ಆರ್ಸಿಬಿ ತಂಡಕ್ಕೆ ಹೋದರೆ ಹೆಚ್ಚು ಖುಷಿಯಾಗುತ್ತದೆ
ಆಸ್ಟ್ರೇಲಿಯಾ ಕ್ರಿಕೆಟ್ ಅವಾರ್ಡ್ಸ್ನಲ್ಲಿ ಮಾತನಾಡಿದ ಅಲಿಸ್ಸಾ ಹೀಲಿ, ಮಹಿಳಾ ಐಪಿಎಲ್ ಉದ್ಘಾಟನಾ ಋತುವಿಗೆ ಆರ್ಸಿಬಿ ತನ್ನನ್ನು ಆಯ್ಕೆ ಮಾಡಿದರೆ ಸಂತೋಷವಾಗುತ್ತದೆ ಎಂದು ಹೇಳಿದರು. ಕುತೂಹಲಕಾರಿ ಅಂಶವೆಂದರೆ, ಅಲಿಸ್ಸಾ ಹೀಲಿ ಅವರ ಪತಿ ಮಿಚೆಲ್ ಸ್ಟಾರ್ಕ್ ಕೂಡ ಆರ್ಸಿಬಿ ತಂಡದ ಪರವಾಗಿ ಆಡಿದ್ದರು.
"ಮಹಿಳಾ ಐಪಿಎಲ್ ಹರಾಜಿನಲ್ಲಿ ದೊಡ್ಡ ಮೊತ್ತಕ್ಕೆ ಖರೀದಿಯಾಗಬಹುದೆಂಬ ನಿರೀಕ್ಷೆಯಲ್ಲಿದ್ದೇನೆ. ನಾನು ಹರಾಜಿನಲ್ಲಿ ಹೆಸರು ನೋಂದಾಯಿಸಿದ್ದೇನೆ. ಹಾಗಾಗಿ ಯಾವ ತಂಡಕ್ಕೆ ಹೋಗುತ್ತೇನೆ ಎಂಬ ಕುತೂಹಲವಿದೆ. ಆದರೆ, ಆರ್ಸಿಬಿ ತಂಡಕ್ಕೆ ಹೋದರೆ ಹೆಚ್ಚು ಖುಷಿಯಾಗುತ್ತದೆ," ಎಂದು ಅಲಿಸ್ಸಾ ಹೀಲಿ ತಿಳಿಸಿದರು.
ತಂಡಗಳ ಹಕ್ಕುಗಳು 4669.99 ಕೋಟಿ ರೂ.ಗೆ ಮಾರಾಟ
ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈಗಾಗಲೇ ಮಹಿಳಾ ಪ್ರೀಮಿಯರ್ ಲೀಗ್ನಲ್ಲಿ ಐದು ಫ್ರಾಂಚೈಸಿ ಮಾಲೀಕರ ಹೆಸರನ್ನು ಪ್ರಕಟಿಸಿದೆ. ಬಹು ನಿರೀಕ್ಷಿತ ಮಹಿಳಾ ಐಪಿಎಲ್ ಟೂರ್ನಿಯು ಭಾರತದಲ್ಲಿ ಪುರುಷ ಮತ್ತು ಮಹಿಳಾ ಕ್ರಿಕೆಟ್ ನಡುವಿನ ಅಸಮಾನತೆಯನ್ನು ಕಡಿತಗೊಳಿಸುವ ನಿಟ್ಟಿನಲ್ಲಿ ಒಂದು ದೊಡ್ಡ ಹೆಜ್ಜೆಯಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಪುರುಷರ ಇಂಡಿಯನ್ ಪ್ರೀಮಿಯರ್ ಲೀಗ್ 16ನೇ ಸೀಸನ್ಗೆ ಮುನ್ನ ನಡೆಯುವ ಭಾರತದ ಮಹಿಳಾ ಕ್ರಿಕೆಟ್ ಹಬ್ಬದಲ್ಲಿ ವಿಶ್ವದ ಸ್ಟಾರ್ ಆಟಗಾರ್ತಿಯರಿಗೂ ವೇದಿಕೆ ಕಲ್ಪಿಸಲಿದೆ.
ತಂಡಗಳ ಹಕ್ಕುಗಳನ್ನು 4669.99 ಕೋಟಿ ರೂ.ಗೆ ಮಾರಾಟ ಮಾಡಲಾಗಿದೆ ಎಂದು ಬಿಸಿಸಿಐ ಪ್ರಕಟಿಸಿದ್ದು, ಇದು 2008ರಲ್ಲಿ ನಡೆದ ಪುರುಷರ ಇಂಡಿಯನ್ ಪ್ರೀಮಿಯರ್ ಲೀಗ್ ಹಕ್ಕುಗಳಿಗಿಂತ ಹೆಚ್ಚಿನ ಮೊತ್ತವಾಗಿದೆ.
|
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 901 ಕೋಟಿ ರೂ.
ಅಹಮದಾಬಾದ್ ತಂಡದ ಮಾಲೀಕತ್ವವನ್ನು 1289 ಕೋಟಿ ರೂ.ಗಳಿಗೆ ಅದಾನಿ ಸ್ಪೋರ್ಟ್ಸ್ಲೈನ್ ಖರೀದಿಸಿದ್ದು, ಇದು ಅತ್ಯಂತ ದುಬಾರಿ ಫ್ರಾಂಚೈಸಿಯಾಗಿದೆ. ಮುಂಬೈ ಇಂಡಿಯನ್ಸ್ 912.99 ಕೋಟಿ ರೂ.ಗಳಿಗೆ ಇಂಡಿಯಾವಿನ್ ಸ್ಪೋರ್ಟ್ಸ್ ಪ್ರೈ. ಲಿಮಿಟೆಡ್ ಖರೀದಿಸಿದೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 901 ಕೋಟಿ ರೂ.ಗಳಿಗೆ, ದೆಹಲಿ ಕ್ಯಾಪಿಟಲ್ಸ್ 810 ಕೋಟಿ ರೂ.ಗಳು ಮತ್ತು ಲಕ್ನೋ ಫ್ರಾಂಚೈಸಿಗಾಗಿ ಕ್ಯಾಪ್ರಿ ಗ್ಲೋಬಲ್ ಹೋಲ್ಡಿಂಗ್ಸ್ 757 ಕೋಟಿ ರೂ.ಗಳಿಗೆ ಬಿಡ್ ಖರೀದಿಸಿ ಮಹಿಳಾ ಐಪಿಎಲ್ ಪ್ರವೇಶಿಸಿವೆ.
ಮಹಿಳಾ ಪ್ರೀಮಿಯರ್ ಲೀಗ್ನ ಮಾಧ್ಯಮ ಹಕ್ಕುಗಳನ್ನು 951 ಕೋಟಿ ರೂಪಾಯಿಗಳಿಗೆ Viacom18 ಖರೀದಿಸಿದೆ. ಅಂದರೆ, ಐದು ವರ್ಷಗಳವರೆಗೆ ಪ್ರತಿ ಪಂದ್ಯಕ್ಕೆ 7.09 ಕೋಟಿ ರೂಪಾಯಿಗಳನ್ನು ನೀಡಲಿದೆ.