರ ರಿಯೋ ಒಲಿಂಪಿಕ್ಸ್‌ನಲ್ಲಿ ಭಾಗವಹಿಸಿದ್ದ ಎಂ ಆರ್ ಪೂವಮ್ಮ ಜಿಸ್ನಾ ಮ್ಯಾಥ್ಯೂ ಅವರನ್ನು ಹಿಂದಿಕ್ಕಿದ ಪ್ರಿಯ ಮೋಹನ್ ಚಿನ್ನದ ಪದಕವನ್ನು ಗೆದ್ದರು.

• 2022ರ ಇಂಡಿಯನ್ ಗ್ರ್ಯಾಂಡ್ ಪ್ರಿಕ್ಸ್ ಆಲ್ ಇಂಡಿಯಾ ಯೂನಿವರ್ಸಿಟಿ ವುಮೆನ್ಸ್ ಅಥ್ಲೆಟಿಕ್ಸ್ ಚಾಂಪಿಯನ್‍ಶಿಪ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ

• 2022ರ ಮೇ ತಿಂಗಳಿನಲ್ಲಿ ನಡೆದ ಖೇಲೋ ಇಂಡಿಯಾ ಗೇಮ್ಸ್ ಕ್ರೀಡಾಕೂಟದಲ್ಲಿ 200 ಮೀ ಓಟವನ್ನು 23.90 ಸೆಕೆಂಡುಗಳಲ್ಲಿ ಪೂರೈಸಿದ ಪ್ರಿಯ ಮೋಹನ್ ಖ್ಯಾತ ದ್ಯುತಿ ಚಂದ್ ಅವರನ್ನು ಮಣಿಸಿದರು. ಹಾಗೂ ಇದೇ ಕ್ರೀಡಾಕೂಟದಲ್ಲಿನ 400 ಮೀ ಓಟದಲ್ಲಿಯೂ ಪ್ರಿಯ ಮೋಹನ್ ಚಿನ್ನ ಗೆದ್ದರು.