ಭಾರತ ಸೋಲಿಸೋದು ಸುಲಭವಿಲ್ಲ
ಸರಣಿ ಸಮಬಲಗೊಂಡು ನಿರ್ಧಾರಕ ಪಂದ್ಯದಲ್ಲಿ ಭಾರತವನ್ನು ಸೋಲಿಸೋದು ಸುಲಭವಿಲ್ಲ. ಅದರಲ್ಲೂ ತವರಿನಲ್ಲಿ ನಡೆಯುವ ಏಕದಿನ ಪಂದ್ಯಗಳನ್ನು ವಿರಾಟ್ ಕೊಹ್ಲಿ ಬಳಗ ಬಿಟ್ಟುಕೊಟ್ಟಿದ್ದು ತೀರಾ ಕಡಿಮೆ. ಕೊಹ್ಲಿ ನಾಯಕತ್ವದಲ್ಲಿ ಪಾಲ್ಗೊಂಡ 12 ಏಕದಿನ ದ್ವಿಪಕ್ಷೀಯ ಸರಣಿಗಳಲ್ಲಿ ಒಟ್ಟು 11 ಸರಣಿಗಳನ್ನು ಭಾರತವೇ ಗೆದ್ದಿದೆ (ಗಮನಿಸಿ; ಕೆಳಗಿನ ಅಂಕಿಅಂಶಗಳೆಲ್ಲವೂ 2015ರಿಂದ ಈಚಿನ ಸರಣಿಗಳದ್ದು).
ಭಾರತ ಮೇಲುಗೈ
ಅಂತಿಮ ಪಂದ್ಯಕ್ಕೂ ಮುನ್ನ ಸಮಬಲಗೊಂಡಿದ್ದ ಏಕದಿನ ಸರಣಿಯಲ್ಲಿ ಭಾರತ ಗೆದ್ದ ಅಂಕಿ ಅಂಶಗಳನ್ನು ಪರಿಗಣಿಸುವಾಗ ಬರೀ 2015ರಿಂದೀಚಿನ ಸರಣಿಗಳನ್ನಷ್ಟೇ ಗಣನೆಗೆ ತೆಗೆದುಕೊಂಡರೆ; ಆಡಿದ 8 ದ್ವಿಪಕ್ಷೀಯ ಏಕದಿನ ಸರಣಿಗಳಲ್ಲಿ ಟೀಮ್ ಇಂಡಿಯಾ 6ರಲ್ಲಿ ಜಯ ಸಾಧಿಸಿದ್ದ ದಾಖಲೆಯಿದೆ.
ಜಿದ್ದ ಜಿದ್ದಿಯಲ್ಲಿ 2 ಸೋಲು
2015-16ರಲ್ಲಿ ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧ 2-2ರಲ್ಲಿ ನಿಂತಿದ್ದ ಏಕದಿನ ಸರಣಿಯಲ್ಲಿ ಅಂತಿಮ ಪಂದ್ಯವನ್ನು ಸೋತು ಸರಣಿಯನ್ನು ಭಾರತ ಕೈ ಬಿಟ್ಟಿತ್ತು. ಭಾರತ ತಂಡ ಇಂಗ್ಲೆಂಡ್ ಪ್ರವಾಸ ಸರಣಿ ಕೈಗೊಂಡಿದ್ದಾಗ ಆಂಗ್ಲರೆದುರು 1-1ರಲ್ಲಿ ಸಮಬಲಗೊಂಡಿದ್ದ ಏಕದಿನ ಸರಣಿಯನ್ನು ಕೊನೆಯ ಪಂದ್ಯದ ಸೋಲಿನೊಂದಿಗೆ ಕಳೆದುಕೊಂಡಿತ್ತು.
6 ನಾನಾ-ನೀನಾ ಪಂದ್ಯಗಳಲ್ಲಿ ಗೆಲುವು
ಇನ್ನು 2016-17ರಲ್ಲಿ ಪ್ರವಾಸಿ ನ್ಯೂಜಿಲ್ಯಾಂಡ್ ವಿರುದ್ಧದ 2-2ರಲ್ಲಿದ್ದ ಏಕದಿನ ಸರಣಿಯನ್ನು, ವೆಸ್ಟ್ ಇಂಡೀಸ್ ಪ್ರವಾಸದ ವೇಳೆ (2017) 2-1ರಲ್ಲಿದ್ದ ಸರಣಿ (1 ಫಲಿತಾಂಶವಿಲ್ಲ), ಪ್ರವಾಸಿ ನ್ಯೂಜಿಲ್ಯಾಂಡ್ ವಿರುದ್ಧ 1-1ರಲ್ಲಿದ್ದ ಸರಣಿ (2017-18), ಪ್ರವಾಸಿ ಶ್ರೀಲಂಕಾ ವಿರುದ್ಧ 1-1ರಲ್ಲಿದ್ದ ಸರಣಿ (2017-18), ಪ್ರವಾಸಿ ವೆಸ್ಟ್ ಇಂಡೀಸ್ ವಿರುದ್ಧ 2-1ರಲ್ಲಿದ್ದ ಸರಣಿ (2018-19- 1 ಪಂದ್ಯ ಟೈ), ಆಸ್ಟ್ರೇಲಿಯಾ ಪ್ರವಾಸದ ವೇಳೆ 1-1ರಲ್ಲಿದ್ದ ಸರಣಿಯನ್ನು (2018-19) ಭಾರತ ಗೆದ್ದುಕೊಂಡಿದೆ.