ಜಡ್ಡು ಚೆನ್ನೈ ಬಿಡಲಿದ್ದಾರೆ ಎಂಬುದಕ್ಕೆ ಇವೇ ಸಾಕ್ಷಿ
ಜಡೇಜಾ ಚೆನ್ನೈ ತಂಡ ಬಿಡುತ್ತಾರೆ ಎಂಬುದಕ್ಕೆ ಈ ಕೆಳಕಂಡ ಬೆಳವಣಿಗೆಗಳೇ ಸಾಕ್ಷಿ
* ರವೀಂದ್ರ ಜಡೇಜಾ ಕಳೆದ ಇಂಡಿಯನ್ ಪ್ರೀಮಿಯರ್ ಲೀಗ್ ಮುಕ್ತಾಯವಾದ ನಂತರ ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿ ಜೊತೆ ಆನ್ಲೈನ್ ಅಥವಾ ಆಫ್ಲೈನ್ ಸಂಪರ್ಕಕ್ಕಾಗಲಿ ಸಿಕ್ಕಿಲ್ಲ.
* ಇನ್ನು ಜಡೇಜಾ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಇನ್ಸ್ಟಾಗ್ರಾಮ್ನಲ್ಲಿ ಅನ್ಫಾಲೋ ಮಾಡಿದ್ದಾರೆ ಹಾಗೂ ಪ್ರತಿಯಾಗಿ ಚೆನ್ನೈ ಸೂಪರ್ ಕಿಂಗ್ಸ್ ಕೂಡ ರವೀಂದ್ರ ಜಡೇಜಾರನ್ನು ಅನ್ಫಾಲೋ ಮಾಡಿದೆ. ಇಷ್ಟು ದಿನ ಆನ್ಲೈನ್ನಲ್ಲಿ ಚೆನ್ನಾಗಿಯೇ ಇದ್ದ ಸಂಬಂಧ ಇದೀಗ ಹಾಳಾಗಿರುವುದು ಬಿರುಕಿಗೆ ಪ್ರಮುಖ ಸಾಕ್ಷಿ ಎನ್ನಬಹುದು.
* ಇನ್ನು ರವೀಂದ್ರ ಜಡೇಜಾ ಚೆನ್ನೈ ಸೂಪರ್ ಕಿಂಗ್ಸ್ ಕುರಿತಾಗಿ ಈ ಹಿಂದೆ ಹಂಚಿಕೊಂಡಿದ್ದ ಎಲ್ಲಾ ಪೋಸ್ಟ್ಗಳನ್ನೂ ಸಹ ಡಿಲೀಟ್ ಮಾಡಿದ್ದಾರೆ.
* ಅಷ್ಟೇ ಅಲ್ಲದೇ ಚೆನ್ನೈ ಸೂಪರ್ ಕಿಂಗ್ಸ್ ಎಂ ಎಸ್ ಧೋನಿ ಹುಟ್ಟುಹಬ್ಬದ ಅಂಗವಾಗಿ ಮಾಡಿದ್ದ ಶುಭಾಶಯದ ವಿಡಿಯೋದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಎಲ್ಲಾ ಆಟಗಾರರೂ ಕಾಣಿಸಿಕೊಂಡು ಧೋನಿಗೆ ಶುಭಕೋರಿದ್ದರು. ಆದರೆ, ರವೀಂದ್ರ ಜಡೇಜಾ ಮಾತ್ರ ಈ ವಿಡಿಯೋದಲ್ಲಿ ಭಾಗವಹಿಸಿರಲಿಲ್ಲ.
ಹೀಗೆ ಈ ಮೇಲಿನ ಎಲ್ಲಾ ಅಂಶಗಳನ್ನೂ ಸಹ ಗಮನಿಸಿದರೆ ರವೀಂದ್ರ ಜಡೇಜಾ ಚೆನ್ನೈ ಸೂಪರ್ ಕಿಂಗ್ಸ್ನಿಂದ ದೂರ ಸರಿದಿರುವುದು ಬಹುತೇಕ ಖಚಿತ ಎನ್ನಬಹುದು.
ಮುಂದಿನ ಬಾರಿ ಬೇರೆ ಫ್ರಾಂಚೈಸಿ ಪರ ಆಡ್ತಾರೆ ಜಡೇಜಾ
ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಬಿಸಿ ಚರ್ಚೆಗೆ ಒಳಗಾಗಿರುವ ವಿಷಯವೆಂದರೆ ರವೀಂದ್ರ ಜಡೇಜಾ ಮುಂದಿನ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಬಿಟ್ಟು ಬೇರೆ ತಂಡದ ಪರ ಕಣಕ್ಕಿಳಿಯಲಿದ್ದಾರೆ ಎಂಬುದು. ಜಡೇಜಾ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ಸಂಬಂಧ ಬಹುತೇಕ ಕಡಿತಗೊಂಡಿದ್ದು, ಜಡೇಜಾ ಬೇರೆ ತಂಡದ ಪರ ಆಡಲಿದ್ದಾರೆ ಎಂಬ ಸುದ್ದಿಯನ್ನು ಬಲ್ಲ ಮೂಲಗಳು ತಿಳಿಸಿವೆ.
ಯಾವ ತಂಡ ಸೇರಬಹುದು ಜಡೇಜಾ
ಇನ್ನು ಜಡೇಜಾ ಮುಂದಿನ ಬಾರಿ ಬೇರೆ ಫ್ರಾಂಚೈಸಿ ಪರ ಆಡಲಿದ್ದಾರೆ ಎನ್ನುವ ಸುದ್ದಿ ವೈರಲ್ ಆಗುತ್ತಿದ್ದಂತೆ ಜಡೇಜಾ ಬೇರೆ ಯಾವ ತಂಡದ ಪರ ಕಣಕ್ಕಿಳಿಯಬಹುದು ಎಂಬ ಚರ್ಚೆ ಶುರುವಾಗಿವೆ. ಇನ್ನು ರವೀಂದ್ರ ಜಡೇಜಾ ಓರ್ವ ಅದ್ಭುತ ಆಲ್ರೌಂಡರ್ ಆಗಿರುವ ಕಾರಣ ಇತರೆ ತಂಡಗಳು ಜಡೇಜಾರನ್ನು ತಮ್ಮ ತೆಕ್ಕೆಗೆ ಹಾಕಿಕೊಳ್ಳಲು ತುದಿಗಾಲಿನಲ್ಲಿ ನಿಂತಿವೆ.