ಗಲ್ಲಿ ಕ್ರಿಕೆಟ್ ಟೂರ್ನಿಗೆ ತನ್ನ ಫೋಟೋ ಬಳಸಿದ್ದಕ್ಕೆ ಗಂಭೀರ್ ಕೆಂಡಾಮಂಡಲ!
ಭಾರತದಲ್ಲಿ ಯಾವುದಾದರೂ ಕ್ರಿಕೆಟ್ ಟೂರ್ನಮೆಂಟ್ ನಡೆದರೆ ಅಲ್ಲಿ ಸಚಿನ್ ತೆಂಡೂಲ್ಕರ್ ಅಥವಾ ವಿರಾಟ್ ಕೊಹ್ಲಿ ಚಿತ್ರಗಳನ್ನು ಬಳಸಿಕೊಳ್ಳುತ್ತಾರೆ, ಫುಟ್ಬಾಲ್ ಟೂರ್ನಿಗಳು ನಡೆದರೆ ಆ ಕ್ರೀಡೆಯ ಜನಪ್ರಿಯ ಆಟಗಾರರ ಚಿತ್ರಗಳನ್ನು ಬಳಸಿಕೊಳ್ಳುತ್ತಾರೆ. ಹೀಗೆ ದೊಡ್ಡ ಮಟ್ಟದ ಹೆಸರನ್ನು ಮಾಡಿರುವ ಆಟಗಾರರ ಫೋಟೋಗಳನ್ನು ಚಿಕ್ಕಚಿಕ್ಕ ಟೂರ್ನಿಗಳಲ್ಲಿ ಬಳಸಿಕೊಳ್ಳುವುದು ಸರ್ವೇಸಾಮಾನ್ಯ. ಅದೇ ರೀತಿ ಚಿಕ್ಕ ಕ್ರಿಕೆಟ್ ಟೂರ್ನಿ ನಡೆಸಿರುವ ತಂಡವೊಂದು ಗೌತಮ್ ಗಂಭೀರ್ ಅವರ ಚಿತ್ರವನ್ನು ಪ್ರಚಾರಕ್ಕಾಗಿ ಬಳಸಿದೆ. ಇಷ್ಟಕ್ಕೇ ಕೋಪಗೊಂಡಿರುವ ಗೌತಮ್ ಗಂಭೀರ್ ತನ್ನ ಭಾವಚಿತ್ರವನ್ನು ಬಳಸಿದ ಕ್ರಿಕೆಟ್ ಟೂರ್ನಿಯ ಆಯೋಜಕರ ವಿರುದ್ಧ ದೂರು ನೀಡಲು ಮುಂದಾಗಿದ್ದಾರೆ.
ದೂರು ನೀಡಲು ಕಾರಣವೇನು?
ತನ್ನ ಭಾವಚಿತ್ರವನ್ನು ಕ್ರಿಕೆಟ್ ಟೂರ್ನಿಯ ಪ್ರಚಾರಕ್ಕಾಗಿ ಬಳಸಿಕೊಂಡಿರುವ ಆಯೋಜಕರ ವಿರುದ್ಧ ದೂರು ನೀಡುತ್ತೇನೆ ಎಂದು ಫೇಸ್ಬುಕ್ನಲ್ಲಿ ಬರೆದುಕೊಂಡಿರುವ ಗೌತಮ್ ಗಂಭೀರ್ ಅದಕ್ಕೆ ಕಾರಣವನ್ನು ಕೂಡ ತಿಳಿಸಿದ್ದಾರೆ. ಈ ರೀತಿಯ ಗಲ್ಲಿ ಕ್ರಿಕೆಟ್ ಟೂರ್ನಿಗಳಲ್ಲಿ ಕ್ರಿಕೆಟ್ ನಡೆಸುವವರು ಪ್ರವೇಶ ಶುಲ್ಕವನ್ನು ವಿಧಿಸುವುದು ಸಾಮಾನ್ಯ. ಅದೇ ರೀತಿ ಗಂಭೀರ್ ಚಿತ್ರ ಬಳಸಿರುವ ಆ ಆಯೋಜಕರು