WTC ಫೈನಲ್‌ ಜೆರ್ಸಿ ಹರಾಜಿಗಿಟ್ಟ ಟಿಮ್ ಸೌಥೀ, ಕಾರಣ ಕೇಳಿದ್ರೆ ಮನ ಕರಗುತ್ತೆ!

ವಿಶ್ವ ಶ್ರೇಷ್ಠ ವೇಗಿಗಳಲ್ಲಿ ಸೌಥೀ

WTC ಫೈನಲ್‌ನಲ್ಲಿ ಭಾರತದ ವಿರುದ್ಧ ಉತ್ತಮ ಪ್ರದರ್ಶನ ನೀಡಿದ್ದ ನ್ಯೂಜಿಲೆಂಡ್‌ ಪ್ರಮುಖ 4 ವೇಗಿಗಳಲ್ಲಿ ಸೌಥೀ ಕೂಡ ಒಬ್ಬರಾಗಿದ್ದರು. ಆ ನಾಲ್ಕು ವೇಗಿಗಳೆಂದರೆ ಕೈಲ್ ಜೇಮಿಸನ್, ಟ್ರೆಂಟ್ ಬೌಲ್ಟ್, ನೀಲ್‌ ವ್ಯಾಗ್ನರ್ ಮತ್ತು ಟಿಮ್ ಸೌಥೀ. ಬೌಲ್ಟ್, ಜೇಮಿಸನ್, ಸೌಥೀ, ವ್ಯಾಗ್ನರ್ ವಿಶ್ವದ ಅತ್ಯುತ್ತಮ ಬೌಲರ್‌ಗಳು ಎಂದು ಕಿವೀಸ್ ಬೌಲಿಂಗ್‌ ಕೋಚ್ ಶೇನ್ ಜುರ್ಗೆನ್ಸನ್ ಕೂಡ ಹೇಳಿದ್ದರು. ಇದಕ್ಕೆ ಸಾಕ್ಷಿ ಎಂಬಂತೆ ಟೆಸ್ಟ್‌ನಲ್ಲಿ ಸೌಥೀ 314 ವಿಕೆಟ್ (28.22 ಸರಾಸರಿ), ಬೌಲ್ಟ್ 292 (27.67), ವ್ಯಾಗ್ನರ್ 229 (26.40), ಜೇಮಿಸನ್ 46 (14.17) ವಿಕೆಟ್‌ ಪಡೆದಿದ್ದಾರೆ.

ಜೆರ್ಸಿ ಹರಾಜಿಗಿಡಲು ಕಾರಣ?

WTC ಫೈನಲ್‌ ಪಂದ್ಯದಲ್ಲಿ ಆಡುವಾಗ ಟಿಮ್ ಸೌಥೀ ಧರಿಸಿದ್ದ ಜೆರ್ಸಿಯನ್ನು ಹರಾಜಿಗಿಟ್ಟಿದ್ದಾರೆ. ಇದರ ಹಿಂದೊಂದು ಒಳ್ಳೆಯ ಉದ್ದೇಶವಿದೆ. ಕ್ಯಾನ್ಸರ್ ಖಾಯಿಲೆಯಿಂದ ಬಳಲುತ್ತಿರುವ 8 ವರ್ಷದ ಹೆಣ್ಣು ಮಗುವಿನ ಚಿಕಿತ್ಸೆಗೆ ಹಣ ಸಂಗ್ರಹಿಸಲು ಸೌಥೀ ಜೆರ್ಸಿ ಹರಾಜಿಗಿಟ್ಟಿದ್ದಾರೆ. ಸೌಥೀಯ ಇಂಥ ಮಾನವೀಯ ನಡೆ ಕ್ರಿಕೆಟ್ ಪ್ರೇಮಿಗಳ ಮನಕೆ ತಾಗಿದೆ. ಎಲ್ಲೆಡೆ ಸೌಥೀ ಬಗ್ಗೆ ಮೆಚ್ಚುಗೆ ವ್ಯಕ್ತವಾಗಿದೆ.

ಜೆರ್ಸಿಯಲ್ಲಿ 15 ಮಂದಿಯ ಹೆಸರು

ಮಗುವಿನ ಕ್ಯಾನ್ಸರ್ ಚಿಕಿತ್ಸೆಗಾಗಿ ಸೌಥೀ ಹರಾಜಿಗಿಟ್ಟಿರುವ ಜೆರ್ಸಿಯಲ್ಲಿ WTC ಫೈನಲ್‌ ಪಂದ್ಯಕ್ಕಾಗಿ ನ್ಯೂಜಿಲೆಂಡ್‌ ಹೆಸರಿಸಿದ್ದ 15 ಆಟಗಾರರ ಸಹಿಗಳಿವೆ. ಆ ಆಟಗಾರರೆಂದರೆ ಟಾಮ್ ಲ್ಯಾಥಮ್, ಡೆವೋನ್ ಕಾನ್ವೇ, ಕೇನ್ ವಿಲಿಯಮ್ಸನ್, ರಾಸ್ ಟೇಲರ್, ಹೆನ್ರಿ ನಿಕೋಲ್ಸ್, ಬಿಜೆ ವಾಟ್ಲಿಂಗ್, ಕಾಲಿನ್‌ ಡಿ ಗ್ರ್ಯಾಂಡ್‌ಹೋಮ್, ಕೈಲ್ ಜೇಮಿಸನ್, ನೀಲ್ ವ್ಯಾಗ್ನರ್, ಟಿಮ್ ಸೌಥೀ, ಟ್ರೆಂಟ್ ಬೌಲ್ಟ್, ಅಜಾಝ್ ಪಟೇಲ್, ವಿಲ್ ಯಂಗ್, ಟಾಮ್ ಬ್ಲಂಡೆಲ್, ಮ್ಯಾಟ್‌ ಹೆನ್ರಿ.