ಕೊಹ್ಲಿ ಮತ್ತೊಂದು ವಿಶ್ವದಾಖಲೆ
ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಕೊಹ್ಲಿ 11,000 ರನ್ ಪೂರೈಸುವ ಮೂಲಕ ಏಕದಿನದಲ್ಲಿ ವೇಗವಾಗಿ 11 ಸಾವಿರ ರನ್ ಪೂರೈಸಿದ ವಿಶ್ವದಾಖಲೆ ನಿರ್ಮಿಸಿದ್ದರು. ಈ ವೇಳೆ ಸಚಿನ್ ದಾಖಲೆಯನ್ನು ಕೊಹ್ಲಿ ಸರಿಗಟ್ಟಿದ್ದರು. ಅಫ್ಘಾನಿಸ್ತಾನ ವಿರುದ್ಧ ಕೊಹ್ಲಿ 104ಕ್ಕೂ ಹೆಚ್ಚಿನ ರನ್ ಗಳಿಸಿದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 20,000 ರನ್ ಸಾಧನೆಗಾಗಿ ಗುರುತಿಸಿಕೊಳ್ಳಲಿದ್ದಾರೆ. ಈ ಸಾಧನೆ ಮಾಡಿದ ವಿಶ್ವದ 12ನೇ ಬ್ಯಾಟ್ಸ್ಮನ್ ಆಗಿ ಮತ್ತು ಭಾರತದ 3ನೇ ಆಟಗಾರನಾಗಿ ವಿರಾಟ್ ದಾಖಲೆ ನಿರ್ಮಿಸಲಿದ್ದಾರೆ.
ಸಚಿನ್, ದ್ರಾವಿಡ್ ಹೆಸರಲ್ಲಿ ದಾಖಲೆ
ಭಾರತೀಯರಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 20,000 ರನ್ ಪೂರೈಸಿದ ದಾಖಲೆ ಸಚಿನ್ ತೆಂಡೂಲ್ಕರ್ ( 34,357 ರನ್) ಮತ್ತು ಕನ್ನಡಿಗ ರಾಹುಲ್ ದ್ರಾವಿಡ್ (24,208 ರನ್) ಹೆಸರಿನಲ್ಲಿದೆ. ಕೊಹ್ಲಿ ಈಗ ಅಂತಾರಾಷ್ಟ್ರೀಯ ಏಕದಿನದಲ್ಲಿ 11020 ರನ್, ಟೆಸ್ಟ್ ನಲ್ಲಿ 6613 ರನ್, ಟಿ20ಯಲ್ಲಿ 2263 ರನ್ ಹೀಗೆ ಒಟ್ಟಾರೆ 11,896 ರನ್ ಬಾರಿಸಿದ್ದಾರೆ.
ವೇಗದ 20,000 ರನ್ ಮೈಲಿಗಲ್ಲು
ಅಫ್ಘಾನಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಕೊಹ್ಲಿ ನಿರೀಕ್ಷೆಯಂತೆ ಏನಾದರೂ 104+ ರನ್ ಬಾರಿಸಿದರೆ 20,000 ರನ್ ದಾಖಲೆ ಮಾತ್ರವಲ್ಲ, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ವೇಗವಾಗಿ 20 ಸಾವಿರ ರನ್ ಹೆಗ್ಗಳಿಕೆಗೂ ಪಾತ್ರರಾಗಲಿದ್ದಾರೆ. 20,000 ರನ್ ಗೆರೆ ದಾಟಲು ಕ್ರಿಕೆಟ್ ದಿಗ್ಗಜರಾದ ಸಚಿನ್ ಮತ್ತು ವೆಸ್ಟ್ ಇಂಡೀಸ್ ನ ಬ್ರಿಯಾನ್ ಲಾರಾ ಇಬ್ಬರೂ ತಲಾ 453 ಇನ್ನಿಂಗ್ಸ್ಗಳನ್ನು ಬಳಿಸಿಕೊಂಡಿದ್ದರು. ಕೊಹ್ಲಿ ಸದ್ಯ, 131 ಟೆಸ್ಟ್, 222 ಏಕದಿನ ಮತ್ತು 62 ಟಿ20 ಸೇರಿ ಒಟ್ಟು 415 ಅಂತಾರಾಷ್ಟ್ರೀಯ ಇನ್ನಿಂಗ್ಸ್ ಗಳನ್ನು ಆಡಿದ್ದಾರೆ.
ರಿಕಿ ಪಾಂಟಿಂಗ್ ತೃತೀಯ
453 ಇನ್ನಿಂಗ್ಸ್ಗಳಲ್ಲಿ 20 ಸಾವಿರ ರನ್ ಬಾರಿಸಿ ಮೊದಲೆರಡೂ ಸ್ಥಾನಗಳಲ್ಲಿ ಸಚಿನ್, ಲಾರಾ ಇದ್ದರೆ, ಈ ಯಾದಿಯಲ್ಲಿ ತೃತೀಯ ಸ್ಥಾನದಲ್ಲಿ ಆಸ್ಟ್ರೇಲಿಯಾದ ಮಾಜಿ ನಾಯಕ ರಿಕಿ ಪಾಂಟಿಂಗ್ ಹೆಸರಿದೆ. ಪಾಂಟಿಂಗ್ ಒಟ್ಟು 468 ಇನ್ನಿಂಗ್ಸ್ಗಳಲ್ಲಿ 20,000 ರನ್ ಬಾರಿಸಿದ್ದರು. ಈ ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ 82 ರನ್, ಪಾಕಿಸ್ತಾನ ವಿರುದ್ಧ 77 ರನ್ ಬಾರಿಸಿದ್ದ ಕೊಹ್ಲಿ, ಅಫ್ಘಾನಿಸ್ತಾನ ವಿರುದ್ಧವೂ ಉತ್ತಮ ರನ್ ಗಳಿಸುವ ನಿರೀಕ್ಷೆಯಿದೆ. ಅಂದ್ಹಾಗೆ ಈ ವಿಶ್ವಕಪ್ ಆವೃತ್ತಿಯಲ್ಲಿ ಅಫ್ಘಾನ್ ಆಡಿರುವ ಐದು ಪಂದ್ಯಗಳನ್ನು ಸೋತಿದೆ.