ಎಳವೆಯಲ್ಲೇ ಕೈ ಬೆರಳು ಕಟ್
ತಾನು ಕೈಬೆರಳು ಕಳೆದುಕೊಂಡಿದ್ದರ ಬಗ್ಗೆ ಮತ್ತು ಅದರಿಂದ ತಾನು ಅನುಭವಿಸಿದ ಕಷ್ಟಗಳ ಬಗ್ಗೆ ಪಾರ್ಥಿವ್ ಪಟೇಲ್ ಇನ್ಸ್ಟಾಗ್ರಾಮ್ ಲೈವ್ ವೀಡಿಯೋದಲ್ಲಿ ಹೇಳಿಕೊಂಡಿದ್ದಾರೆ. 6ರ ಹರೆಯದ ಬಾಲಕನಾಗಿದ್ದಾಗಲೇ ಪಾರ್ಥಿವ್ ತನ್ನ ಒಂದು ಕಿರುಬೆರಳನ್ನು ಕಳೆದುಕೊಂಡಿದ್ದರು. ಆದರೆ ಪಟೇಲ್ಗೆ 9 ಕೈಬೆರಳು ಇರುವ ವಿಚಾರ ಅನೇಕರಿಗೆ ಗೊತ್ತಿಲ್ಲ.
ಬೆರಳು ಕಳೆದುಕೊಂಡಿದ್ದೇಗೆ?
ಸದ್ಯ ಬರೀ 9 ಕೈ ಬೆರಳುಗಳನ್ನು ಹೊಂದಿರುವ ಪಾರ್ಥಿವ್ ಪಟೇಲ್ ತನ್ನ ಕೈ ಬೆರಳು ಕಳೆದುಕೊಂಡಿದ್ದೇಗೆ ಎಂದು ವೀಡಿಯೋದಲ್ಲಿ ಹೇಳಿಕೊಂಡಿದ್ದಾರೆ. 'ನಾನು 6 ವರ್ಷದವನಾಗಿದ್ದಾಗ ಬಾಗಿಲಿನ ಸಂದಿಗೆ ಕೈ ಬೆರಳು ಸಿಲುಕಿ ತುಂಡಾಯಿತು,' ಎಂದು ಪಾರ್ಥಿವ್ ಭಾವನಾತ್ಮಕ ಕ್ಷಣ ಸ್ಮರಿಸಿಕೊಂಡರು.
ಗ್ಲೌಸ್ಗೆ ಟೇಪ್ ಕಟ್ಟುತ್ತಿದ್ದೆ
'ಕಿರುಬೆರಳು ತುಂಡಾಗಿದ್ದರಿಂದ ಕೀಪಿಂಗ್ ಮಾಡೋಕೆ ಕಷ್ಟ ಅನ್ನಿಸುತ್ತಿತ್ತು. ಯಾಕೆಂದರೆ ಕೊನೇ ಬೆರಳು ಗ್ಲೌಸ್ನಲ್ಲಿ ಸರಿಯಾಗಿ ಕೂರುತ್ತಿರಲಿಲ್ಲ. ಹೀಗಾಗಿ ನಾನು ಗ್ಲೌಸ್ನ ಕೆಳಭಾಗದಲ್ಲಿ ಟೇಪ್ ಹಾಕುತ್ತಿದ್ದೆ. ಒಂದು ವೇಳೆ ನನ್ನ ಎಲ್ಲಾ ಕೈ ಬೆರಳುಗಳು ಇದ್ದಿದ್ದರೆ ಹೇಗಿರುತ್ತಿತ್ತು ಅಂತ ನಾನು ಅನೇಕ ಬಾರಿ ಯೋಚಿಸಿದ್ದೇನೆ. ಏನೇ ಇರಲಿ; 9 ಕೈ ಬೆರಳುಗಳಲ್ಲಿ ನಾನು ಟೀಮ್ ಇಂಡಿಯಾ ಪ್ರತಿನಿಧಿಸಿದ್ದೇನೆ ಅಂದುಕೊಳ್ಳೋದಕ್ಕೆ ಖುಷಿ ಅನ್ನಿಸುತ್ತೆ,' ಎಂದು ಪಾರ್ಥಿವ್ ಖುಷಿಯಲ್ಲಿ ನುಡಿದಿದ್ದಾರೆ.
ಪಾರ್ಥಿವ್ ಪಟೇಲ್ ಸಾಧನೆ
2002ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ್ದ ಪಾರ್ಥಿವ್, 2018ರಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಕಡೇಯ (ಟೆಸ್ಟ್) ಪಂದ್ಯವನ್ನಾಡಿದ್ದರು. 2016-17ರ ರಣಜಿಯಲ್ಲಿ ಪಾರ್ಥಿವ್ ನಾಯಕತ್ವದಲ್ಲಿ ಗುಜರಾತ್ ತಂಡ ಟ್ರೋಫಿ ಗೆದ್ದಿತ್ತು. ಆವತ್ತು ಫೈನಲ್ನಲ್ಲಿ ಮುಂಬೈ ವಿರುದ್ಧ ಪಟೇಲ್ ಕ್ರಮವಾಗಿ 90 ಮತ್ತು 143 ರನ್ ಬಾರಿಸಿದ್ದರು. ಭಾರತ ಪರ ಪಾರ್ಥಿವ್ 25 ಟೆಸ್ಟ್ ಪಂದ್ಯಗಳಲ್ಲಿ 934 ರನ್, 38 ಏಕದಿನ ಪಂದ್ಯಗಳಲ್ಲಿ 736 ರನ್ ಗಳಿಸಿದ್ದಾರೆ.