142 ವರ್ಷಗಳ ಇತಿಹಾಸ
ಬರೀ ಬಿಳಿ ಬಣ್ಣದಲ್ಲಿರುವ ಟೆಸ್ಟ್ ಜೆರ್ಸಿಯಲ್ಲಿ ಬದಲಾವಣೆ ತರಲು ಪ್ರಸ್ತಾಪ ಸಲ್ಲಿಸಲಾಗಿರುವುದರಿಂದ ಇನ್ಮುಂದೆ ಟೆಸ್ಟ್ ಜೆರ್ಸಿಯಲ್ಲೂ ಏಕದಿನ ದಿನ ಮತ್ತು ಟಿ20ಯಲ್ಲಿರುವಂತೆ ಆಟಗಾರರ ಹೆಸರು ಮತ್ತು ಜೆರ್ಸಿ ಸಂಖ್ಯೆ ಕಾಣಸಿಗಲಿದೆ. ಒಟ್ಟಿನಲ್ಲಿ 1877ರಲ್ಲಿ ಮೆಲ್ಬರ್ನ್ನಲ್ಲಿ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ತಂಡಗಳ ನಡುವೆ ನಡೆದ ಮೊದಲ ಟೆಸ್ಟ್ ಪಂದ್ಯದಿಂದಲೂ ಪಾಲಿಸಿಕೊಂಡು ಬಂದಿದ್ದ ಸಂಪ್ರದಾಯವೊಂದು ಕೊನೆಗೊಳ್ಳುವುದರಲ್ಲಿದೆ.
ಇಂಗ್ಲೆಂಡ್-ಆಸ್ಟ್ರೇಲಿಯಾದಿಂದ ಪ್ರಸ್ತಾಪ
ಟೆಸ್ಟ್ ಕ್ರಿಕೆಟ್ ಆರಂಭಿಕ ಪಂದ್ಯದಲ್ಲಿ ಪಾಲ್ಗೊಂಡಿದ್ದ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ತಂಡಗಳೇ ಟೆಸ್ಟ್ ಕ್ರಿಕೆಟ್ನ ಈ ಸಂಪ್ರದಾಯ ಮುರಿಯಲು ಸಜ್ಜಾಗಿವೆ. ಎರಡೂ ತಂಡಗಳು ಟೆಸ್ಟ್ ಜೆರ್ಸಿ ಮೇಲೆ ಆಟಗಾರರ ಹೆಸರು, ಜೆರ್ಸಿ ಸಂಖ್ಯೆ ತರುವ ಬಗ್ಗೆ ಐಸಿಸಿಗೆ ಪ್ರಸ್ತಾಪ ಸಲ್ಲಿಸಿವೆ.
ಇನ್ನೂ ಒಪ್ಪಿಗೆ ಸಿಕ್ಕಿಲ್ಲ
ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ಸಲ್ಲಿಸಿರುವ ಈ ಪ್ರಸ್ತಾಪಕ್ಕೆ ಐಸಿಸಿಯಿಂದ ಇನ್ನೂ ಒಪ್ಪಿಗೆ ಲಭಿಸಿಲ್ಲ. ಆದರೆ ಒಪ್ಪಿಗೆ ಸಿಗುವ ಸಾಧ್ಯತೆಯಿದೆ. ಒಂದು ವೇಳೆ ಟೆಸ್ಟ್ ಜೆರ್ಸಿಯಲ್ಲಿ ಬದಲಾವಣೆ ತರಲು ಐಸಿಸಿಯಿಂದ ಒಪ್ಪಿಗೆ ಸಿಕ್ಕರೆ, ಆಗಸ್ಟ್ 1ರಿಂದ ಆರಂಭಗೊಳ್ಳಲಿರುವ ಐಸಿಸಿ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಇಂಗ್ಲೆಂಡ್ ಮತ್ತು ಆಸೀಸ್ ತಂಡಗಳು ನೂತನ ಜೆರ್ಸಿಯೊಂದಿಗೆ ಪ್ರಥಮ ಬಾರಿಗೆ ಮೈದಾನಕ್ಕಿಳಿಯಲಿದೆ.
ಬದಲಾವಣೆ ಯಾಕೆ ಬೇಕು?
ಟೆಸ್ಟ್ ಕ್ರಿಕೆಟ್ಗಳ ಬಗ್ಗೆ ಒಲವನ್ನು ಹೊಂದಿರುವ ಕ್ರಿಕೆಟ್ ಅಭಿಮಾನಿಗಳು ಈಗಲೂ ದೊಡ್ಡ ಸಂಖ್ಯೆಯಲ್ಲಿದ್ದಾರೆ. ಬಿಳಿಯ ಬಣ್ಣದ ಜೆರ್ಸಿಯಲ್ಲಿ ಆಟಗಾರರ ಹೆಸರು ಮತ್ತು ಸಂಖ್ಯೆಯನ್ನು ನಮೂದಿಸಿದರೆ ಮೈದಾನದಲ್ಲಿರುವ ಆಟಗಾರರನ್ನು ಗುರುತಿಸೋದು ಸುಲಭವಾಗಲಿದೆ. ಹೀಗಾಗಿ ಜೆರ್ಸಿಯಲ್ಲಿ ಬದಲಾವಣೆ ತರುವ ಪ್ರಸ್ತಾಪಕ್ಕೆ ಐಸಿಸಿಯಿಂದ ಒಪ್ಪಿಗೆಯೂ ಸಿಗುವುದರಲ್ಲಿದೆ.