|
ಬಾಂಧವ್ಯ ಬಲಪಡಿಸಲಿ
ಅಫ್ಘಾನಿಸ್ತಾನದ ಕ್ರಿಕೆಟ್ ತಂಡವು ತನ್ನ ಮೊದಲ ಅಂತರರಾಷ್ಟ್ರೀಯ ಟೆಸ್ಟ್ ಪಂದ್ಯ ಆಡುತ್ತಿರುವುದಕ್ಕೆ ಆಫ್ಘನ್ ಜನತೆಯನ್ನು ಅಭಿನಂದಿಸುತ್ತೇನೆ.
ಅವರ ಐತಿಹಾಸಿಕ ಪಂದ್ಯವನ್ನು ಆಡಲು ಭಾರತವನ್ನು ಆಯ್ಕೆ ಮಾಡಿಕೊಂಡಿರುವುದು ಸಂತಸ ನೀಡಿದೆ. ಎರಡೂ ತಂಡಗಳಿಗೆ ಶುಭ ಹಾರೈಕೆಗಳು! ಕ್ರೀಡೆಯು ನಮ್ಮ ಜನರನ್ನು ಮತ್ತಷ್ಟು ಹತ್ತಿರ ತರುವುದನ್ನು ಮುಂದುವರಿಸಲಿ ಮತ್ತು ಬಾಂಧವ್ಯಗಳನ್ನು ಬಲಪಡಿಸಲಿ ಎಂದು ಮೋದಿ ಆಶಿಸಿದ್ದಾರೆ.
|
ಆಫ್ಘನ್ ಅಧ್ಯಕ್ಷರ ಶುಭಾಶಯ
ಇದು ಐತಿಹಾಸಿಕ ದಿನ. ಎಲ್ಲ ಆಫ್ಘನ್ನರ ಪರವಾಗಿ ಕ್ರಿಕೆಟ್ ಕ್ರೀಡೆಗೆ ಕೊಡುಗೆ ನೀಡಿದ ಅವರಿಗೆ ಧನ್ಯವಾದಗಳನ್ನು ಸಲ್ಲಿಸುತ್ತೇನೆ ಮತ್ತು ಗೌರವ ಅರ್ಪಿಸುತ್ತೇನೆ. ಭಾರತ ಮತ್ತು ಈಗ ಅಫ್ಘಾನಿಸ್ತಾನ ಏಷ್ಯಾದ ಎರಡು ಪ್ರಮುಖ ಕ್ರಿಕೆಟ್ ಶಕ್ತಿಗಳಾಗಿವೆ ಎಂದು ಅಫ್ಘಾನಿಸ್ತಾನದ ಅಧ್ಯಕ್ಷ ಅಶ್ರಫ್ ಘನಿ ಹೇಳಿದ್ದಾರೆ.
|
ಸಲೀಂ ದುರಾನಿ ಆಕರ್ಷಣೆ
ಈ ಟೆಸ್ಟ್ ಪಂದ್ಯದಲ್ಲಿ ಅಫ್ಘಾನಿಸ್ತಾನ ಕೇಂದ್ರ ಬಿಂದು ಆಗಿದ್ದರೂ, ಮೊದಲ ದಿನ ಪ್ರಮುಖ ಆಕರ್ಷಣೆಯಾಗಿದ್ದವರು ಮಾಜಿ ಕ್ರಿಕೆಟಿಗ 83 ವರ್ಷದ ಸಲೀಂ ದುರಾನಿ. 29 ಟೆಸ್ಟ್ ಪಂದ್ಯಗಳನ್ನು ಆಡಿರುವ ಆಲ್ರೌಂಡರ್ ಸಲೀಂ ದುರಾನಿ ಅವರು ಅಫ್ಘಾನಿಸ್ತಾನದಲ್ಲಿ ಜನಿಸಿದ ಭಾರತ ಕ್ರಿಕೆಟ್ ತಂಡದ ಏಕೈಕ ಆಟಗಾರ. ಎಡಗೈ ಸಾಂಪ್ರದಾಯಿಕ ಸ್ಪಿನ್ ಬೌಲರ್ ಆಗಿದ್ದ ಅವರು, ಎಡಗೈ ಬ್ಯಾಟ್ಸ್ಮನ್ ಆಗಿದ್ದರು.
|
ಕನಸಿನ ಪಂದ್ಯ
ಅಫ್ಘಾನಿಸ್ತಾನ ತಂಡದ ಆಟಗಾರರ ಕೆಂಪು ಟೋಪಿಗಳನ್ನು ಸಾಲಾಗಿ ಜೋಡಿಸಿಟ್ಟ ಚಿತ್ರವನ್ನು ಹಾಕಿರುವ ವೀಕ್ಷಕ ವಿವರಣೆಗಾರ ಹರ್ಷ ಭೋಗ್ಲೆ, ಇದು ನೀವು ಕಾಣುತ್ತಿದ್ದ ಕನಸು. ಅಫ್ಘಾನಿಸ್ತಾನಕ್ಕೆ ಮೊದಲ ಟೆಸ್ಟ್ ಪಂದ್ಯ ಎಂದು ಟ್ವೀಟ್ ಮಾಡಿದ್ದಾರೆ.
|
ಶುಭ ಹಾರೈಸಿದ ರಾಥೋರ್
ಕ್ರೀಡೆ ಮತ್ತು ಯುವಜನ ವ್ಯವಹಾರಗಳ ಖಾತೆ ರಾಜ್ಯ ಸಚಿವ ರಾಜ್ಯವರ್ಧನ ಸಿಂಗ್ ರಾಥೋರ್ ಮತ್ತು ಇಸ್ಲಾಮಿಕ್ ರಿಪಬ್ಲಿಕ್ ಆಫ್ ಅಫ್ಘಾನಿಸ್ತಾನದ ಚೀಫ್ ಎಕ್ಸಿಕ್ಯುಟಿವ್ ಅಬ್ದುಲ್ಲಾ ಅಬ್ದುಲ್ಲಾ ಅವರು ಪಂದ್ಯದ ಆರಂಭಕ್ಕೂ ಮುನ್ನ ಉಭಯ ತಂಡಗಳ ಆಟಗಾರರ ಕೈಕುಲುಕಿ ಶುಭ ಹಾರೈಸಿದರು.
|
ಕೊನೆಗೂ ಬಂದ ದೊಡ್ಡ ದಿನ
ದೊಡ್ಡ ದಿನ ಕೊನೆಗೂ ಬಂದಿದೆ. ಐತಿಹಾಸಿಕ ಟೆಸ್ಟ್ ಪಂದ್ಯದಲ್ಲಿ ಭಾರತವನ್ನು ಎದುರಿಸಲು ಅಫ್ಘಾನಿಸ್ತಾನವು ಸಜ್ಜಾಗಿದೆ ಎಂದು ಆಫ್ಘನ್ ಕ್ರಿಕೆಟ್ ಮಂಡಳಿ ಸಂತಸ ಹಂಚಿಕೊಂಡಿದೆ.