38ನೇ ಓವರ್ನಲ್ಲೇ ವಿಲಿಯಮ್ಸನ್ ಔಟ್!
ದಕ್ಷಿಣ ಆಫ್ರಿಕಾ ತಂಡದ ಅನುಭವಿ ಲೆಗ್ ಸ್ಪಿನ್ನರ್ ಇಮ್ರಾನ್ ತಾಹಿರ್ ಅವರ ಬೌಲಿಂಗ್ನಲ್ಲಿ ಇನಿಂಗ್ಸ್ನ 38ನೇ ಓವರ್ನಲ್ಲಿ ಚೆಂಡು ಕೇನ್ ವಿಲಿಯಮ್ಸನ್ ಅವರ ಬ್ಯಾಟ್ಗೆ ತಾಗಿ ವಿಕೆಟ್ಕೀಪರ್ ಕ್ವಿಂಟನ್ ಡಿ'ಕಾಕ್ ಅವರ ಕೈಸೇರಿತ್ತು. ತಾಹಿರ್ ವಿಕೆಟ್ಗಾಗಿ ಮನವಿ ಮಾಡಿದರಾದರೂ, ಅಂಪೈರ್ ನಾಟ್ ಔಟ್ ನಿರ್ಧಾರ ನೀಡಿದ್ದರು. ಆದರೆ, ಕೀಪರ್ ಡಿ'ಕಾಕ್ ಚೆಂಡು ಬ್ಯಾಟ್ಗೆ ತಾಗಿರುವುದನ್ನು ಅಂದಾಜಿಸುವಲ್ಲಿ ವಿಫಲರಾಗಿ ನಿರಾಸಕ್ತಿ ತೋರಿದ ಹಿನ್ನೆಲೆಯಲ್ಲಿ ಅಂಪೈರ್ ತೀರ್ಪನ್ನು ಮರು ಪರಿಶೀಲಿಸಲು ದಕ್ಷಿಣ ಆಫ್ರಿಕಾ ತಂಡದ ನಾಯಕ ಫಾಫ್ ಡು'ಪ್ಲೆಸಿಸ್ ಮುಂದಾಗಲಿಲ್ಲ. ಟೆಲಿವಿಷನ್ ರೀಪ್ಲೇಯಲ್ಲಿ ಕೇನ್ ಬ್ಯಾಟ್ಗೆ ಚೆಂಡು ತಾಗಿರುವುದು ಪತ್ತೆಯಾಗಿತ್ತು.
ವಿಲಿಯಮ್ಸನ್ ಕ್ರೀಡಾ ಸ್ಫೂರ್ತಿ ಮರೆತರೆ?
ಇನ್ನು ಪಂದ್ಯದ ನಂತರ ಕೇನ್ ವಿಲಿಯಮ್ಸನ್ ಅವರ ಕ್ರೀಡಾ ಸ್ಫೂರ್ತಿ ಕುರಿತಾಗಿ ದಕ್ಷಿಣ ಆಫ್ರಿಕಾದ ಮಾಜಿ ಸ್ಪಿನ್ನರ್ ಪೌಲ್ ಆಡಮ್ಸ್ ಪ್ರಶ್ನೆ ಮಾಡಿದ್ದಾರೆ. ತಮ್ಮ ಟ್ವಿಟರ್ ಖಾತೆ ಮೂಲಕ ಟ್ವೀಟ್ ಮಾಡಿರುವ ಆಡಮ್ಸ್, "ಔಟ್ ಆಗಿರುವುದು ಗೊತ್ತಾದ ಕೂಡಲೇ ಕೇನ್ ವಿಲಿಯಮ್ಸನ್ ಹೊರನಡೆಯಲಿಲ್ಲವೇಕೆ? ಅದೇ ಅವರನ್ನು ಮಂಕಡಿಂಗ್ ಮಾಡಿದ್ದರೆ ಬೇಸರಗೊಳ್ಳುತ್ತಿರಲಿಲ್ಲವೇ? ಎಂದು ಕೆಣಕಿದ್ದಾರೆ. ಇದೇ ವೇಳೆ ಸೋಚಿಯಲ್ ಮೀಡಿಯಾದಲ್ಲೂ ವಿಲಿಯಮ್ಸನ್ ಅವರ ಕ್ರೀಡಾ ಸ್ಫೂರ್ತಿ ಕುರಿತಾಗಿ ಪರ ವಿರೋಧಗಳ ಚರ್ಚೆ ಜೋರಾಗಿಯೇ ನಡೆದಿದೆ.
