87 ಕ್ರಿಕೆಟಿಗರಿಗೆ ಗೌರವ
ಇಲ್ಲೀವರೆಗೆ ಒಟ್ಟಾರೆ 87 ಕ್ರಿಕೆಟಿಗರು ಐಸಿಸಿ ಹಾಲ್ ಆಫ್ ಫೇಮ್ ಗೌರವಕ್ಕೆ ಪಾತ್ರರಾಗಿದ್ದಾರೆ. ಇದರಲ್ಲಿ 28 ಮಂದಿ ಇಂಗ್ಲೆಂಡ್ ಆಟಗಾರರು, 18 ಮಂದಿ ವೆಸ್ಟ್ ಇಂಡೀಸ್ನಿಂದ, ಭಾರತದ 6, 5 ಮಂದಿ ಪಾಕ್ ಕ್ರಿಕೆಟಿಗರು, ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾದಿಂದ ತಲಾ 3 ಮಂದಿ, ಶ್ರೀಲಂಕಾದಿಂದ ಒಬ್ಬರು ಈ ಗೌರವ ಪಡೆದುಕೊಂಡಿದ್ದಾರೆ.
ಅರ್ಹತೆಗೆ ನಿಯಮಗಳಿವೆ
ಐಸಿಸಿ ಹಾಲ್ ಆಫ್ ಫೇಮ್ ಗೌರವ ಲಭಿಸಬೇಕಾದರೆ ಅದಕ್ಕೆ ಕೆಲ ನಿಯಮಗಳಿವೆ. ಬ್ಯಾಟ್ಸ್ಮನ್ ಆಗಿದ್ದರೆ, ಆತ ಏಕದಿನ ಮತ್ತು ಟೆಸ್ಟ್ನಲ್ಲಿ ಒಟ್ಟು 20 ಶತಕಗಳನ್ನು ಸೇರಿಸಿ ಕನಿಷ್ಠ 8,000 ರನ್ ಮಾಡಿರಬೇಕು. ಬೌಲರ್ ಆಗಿದ್ದರೆ, ಕನಿಷ್ಠ 200 ವಿಕೆಟ್ನೊಂದಿಗೆ ಟೆಸ್ಟ್ ನಲ್ಲಿ 50 ಸ್ಟ್ರೈಕ್ ರೇಟ್, ಏಕದಿನದಲ್ಲಿ 30 ಸ್ಟ್ರೈಕ್ ರೇಟ್ ಹೊಂದಿರಬೇಕು.
ಸಾಧನೆ ಸಾಕಾಗುವಷ್ಟಿತ್ತು
ಬ್ಯಾಟ್ಸ್ಮನ್ ಆಗಿ ಗುರುತಿಸಿಕೊಂಡಿದ್ದರಿಂದ ಈ ಯಾದಿಯಲ್ಲಿ ಸಚಿನ್ ಸಾಧನೆ ಹಾಲ್ ಆಫ್ ಫೇಮ್ಗೆ ಸಾಕಾಗುವಷ್ಟಿತ್ತು. ಎಲ್ಲಾ ಮಾದರಿಯ ಕ್ರಿಕೆಟ್ ಸೇರಿ ಒಟ್ಟು 34,357ರನ್ ದಾಖಲೆ ಹೊಂದಿರುವ ತೆಂಡೂಲ್ಕರ್, ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲಿ 100 ಶತಕಗಳ ವಿಶ್ವದಾಖಲೆ ಹೊಂದಿದ್ದಾರೆ. ಆದರೂ ಸಚಿನ್ಗೆ ಈಗಷ್ಟೇ ಐಸಿಸಿ ಹಾಲ್ ಆಫ್ ಫೇಮ್ ಲಭಿಸಿದೆ.
ವಿಳಂಬಕ್ಕೆ ಕಾರಣ
ಹಾಲ್ ಆಫ್ ಫೇಮ್ಗೆ ಅರ್ಹರಾಗಿದ್ದರೂ ಸಚಿನ್ ಅವರನ್ನು ಐಸಿಸಿಯ ಇನ್ನೊಂದು ನಿಯಮ ತಡೆದಿತ್ತು. ಅದೇನೆಂದರೆ ಈ ಗೌರವ ಲಭಿಸಬೇಕಾದರೆ ಕ್ರಿಕೆಟಿಗನೊಬ್ಬ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಹೇಳಿ 5 ವರ್ಷ ಕಳೆದಿರಬೇಕು. ಹೀಗಾಗಿಯೇ 2008ರಲ್ಲಿ ನಿವೃತ್ತಿ ನೀಡಿದ್ದ ಕುಂಬ್ಳೆ, 2012ರಲ್ಲಿ ಕ್ರಿಕೆಟ್ ವೃತ್ತಿಗೆ ವಿದಾಯ ಹೇಳಿದ್ದ ದ್ರಾವಿಡ್ ಸಚಿನ್ಗಿಂತ ಮೊದಲು ಐಸಿಸಿ ಹಾಲ್ ಆಫ್ ಫೇಮ್ ಆಗಿ ಗುರುತಿಸಿಕೊಂಡಿದ್ದಾರೆ. ಸಚಿನ್ ನಿವೃತ್ತಿ ಹೇಳಿದ್ದು 2013ರಲ್ಲಿ!