ಭಾರತ ತಂಡದಿಂದ ಹೊರಬಿದಿದ್ದಕ್ಕೆ ಸಿಟ್ಟಾ?
ಈ ಮೊದಲು ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಭಾರತ ತಂಡದಲ್ಲಿದ್ದ ಪೃಥ್ವಿ ಶಾ ನಿರಾಶದಾಯಕ ಪ್ರದರ್ಶನ ನೀಡಿದ್ದರು. ಹೀಗಾಗಿ ಪೃಥ್ವಿಯನ್ನು ತಂಡದಿಂದ ಹೊರಗಿಡಲಾಗಿತ್ತು. ಸದ್ಯ ನಡೆಯುತ್ತಿರುವ ಇಂಗ್ಲೆಂಡ್-ಭಾರತ ಟೆಸ್ಟ್ ಮತ್ತು ಟಿ20ಐ ಸರಣಿಯಿಂದಲೂ ಪೃಥ್ವಿ ಹೊರಗಿದ್ದಾರೆ. ಬಹುಶಃ ಈ ಬೇಸರವನ್ನೇ ಸ್ಫೂರ್ತಿಯಾಗಿಸಿಕೊಂಡಿರುವ ಫೃಥ್ವಿ, ದೇಶಿ ಕ್ರಿಕೆಟ್ನಲ್ಲಿ ಬಿರುಸಿನ ಬ್ಯಾಟಿಂಗ್ನಿಂದ ಭಾರತದ ಆಯ್ಕೆ ಸಮಿತ ತನ್ನತ್ತ ಮತ್ತೆ ದಿಟ್ಟಿಸುವಂತೆ ಮಾಡಿದ್ದಾರೆ.
ಅಗರ್ವಾಲ್ ದಾಖಲೆ ಬದಿಗೆ
2021ರ ವಿಜಯ್ ಹಜಾರೆ ಫೈನಲ್ನಲ್ಲಿ 73 ರನ್ನೊಂದಿಗೆ ವಿಜಯ್ ಹಜಾರೆ ಸೀಸನ್ ಒಂದರಲ್ಲಿ ಅತೀ ಹೆಚ್ಚು ರನ್ ಗಳಿಸಿದ ಬ್ಯಾಟ್ಸ್ಮನ್ ಎಂಬ ದಾಖಲೆಗೆ ಪೃಥ್ವಿ ಕಾರಣಾಗಿದ್ದಾರೆ. ಈ ಬಾರಿಯ ಸೀಸನ್ನಲ್ಲಿ ಪೃಥ್ವಿ ಒಟ್ಟು 827 ರನ್ ಗಳಿಸಿದಂತಾಗಿದೆ. ಈ ಟೂರ್ನಿಯಲ್ಲಿ ಅತ್ಯಧಿಕ ರನ್ ಪಟ್ಟಿಯಲ್ಲಿ ನಂ.1 ಸ್ಥಾನದಲ್ಲಿರುವ ಶಾ ಕರ್ನಾಟಕ ತಂಡದ ಮಯಾಂಕ್ ಅಗರ್ವಾಲ್ ಹೆಸರಿನಲ್ಲಿದ್ದ ದಾಖಲೆಯನ್ನು ಸರಿಗಟ್ಟಿದ್ದಾರೆ. 2018ರಲ್ಲಿ ಮಯಾಂಕ್ 8 ಇನ್ನಿಂಗ್ಸ್ಗಳಲ್ಲಿ 723 ರನ್ ಬಾರಿಸಿ ಈ ದಾಖಲೆ ನಿರ್ಮಿಸಿದ್ದರು. ಆದರೆ ಪೃಥ್ವಿ 8 ಇನ್ನಿಂಗ್ಸ್ಗಳಲ್ಲಿ 827 ರನ್ ಬಾರಿಸಿದ್ದಾರೆ.
ಪ್ರತೀ ಇನ್ನಿಂಗ್ಸ್ಗಳಲ್ಲಿ ಪೃಥ್ವಿ ಬಾರಿಸಿದ ರನ್
2021ರ ವಿಜಯ್ ಹಜಾರೆ ಟ್ರೋಫಿ ಟೂರ್ನಿಯಲ್ಲಿ ಪ್ರತೀ ಇನ್ನಿಂಗ್ಸ್ನಲ್ಲಿ ಕ್ರಮವಾಗಿ 105* (89 ಎಸೆತ), 34 (38), 227* (152), 36 (30), 2 (5), 185*(123), 73 (39) ರನ್ ಗಳಿಸಿದ್ದಾರೆ. 5 ಟೆಸ್ಟ್ ಪಂದ್ಯಗಳಲ್ಲಿ 339 ರನ್, 3 ಏಕದಿನ ಪಂದ್ಯಗಳಲ್ಲಿ 84 ರನ್, 38 ಐಪಿಎಲ್ ಪಂದ್ಯಗಳಲ್ಲಿ 826 ರನ್ ಬಾರಿಸಿರುವ ಶಾ ಮುಂಬರಲಿರುವ ಐಪಿಎಲ್ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪರ ಆಡುತ್ತಿದ್ದಾರೆ. ಐಪಿಎಲ್ನಲ್ಲೂ ಪೃಥ್ವಿ ಬಿರುಸಿನ ಬ್ಯಾಟಿಂಗ್ ನಡೆಸುವ ನಿರೀಕ್ಷೆಯಿದೆ.