ಏಳರಲ್ಲೂ ಸೋಲು
ಶ್ರೀಲಂಕಾ ಮತ್ತು ಪಾಕಿಸ್ತಾನ ತಂಡಗಳ ಹಣಹಣಿಯೂ ಇಂಥದ್ದೇ ಸ್ವಾರಸ್ಯಕರ ಸಂಗತಿಯನ್ನು ಹೊಂದಿದೆ. ಪಾಕ್ ತಂಡ ಈವರೆಗೂ ವಿಶ್ವಕಪ್ನಲ್ಲಿ ಶ್ರೀಲಂಕಾ ವಿರುದ್ಧ ಒಂದೂ ಪಂದ್ಯ ಸೋತಿಲ್ಲ. 12ನೇ ವಿಶ್ವಕಪ್ ಆವೃತ್ತಿಯಲ್ಲಿ ಶುಕ್ರವಾರ (ಜೂನ್ 7) ಇತ್ತಂಡಗಳು ಬ್ರಿಸ್ಟಲ್ ಮೈದಾನದಲ್ಲಿ 11ನೇ ಪಂದ್ಯಕ್ಕಾಗಿ ಎದುರುಬದುರಾಗಿದ್ದು, ಪಂದ್ಯ ಕುತೂಹಲ ಕೆರಳಿಸಿದೆ.
ಪಾಕ್ ಎದುರು ಗೆಲುವೇ ಇಲ್ಲ
ಈವರೆಗೆ ವಿಶ್ವಕಪ್ನಲ್ಲಿ ಪಾಕಿಸ್ತಾನ ಮತ್ತು ಶ್ರೀಲಂಕಾ ತಂಡಗಳು ಒಟ್ಟಿಗೆ ಏಳುಸಾರಿ ಕಾದಾಡಿವೆ. ಇದರಲ್ಲೂ ಏಳೂ ಸಾರಿ ಶ್ರೀಲಂಕಾ ಸೋಲಿನ ಮುಖಭಂಗ ಅನುಭವಿಸಿದೆ. ಅಂದರೆ 1975ರ ವಿಶ್ವಕಪ್ ಟೂರ್ನಿಯಿಂದ ಹಿಡಿದು ಇಲ್ಲೀವರೆಗೂ ಶ್ರೀಲಂಕಾಕ್ಕೆ ಪಾಕ್ ಎದುರು ಗೆಲುವೇ ಲಭಿಸಿಲ್ಲ.
ಪಾಕ್ದೂ ಇದೇ ಕತೆ
ಶ್ರೀಲಂಕಾ ವಿರುದ್ಧ ವಿಶ್ವಕಪ್ನಲ್ಲಿ ಪ್ರತೀಸಾರಿಯೂ ಗೆದ್ದು ಬೀಗಿರೋ ಇತಿಹಾಸವಿರುವ ಪಾಕಿಸ್ತಾನ ತಂಡಕ್ಕೆ ಭಾರತ ವಿರುದ್ಧ ಅದೇ ಇತಿಹಾಸ ಉಲ್ಟಾ ಹೊಡೆದಂತಿದೆ. ಇಲ್ಲಿ ಪಾಕ್ ತಂಡ ಆಡಿರುವ 6 ಪಂದ್ಯಗಳಲ್ಲಿ ಒಂದೂ ಸಾರಿಯೂ ಭಾರತದೆದುರು ಜಯಿಸಿಲ್ಲ. ಈ ಬಾರಿಯೂ ಪಾಕ್ ಎದುರು ಮೇಲುಗೈ ವಿಶ್ವಾಸವನ್ನು ಕೊಹ್ಲಿ ಬಳಗ ಹೊಂದಿದೆ.
ತಿರುಗಿಬಿದ್ದ ಪಾಕ್
ವಿಶ್ವಕಪ್ 2019ರ ಎರಡನೇ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಹೀನಾಯ ಸೋಲ ಕಂಡ ಸರ್ಫರಾಜ್ ಅಹಮ್ಮದ್ ಬಳಗ ಅನಂತರ ಚೇತರಿಸಿಕೊಂಡಿತ್ತು. ಮುಂದಿನ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ಗೆ ಸೋಲಿನ ಆಘಾತವನ್ನೂ ನೀಡಿತ್ತು. ಸದ್ಯದ ಸ್ಥಿತಿಯಲ್ಲಿ ಪಾಕಿಸ್ತಾನವನ್ನು ತೀರಾ ಕಡೆಗಣಿಸುವಂತಿಲ್ಲ. ಒಟ್ಟಿನಲ್ಲಿ ಜೂನ್ 16ರಂದಿನ ಭಾರತ-ಪಾಕ್ ಮುಖಾಮುಖಿ ಕುತೂಹಲ ಮೂಡಿಸಿದೆ.