ನಾಯಕ ಫಾಫ್ಗೆ ಸುಳಿವೇ ಇಲ್ಲ
ದಕ್ಷಿಣ ಆಫ್ರಿಕಾದ ನಾಯಕ ಫಾಫ್ ಡು'ಪ್ಲೆಸಿಸ್ ಅವರಿಗೆ 38ನೇ ಓವರ್ನಲ್ಲಿ ವಿಲಿಯಮ್ಸನ್ ಔಟ್ ಆಗಿದ್ದರು ಎಂಬುದರ ಸುಳಿವೇ ಇರಲಿಲ್ಲ. ಇದನ್ನು ಪಂದ್ಯದ ಬಳಿಕ ತಮ್ಮ ಅನುಭವ ಹಂಚಿಕೊಂಡ ಸಂದರ್ಭದಲ್ಲಿ ಫಾಫ್ ಬಾಯ್ಬಿಟ್ಟಿದ್ದರು. ಆದರೆ, ಈ ವಿಚಾರ ತಿಳಿದ ಬಳಿಕ ಮಾತನಾಡಿದ ಹರಿಣ ಪಡೆಯ ನಾಯಕ, "ನಾನು ಲಾಂಗ್ ಆಫ್ನಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದೆ. ಇಂತಹ ಸಂದರ್ಭಗಳಲ್ಲಿ ವಿಕೆಟ್ಕೀಪರ್ ಕ್ವಿಂಟನ್ ಡಿ'ಕಾಕ್ ಮೇಲೆ ಹೆಚ್ಚು ಭರವಸೆ ಇಡುತ್ತೇನೆ. ಏಕೆಂದರೆ ಆತನೇ ಈ ಘಟನೆಗೆ ಅತ್ಯಂತ ಸಮೀಪದ ವ್ಯಕ್ತಿ. ಹೀಗಿರುವಾಗ ಆತನ ನಿರ್ಧಾರಕ್ಕೆ ಸಮ್ಮತಿಸುತ್ತೇನೆ. ಕೇನ್ ವಿಲಿಯಮ್ಸನ್ಗೂ ಚೆಂಡು ಬ್ಯಾಟ್ಗೆ ತಾಗಿರುವುದು ಗೊತ್ತಾಗಲಿಲ್ಲವಂತೆ. ಆದರೆ, ನಮ್ಮ ಸೋಲಿಗೆ ಇದು ಕಾರಣವಲ್ಲ. ಬ್ಯಾಟಿಂಗ್ನಲ್ಲಿ ಇನ್ನು ಕನಿಷ್ಠ 30 ರನ್ಗಳನ್ನಾದರೂ ಹೆಚ್ಚುವರಿಯಾಗಿ ಗಳಿಸಬೇಕಿತ್ತು.'' ಎಂದು ಫಾಫ್ ಹೇಳಿದ್ದಾರೆ.
ವಿಲಿಯಮ್ಸನ್ ಶತಕ ವಿವರ
ರನ್: 106*
ಎಸೆತ: 138
ಸಮಯ: 216 ನಿಮಿಷ
ಫೋರ್: 09
ಸಿಕ್ಸರ್: 01
ಸ್ಟ್ರೈಕ್ರೇಟ್: 76.81