1. ವಿರಾಟ್ ಕೊಹ್ಲಿ
ಟೀಮ್ ಇಂಡಿಯಾ ನಾಯಕ, ರನ್ ಮೆಷೀನ್ ಎಂದು ಕರೆಸಿಕೊಳ್ಳುವ ವಿರಾಟ್ ಕೊಹ್ಲಿ, ಏಕದಿನದಲ್ಲಿ ಅತೀವೇಗವಾಗಿ 10000 ರನ್ ಬಾರಿಸಿದ ವಿಶ್ವ ದಾಖಲೆ ಹೊಂದಿದ್ದಾರೆ. ಈ ದಾಖಲೆ ಮೊದಲು ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿತ್ತು. ಆದರೆ ಕೇವಲ 205 ಇನ್ನಿಂಗ್ಸ್ಗಳಲ್ಲಿ 10 ಸಾವಿರ ರನ್ ಗಳಿಸಿದ ಕೊಹ್ಲಿ ಸಚಿನ್ ದಾಖಲೆ ಸರಿಗಟ್ಟಿದ್ದರು. 2018ರಲ್ಲಿ ಅಕ್ಟೋಬರ್ 24ರಂದು ವಿಶಾಖಪಟ್ಟಣದಲ್ಲಿ ನಡೆದಿದ್ದ ವೆಸ್ಟ್ ಇಂಡೀಸ್ ವಿರುದ್ಧ ಪಂದ್ಯದಲ್ಲಿ ಕೊಹ್ಲಿ ಈ ಮೈಲಿಗಲ್ಲು ಸ್ಥಾಪಿಸಿದ್ದರು. ಈ ದಾಖಲೆಗಾಗಿ ಕೊಹ್ಲಿ 10 ವರ್ಷ 67 ದಿನಗಳನ್ನು ವ್ಯಯಿಸಿದ್ದರು. ಒಟ್ಟಾರೆ ಕೊಹ್ಲಿ 59.33ರ ಸರಾಸರಿಯಲ್ಲಿ 11,867 ರನ್ ಗಳಿಸಿದ್ದಾರೆ. ಇದರಲ್ಲಿ 43 ಶತಕಗಳು ಸೇರಿವೆ.
2 ಸಚಿನ್ ತೆಂಡೂಲ್ಕರ್
'ಕ್ರಿಕೆಟ್ ದೇವರು' ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿ ಈಗಲೂ ಅನೇಕ ದಾಖಲೆಗಳಿವೆ. ಏಕದಿನದಲ್ಲಿ 10000 ರನ್ಗಾಗಿ ಸಚಿನ್ 259 ಇನ್ನಿಂಗ್ಸ್ಗಳನ್ನು ಬಳಸಿಕೊಂಡಿದ್ದರು. ಇಂದೋರ್ನಲ್ಲಿ 2001ರ ಮಾರ್ಚ್ 31ರಂದು ನಡೆದಿದ್ದ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಸಚಿನ್ ಈ ದಾಖಲೆ ನಿರ್ಮಿಸಿದ್ದರು. ಈ ದಾಖಲೆಗಾಗಿ ಸಚಿನ್ 11 ವರ್ಷ, 103 ದಿನಗಳನ್ನು ಬಳಸಿಕೊಂಡಿದ್ದರು. ಒಟ್ಟಾರೆ ಸಚಿನ್ ಏಕದಿನದಲ್ಲಿ 18,426 ರನ್ ಗಳಿಸಿದ್ದಾರೆ. ಇದರಲ್ಲಿ 49 ಶತಕಗಳು, 96 ಅರ್ಧ ಶತಕಗಳು ಸೇರಿವೆ.
3. ಸೌರವ್ ಗಂಗೂಲಿ
ಬಂಗಾಳ ಹುಲಿ ಖ್ಯಾತಿಯ ಟೀಮ್ ಇಂಡಿಯಾ ಮಾಜಿ ನಾಯಕ ಸೌರವ್ ಗಂಗೂಲಿ 263 ಇನ್ನಿಂಗ್ಸ್ಗಳಲ್ಲಿ ಏಕದಿನ 10,000 ರನ್ ಬಾರಿಸಿದ್ದಾರೆ. ತನ್ನ 15 ವರ್ಷಗಳ ವೃತ್ತಿ ಬದುಕಿನಲ್ಲಿ, 13 ವರ್ಷ 204 ದಿನಗಳನ್ನು ಬಳಸಿ ದಾದಾ ಏಕದಿನ 10 ಸಾವಿರ ರನ್ ದಾಖಲೆ ಪೂರೈಸಿದ್ದರು. 2005ರಲ್ಲಿ ಶ್ರೀಲಂಕಾದ ದಂಬುಲ್ಲದಲ್ಲಿ ಲಂಕಾ ವಿರುದ್ಧ ಈ ದಾಖಲೆ ಮಾಡಿದ್ದರು. ಒಟ್ಟು 311 ಏಕದಿನ ಇನ್ನಿಂಗ್ಸ್ಗಳನ್ನಾಡಿರುವ ಗಂಗೂಲಿ, 41.02ರ ಸರಾಸರಿಯಲ್ಲಿ 11,363 ರನ್ ಬಾರಿಸಿದ್ದಾರೆ.
