ಮನ ಗೆದ್ದ ಬ್ಲ್ಯಾಕ್ ಕ್ಯಾಪ್ಸ್
ಫೈನಲ್ ನಲ್ಲಿ ಎರಡೂ ತಂಡಗಳೂ 241 ರನ್ ಬಾರಿಸಿದ್ದರಿಂದ ಪಂದ್ಯ ಟೈ ಆಗಿತ್ತು. ಸೂಪರ್ ಓವರ್ನಲ್ಲೂ ಇತ್ತಂಡಗಳು 15 ರನ್ ಬಾರಿಸಿ ಸಮಬಲ ಸಾಧಿಸಿದ್ದವು. ಆದರೆ ಬೌಂಡರಿ ಲೆಕ್ಕಗಳ ನಿಯಮದ ಆಧಾರದಲ್ಲಿ ಆತಿಥೇಯ ಇಂಗ್ಲೆಂಡ್ ತಂಡವನ್ನು ಚಾಂಪಿಯನ್ ಆಗಿ ಘೋಷಿಸಲಾಯ್ತು. ಇನ್ನೊಂದೆಡೆ, ಟೂರ್ನಿಯುದ್ದಕ್ಕೂ ಅದ್ಭುತ ಪ್ರದರ್ಶನ ನೀಡಿದ್ದ ಕೇನ್ ವಿಲಿಯಮ್ಸ್ ಪಡೆ ವಿಶ್ವದ ಕ್ರಿಕೆಟ್ ಪ್ರೇಮಿಗಳ ಪ್ರೀತಿಗೆ ಪಾತ್ರವಾಗಿತ್ತು.
ಸಿಕ್ಸ್ ಬಾರಿಸುತ್ತಲೇ ಕೊನೆಯುಸಿರು
ಸೋಮವಾರ ಬೆಳಗ್ಗೆ (ನ್ಯೂಜಿಲೆಂಡ್ ಕಾಲಮಾನ) ಫೈನಲ್ ಪಂದ್ಯದ ಸೂಪರ್ ಓವರ್ನಲ್ಲಿ ಕಿವೀಸ್ 15 ರನ್ ಚೇಸಿಂಗ್ಗೆ ಇಳಿದಿದ್ದಾಗ ಓವರ್ನ 2ನೇ ಎಸೆತಕ್ಕೆ ನೀಶಮ್ ಸಿಕ್ಸ್ ಬಾರಿಸಿದ್ದರು. ಅದಾಗಲೇ ತನ್ನ ತಂದೆ ಉಸಿರಾಟ ನಿಲ್ಲಿಸಿದ್ದರು ಎಂದು ಗಾರ್ಡನ್ ಪುತ್ರಿ ಲಿಯೋನಿ, ಘಟನೆಯ ಸ್ಪಷ್ಟ ಚಿತ್ರಣ ನೀಡಿದ್ದಾರೆ.
ಉಸಿರಾಟದಲ್ಲಿ ಬದಲಾವಣೆ
'ಫೈನಲ್ ಪಂದ್ಯದ ಸೂಪರ್ ಓವರ್ ವೇಳೆ ತಂದೆ ಮಲಗಿದ್ದಲ್ಲಿಗೆ ಬಂದ ನರ್ಸ್, ತಂದೆಯ ಉಸಿರಾಟದಲ್ಲಿ ಬದಲಾವಣೆಗಳಾಗುತ್ತಿದೆ ಎಂದಳು. ನಿಮಗ್ಗೊತ್ತಾ, ನನಗನ್ನಿಸಿದಂತೆ ಜೇಮ್ಸ್ ನೀಶಮ್ ಸಿಕ್ಸ್ ಬಾರಿಸುವ ವೇಳೆಗೆ ಅಪ್ಪ ಕೊನೆಯುಸಿರು ಬಿಟ್ಟಿದ್ದರು' ಎಂದು ಸ್ಟಫ್ ಡಾಟ್ ಕೋ ಡಾಟ್ ಎನ್ಝಡ್ ಜೊತೆ ಮಾತನಾಡುತ್ತ ಲಿಯೋನಿ ವಿವರಿಸಿದ್ದಾರೆ.
ಜಿಮ್ಮಿ ನೀಶಮ್ ವಿಷಾದ
ನನ್ನ ಹೈಸ್ಕೂಲ್ ಟೀಚರ್, ಕೋಚ್, ಫ್ರೆಂಡ್ ಆದ ಡೇವ್ ಗಾರ್ಡನ್ ಅವರೆ, ಮುಖ್ಯವಾಗಿ ನಿಮ್ಮ ಅಡಿಯಲ್ಲಿ ಆಡಿ ಬೆಳೆದ ನಮಗೆ ಆಟದ ಬಗೆಗಿನ ನಿಮ್ಮ ಪ್ರೀತಿ ಪಸರಿಸಿದೆ. ಕೊನೆಯುಸಿರೆಳೆಯೋಕೆ ಎಂಥಹ ಸೂಕ್ತ ಪಂದ್ಯವನ್ನು ನೀವು ಆರಿಸಿಕೊಂಡಿದ್ದೀರಿ. ನಮ್ಮ ಆಟಕ್ಕೆ ನೀವು ಹೆಮ್ಮೆಪಟ್ಟಿರುತ್ತೀರಿ ಎಂದು ಭಾವಿಸುತ್ತೇವೆ. ನಿಮ್ಮ ಪ್ರೀತಿ, ಕಾಳಜಿ ಎಲ್ಲದಕ್ಕೂ ಧನ್ಯವಾದಗಳು. ನಿಮ್ಮ ಆತ್ಮಕ್ಕೆ ಶಾಂತಿ ಸಿಗಲಿ' ಎಂದು ನೀಶಮ್ ಟ್ವೀಟ್ ಮೂಲಕ ಸಂತಾಪ ಸೂಚಿಸಿದ್ದಾರೆ.