ಪ್ರವೇಶ ಶುಲ್ಕವನ್ನು ಕೂಡ ಪಕ್ಕದಲ್ಲಿಯೇ ಪ್ರಕಟಿಸಿದ್ದಾರೆ. ಇದನ್ನು ಕಂಡಿರುವ ಗಂಭೀರ್ ನಾನು ಈ ರೀತಿಯ ಯಾವುದೇ ಟೂರ್ನಿಗಳಿಗೂ ಕೂಡಾ ಪ್ರೋತ್ಸಾಹವನ್ನು ನೀಡುತ್ತಿಲ್ಲ, ಯಾರೂ ಸಹ ಈ ರೀತಿಯ ಟೂರ್ನಿಗಳಿಗೆ ಹಣವನ್ನು ನೀಡಬೇಡಿ ಹಾಗೂ ನಾನು ನನ್ನ ಚಿತ್ರವನ್ನು ಬಳಸಿಕೊಂಡಿರುವ ಈ ಆಯೋಜಕರ ವಿರುದ್ಧ ಕಾನೂನು ಕ್ರಮ ಜರುಗಿಸುತ್ತೇನೆ ಎಂದು ಬರೆದುಕೊಂಡಿದ್ದಾರೆ.
ಈತ ಎಂತಹ ಸ್ಟಾರ್ ಎಂದ ನೆಟ್ಟಿಗರು
ಗೌತಮ್ ಗಂಭೀರ್ ಹಾಕಿರುವ ಈ ಪೋಸ್ಟ್ ಕಂಡ ನಂತರ ನೆಟ್ಟಿಗರು ಗಂಭೀರ್ ಕಾಲನ್ನು ಎಳೆದಿದ್ದಾರೆ. ನೀವೊಬ್ಬರು ಖ್ಯಾತ ಕ್ರಿಕೆಟಿಗ ಹೀಗಾಗಿ ಜನಪ್ರಿಯರಾಗಿರುವ ನಿಮ್ಮ ಫೋಟೋವನ್ನು ಇಂತಹ ಟೂರ್ನಿಗಳಲ್ಲಿ ಬಳಸುವುದು ಸಾಮಾನ್ಯ, ಪ್ರೀತಿಯಿಂದ ನಿಮ್ಮ ಫೋಟೋ ಬಳಸಿರುವ ಅಭಿಮಾನಿಗಳ ವಿರುದ್ಧವೇ ನೀವು ಈ ರೀತಿಯ ಕ್ರಮಗಳನ್ನು ತೆಗೆದುಕೊಳ್ಳುವುದು ಎಷ್ಟು ಸರಿ ಎಂದು ಕೆಲವರು ಬೇಸರ ವ್ಯಕ್ತಪಡಿಸಿದ್ದಾರೆ. ಇನ್ನೂ ಕೆಲವರು ಈ ರೀತಿ ಪ್ರತಿಯೊಬ್ಬ ಕ್ರಿಕೆಟಿಗನೂ ಕೂಡಾ ಚಿಂತಿಸಿ ಬಿಟ್ಟರೆ ಟೂರ್ನಿ ನಡೆಸುವ ಪ್ರತಿಯೊಬ್ಬ ಆಯೋಜಕ ಕೂಡ ಜೈಲು ಸೇರಬೇಕಾಗುತ್ತದೆ ಎಂದು ಗಂಭೀರ್ ವಿರುದ್ಧ ಟ್ರೋಲ್ ಮಾಡಿದ್ದಾರೆ. ಮತ್ತೊಂದಷ್ಟು ಜನ ಇಂತಹ ಚಿಕ್ಕ ವಿಷಯಗಳಿಗೂ ತಲೆಕೆಡಿಸಿಕೊಂಡು ವಿವಾದಗಳನ್ನು ಎಬ್ಬಿಸುವ ಇಂತಹ ಆಟಗಾರ ಸ್ಟಾರ್ ಹೇಗಾದ ಅರ್ಥವಾಗುತ್ತಿಲ್ಲ ಎಂದು ಮೂದಲಿಸಿದ್ದಾರೆ.