4. ರಿಕಿ ಪಾಂಟಿಂಗ್
ಆಸ್ಟ್ರೇಲಿಯಾದ ಆಲ್ ಟೈಮ್ ಬೆಸ್ಟ್ ಬ್ಯಾಟ್ಸ್ಮನ್, ಮಾಜಿ ನಾಯಕ ರಿಕಿ ಪಾಂಟಿಂಗ್, ಏಕದಿನದಲ್ಲಿ ಅತೀ ವೇಗದ 10000 ರನ್ ದಾಖಲೆ ಪಟ್ಟಿಯಲ್ಲಿ 4ನೇ ಸ್ಥಾನದಲ್ಲಿದ್ದಾರೆ. ಒಟ್ಟು 266 ಇನ್ನಿಂಗ್ಸ್ಗಳಲ್ಲಿ ಪಾಂಟಿಂಗ್ ಈ ಸಾಧನೆ ಮೆರೆದಿದ್ದಾರೆ. ಪಾಂಟಿಂಗ್ ಒಟ್ಟಿಗೆ 16 ವರ್ಷಗಳ ಕಾಲ ಏಕದಿನ ವೇತ್ತಿ ಜೀವನ ಕಳೆದಿದ್ದಾರೆ. 12 ವರ್ಷ 37 ದಿನಗಳಲ್ಲಿ ಪಾಂಟಿಂಗ್ ಒಡಿಐ 10 ಸಾವಿರ ಮೈಲಿಗಲ್ಲು ತಲುಪಿದರು. ದಕ್ಷಿಣ ಆಫ್ರಿಕಾ ವಿರುದ್ಧ ಬಾಸ್ಸೆಟೆರೆಯಲ್ಲಿ 2007ರಲ್ಲಿ ನಡೆದಿದ್ದ ಪಂದ್ಯದಲ್ಲಿ ರಿಕಿ ಈ ದಾಖಲೆ ಬರೆದಿದ್ದರು. ಒಟ್ಟಿಗೆ 375 ಏಕದಿನ ಪಂದ್ಯಗಳಲ್ಲಿ ರಿಕಿ 13,704 ರನ್ ಬಾರಿಸಿದ್ದಾರೆ. ಇದರಲ್ಲಿ 30 ಶತಕಗಳು ಸೇರಿವೆ.
5. ಜಾಕ್ ಕ್ಯಾಲೀಸ್
ದಕ್ಷಿಣ ಆಫ್ರಿಕಾದ ದಂತಕತೆ ಜಾಕ್ ಕ್ಯಾಲೀಸ್ ಒಟ್ಟು 18 ವರ್ಷ ಏಕದಿನ ವೃತ್ತಿ ಬದುಕು ಕಂಡಿದ್ದಾರೆ. 272 ಇನ್ನಿಂಗ್ಸ್ಗಳಲ್ಲಿ ಕ್ಯಾಲೀಸ್ 10000 ರನ್ ಪೂರೈಸಿಕೊಂಡಿದ್ದಾರೆ. ಇದಕ್ಕಾಗಿ 13 ವರ್ಷ 14 ದಿನಗಳನ್ನು ಕ್ಯಾಲೀಸ್ ಬಳಸಿಕೊಂಡಿದ್ದಾರೆ. 2009ರಲ್ಲಿ ಸಿಡ್ನಿಯಲ್ಲಿ ನಡೆದಿದ್ದ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಜಾಕ್ ಈ ದಾಖಲೆ ಬರೆದಿದ್ದರು. ಆಫ್ರಿಕಾ ಆಲ್ ರೌಂಡರ್ ಕ್ಯಾಲೀಸ್, ಏಕದಿನದಲ್ಲಿ 11,579 ರನ್, 273 ವಿಕೆಟ್ ದಾಖಲೆ ಹೊಂದಿದ್ದಾರೆ.