ಶತಕವಿಲ್ಲದೇ ಕಳೆಯಲಿದೆ 1000 ದಿನಗಳು
ಇನ್ನು ಕಳೆದ ಎರಡೂವರೆ ವರ್ಷಗಳಿಂದ ಶತಕ ಬಾರಿಸದೇ ವಿಫಲರಾಗಿರುವ ವಿರಾಟ್ ಕೊಹ್ಲಿ ನಿನ್ನೆಗೆ ( ಜುಲೈ 13 ) ತಮ್ಮ ಅಂತಿಮ ಅಂತರರಾಷ್ಟ್ರೀಯ ಶತಕವನ್ನು ಬಾರಿಸಿ 963 ದಿನಗಳನ್ನು ಪೂರೈಸಿದ್ದಾರೆ. 963 ದಿನಗಳು ಕಳೆದರೂ ಸಹ ವಿರಾಟ್ ಕೊಹ್ಲಿ ಬ್ಯಾಟ್ ನಿಂದ 71ನೇ ಶತಕ ಮಾತ್ರ ಹರಿದುಬಂದಿಲ್ಲ. ಈ ಮೂಲಕ ವಿರಾಟ್ ಕೊಹ್ಲಿ ಮುಂಬರುವ ಆಗಸ್ಟ್ 19ನೇ ತಾರೀಖಿನವರೆಗೂ ಯಾವುದೇ ಪಂದ್ಯದಲ್ಲಿಯೂ ಶತಕ ಬಾರಿಸದೇ ಇದ್ದರೆ 1000 ಶತಕ ರಹಿತ ದಿನಗಳನ್ನು ಕಳೆಯಲಿದ್ದಾರೆ. ಹೌದು, ಆಗಸ್ಟ್ 19ಕ್ಕೆ ವಿರಾಟ್ ಕೊಹ್ಲಿ ಬಾರಿಸಿದ 70ನೇ ಶತಕಕ್ಕೆ 1000 ದಿನಗಳಾಗಲಿದ್ದು, ಕೊಹ್ಲಿ ಕೆಟ್ಟ ಮೈಲಿಗಲ್ಲನ್ನು ತಲುಪಲಿದ್ದಾರೆ.
ಈ ಕೆಟ್ಟ ದಾಖಲೆ ತಪ್ಪಿಸಲು ಉಳಿದಿರುವುದು ಎರಡೇ ಅವಕಾಶ
ಇನ್ನು ವಿರಾಟ್ ಕೊಹ್ಲಿ ಈ ಕೆಟ್ಟ ಮೈಲಿಗಲ್ಲನ್ನು ತಪ್ಪಿಸಿಕೊಳ್ಳಲು ಇರುವುದು ಪ್ರಸ್ತುತ ನಡೆಯುತ್ತಿರುವ ಇಂಗ್ಲೆಂಡ್ ವಿರುದ್ಧದ ಏಕದಿನ ಸರಣಿಯ ದ್ವಿತೀಯ ಪಂದ್ಯ ಹಾಗೂ ತೃತೀಯ ಪಂದ್ಯಗಳ ಅವಕಾಶ ಮಾತ್ರ. ಈ ಎರಡೂ ಪಂದ್ಯಗಳಲ್ಲಿಯೂ ವಿರಾಟ್ ಕೊಹ್ಲಿ ಶತಕ ಬಾರಿಸದೇ ಇದ್ದರೆ ಶತಕ ರಹಿತ 1000 ದಿನಗಳನ್ನು ಪೂರೈಸುವುದು ಖಚಿತ. ಏಕೆಂದರೆ ಮುಂಬರುವ ವೆಸ್ಟ್ಇಂಡೀಸ್ ವಿರುದ್ಧದ ಸರಣಿಗಳಲ್ಲಿ ವಿರಾಟ್ ಕೊಹ್ಲಿ ಆಡದೇ ಇರುವುದರಿಂದ 1000 ದಿನಗಳೊಳಗೆ ಶತಕ ಬಾರಿಸುವುದು ಅಸಾಧ್ಯ.
4114 ದಿನಗಳಲ್ಲಿ 70 ಶತಕ ಬಾರಿಸಿದ್ದ ಕೊಹ್ಲಿ
ಹೀಗೆ ಒಂದೇ ಒಂದು ಶತಕ ಬಾರಿಸಲು ಇಷ್ಟು ದಿನಗಳ ಕಾಲ ಪರದಾಡುತ್ತಿರುವ ವಿರಾಟ್ ಕೊಹ್ಲಿ ತಮ್ಮ ಮೊದಲ 70 ಶತಕಗಳನ್ನು 4114 ದಿನಗಳಲ್ಲಿ ಬಾರಿಸಿ ಅಬ್ಬರಿಸಿದ್ದರು. 2019ರ ನವೆಂಬರ್ 23ರಂದು ಬಾಂಗ್ಲಾದೇಶ ವಿರುದ್ಧ ಕೋಲ್ಕತಾದಲ್ಲಿ ನಡೆದಿದ್ದ ಟೆಸ್ಟ್ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅಂತಿಮವಾಗಿ ತಮ್ಮ ಅಂತರರಾಷ್ಟ್ರೀಯ ಶತಕವನ್ನು ಬಾರಿಸಿದ್ದರು.