ಡೆಕ್ಕನ್ ಚಾರ್ಜಸ್ ಪಾಲಾಗಿದ್ದ ರೋಹಿತ್ ಶರ್ಮಾ
ಆರಂಭದಲ್ಲಿ ರೋಹಿತ್ ಶರ್ಮಾ ಡೆಕ್ಕನ್ ಚಾರ್ಜಸ್ ತಂಡದ ಭಾಗವಾಗಿದ್ದರು. ಐಪಿಎಲ್ ಮೊದಲ ಆವೃತ್ತಿಯಿಂದ ಮೂರು ಆವೃತ್ತಿಯಲ್ಲೂ ಶರ್ಮಾ ಡೆಕ್ಕನ್ ಚಾರ್ಜಸ್ ತಂಡದಲ್ಲಿ ಆಡಿದ್ದರು. ಆದರೆ 2011ರ ಆವೃತ್ತಿಗೆ ನಡೆದ ಬಿಡ್ಡಿಂಗ್ನಲ್ಲಿ ಶರ್ಮಾ ಮುಂಬೈ ಇಂಡಿಯನ್ಸ್ ಪಾಲಾಗಿದ್ದರು.
ನಾಯಕತ್ವ ತ್ಯಜಿಸಿದ್ದ ತೆಂಡೂಲ್ಕರ್
ಅಶ್ವಿನ್ ಜೊತೆ ರೋಹಿತ್ ಶರ್ಮಾ ಮಾತನಾಡುತ್ತಾ "2012ರ ಐಪಿಎಲ್ನಲ್ಲಿ ಸಚಿನ್ ತೆಂಡೂಲ್ಕರ್ ನಾಯಕತ್ವ ತ್ಯಜಿಸುವುದಾಗಿ ನಿರ್ಧರಿಸಿದ್ದರು. ಬಳಿಕ ಹರ್ಭಜನ್ ಸಿಂಗ್ ನಾಯಕನಾಗಲಿದ್ದಾರೆ ಎಂದು ಭಾವಿಸಿದ್ದೆ. ಆದರೆ ಆವರನ್ನು ಯಾಕೆ ನಾಯಕನನ್ನಾಗಿ ಮಾಡಿಲ್ಲ ಎಂದು ನನಗೆ ತಿಳಿಯಲಿಲ್ಲ. ಹೀಗಾಗಿ 2012ರ ಆವೃತ್ತಿಗೆ ನಾನು ನಾಯಕನಾಗಬಹುದು ಎಂದುಕೊಂಡಿದ್ದೆ ಎಂದು ಹೇಳಿದರು.
2013ರರಲ್ಲಿ ಪಾಂಟಿಂಗ್ ಸೇರ್ಪಡೆ
"2013ರ ಆವೃತ್ತಿಯಲ್ಲಿ ಮುಂಬೈ ಇಂಡಿಯನ್ಸ್ ಮ್ಯಾನೇಜ್ಮೆಂಟ್ ರಿಕಿ ಪಾಂಟಿಂಗ್ ಅವರನ್ನು ಖರೀದಿಸಿ ನಾಯಕನನ್ನಾಗಿ ನೇಮಿಸಿತ್ತು. ಪಾಂಟಿಂಗ್ ಯುವಕರನ್ನು ಸಾಕಷ್ಟು ಪ್ರೋತ್ಸಾಹಿಸಿದರು. ತಂಡದಲ್ಲಿ ಎಲ್ಲಾ ಆಟಗಾರರು ಬೆರೆತುಕಳ್ಳುವಂತೆ ನೋಡಿಕೊಂಡರು. ಕಿರಿಯ ಆಟಗಾರರಿಗೆ ಅವರು ಸಾಕಷ್ಟು ಸ್ಪೂರ್ತಿಯನ್ನು ತುಂಬಿದರು" ಎಂದು ರೋಹಿತ್ ಶರ್ಮಾ ಆರ್ ಅಶ್ವಿನ್ ಜೊತೆಗೆ ಸಂವಾದದಲ್ಲಿ ಹೇಳಿಕೊಂಡರು.
ಟೂರ್ನಿಯ ಮಧ್ಯದಲ್ಲಿ ನಾಯಕತ್ವ ತ್ಯಜಿಸಿದ ಪಾಂಟಿಂಗ್
ಈ ಸಂವಾದದಲ್ಲಿ ಪಾಂಟಿಂಗ್ ನಾಯಕತ್ವ ತ್ಯಜಿಸಲು ಕಾರಣವೇನೆಂದು ಶರ್ಮಾ ಹೇಳಿದ್ದಾರೆ. "ಟೂರ್ನಿಯಲ್ಲಿ ಪಾಂಟಿಂಗ್ ಹೆಚ್ಚಿನ ರನ್ ಗಳಿಸಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ ನಾಯಕತ್ವ ತೊರೆಯುವ ನಿರ್ಧಾರವನ್ನು ಕೈಗೊಂಡಿದ್ದರು. ವಾಸ್ತವವಾಗಿ 2013ರ ಆವೃತ್ತಿಗೆ ಪಾಂಟಿಂಗ್ ನಾಯಕನ ಜೊತೆಗೆ ತಂಡದ ಕೋಚ್ ಆಗಿಯೂ ಇದ್ದರು ಎಂದು ರೊಹಿತ್ ವಿವರಿಸಿದ್ದಾರೆ.
ಟೂರ್ನಿಯ ಅರ್ಧದಲ್ಲಿ ಅರಸಿ ಬಂತು ನಾಯಕತ್ವ
ಐಪಿಎಲ್ ಟೂರ್ನಿ ಆಗಿನ್ನೂ ಅರ್ಧದಲ್ಲಿ ನಡೆಯುತ್ತಿತ್ತು. ನನ್ನನ್ನು ಬಳಿಗೆ ಕರೆದು ನಾಯಕತ್ವ ತೊರೆಯುತ್ತಿರುವ ಸಂಗತಿಯನ್ನು ಪಾಂಟಿಂಗ್ ಹೇಳಿಕೊಂಡರು. ಅದಾದ ಬಳಿಕ ಮುಂಬೈ ಇಂಡಿಯನ್ಸ್ ಮ್ಯಾನೇಜ್ಮೆಂಟ್ ನನ್ನನ್ನು ನಾಯಕನನ್ನಾಗಿ ಆಯ್ಕೆ ಮಾಡಿತ್ತು ಎಂದು ರೋಹಿತ್ ಶರ್ಮಾ ವಿವರಿಸಿದರು. ಹೀಗೆ 2013ರಲ್ಲಿ ಟೂರ್ನಿಯ ಮಧ್ಯಭಾಗದಿಂದ ಮುಂಬೈ ತಂಡದ ಮುಂದಾಳತ್ವ ವಹಿಸಿಕೊಂಡ ಬಗೆಯನ್ನು ರೋಹಿತ್ ಶರ್ಮಾ ಬಿಚ್ಚಿಟ್ಟಿದ್ದಾರೆ. ರಿಕಿ ಪಾಂಟಿಂಗ್ ನನ್ನ ಸಹಾಯಕ್ಕೆ ಎಂದಿಗೂ ಇದ್ದಾರೆ ಎಂದು ಇದೇ ಸಂದರ್ಭದಲ್ಲಿ ಶರ್ಮಾ ಹೇಳಿದ್ದಾರೆ.