ಯಾಕೆ ಮೀಸಲು ದಿನ?
ಜೂನ್ 23 ಬುಧವಾರ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ಗೆ ಮೀಸಲು ದಿನ ಎಂದು ನಿಗದಿಪಡಿಸಲಾಗಿದೆ. ಟೆಸ್ಟ್ ಪಂದ್ಯದ ಐದು ದಿನಗಳಲ್ಲಿ ಮಳೆಯಿಂದಾಗಿ ವ್ಯರ್ಥವಾದ ಅವಧಿಯನ್ನು ಈ ಮೀಸಲು ದಿನದಲ್ಲಿ ಸರಿದೂಗಿಸಲು ಮೀಸಲಿಡಲಾಗಿದೆ. 2018ರಲ್ಲಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ಆರಂಭಕ್ಕೂ ಮುನ್ನವೇ ಮೀಸಲು ದಿನವನ್ನು ನಿಗದಿಪಡಿಸುವ ನಿರ್ಧಾರ ಮಾಡಲಾಗಿತ್ತು. ಕಳೆದ ಮೇ 28ರಂದು ಇದನ್ನು ಅಧಿಕೃತವಾಗಿ ಘೋಷಿಸಲಾಯಿತು.
ಎಷ್ಟು ಹೊತ್ತಿಗೆ ಪಂದ್ಯ ಆರಂಭವಾಗಲಿದೆ?
ಮೀಸಲು ದಿನದ ಪಂದ್ಯ ಸ್ಥಳೀಯ ಕಾಲಮಾನ ಎಂದಿನಂತೆಯೇ 10.30ಕ್ಕೆ ಅಂದರೆ ಭಾರತೀಯ ಕಾಲಮಾನ ಮಧ್ಯಾಹ್ನ 3 ಗಂಟೆಗೆ ಆರಂಭವಾಗಲಿದೆ. 12:30ಕ್ಕೆ(ಭಾರತೀಯ ಕಾಲಮಾನ ಸಂಜೆ 5 ಗಂಟೆ) ಭೋಜನ ವಿರಾಮ ಹಾಗೂ 3:25ಕ್ಕೆ(ಭಾರತೀಯ ಕಾಲಮಾನ 7:55) ಟೀ ವಿರಾಮವಿರುತ್ತದೆ.
ಎಷ್ಟು ಓವರ್ಗಳು ಆಡಿಸಲಾಗುತ್ತದೆ?
ಐದು ದಿನಗಳ ಟೆಸ್ಟ್ ಪಂದ್ಯದಲ್ಲಿ ವ್ಯರ್ಥವಾದ ಓವರ್ಗಳನ್ನು ಸರಿದೂಗಿಸಲು ಈ ಮೀಸಲು ದಿನವನ್ನು ಬಳಸಲಾಗುತ್ತದೆ. ಗರಿಷ್ಠ 98 ಓವರ್ಗಳ ಆಟವನ್ನು ಆಡಿಸುವ ಅವಕಾಶವಿರುತ್ತದೆ. ಭಾರತ ಹಾಗೂ ನ್ಯೂಜಿಲೆಂಡ್ ವಿರುದ್ಧದ ಈ ಪಂದ್ಯದಲ್ಲಿ ಈ ಗರಿಷ್ಠ ಅವಧಿಯನ್ನು ಬಳಸಿಕೊಳ್ಳಲು ಐಸಿಸಿ ನಿರ್ಧರಿಸಿದೆ. ಕೊನೆಯ ಒಂದು ಗಂಟೆಗಳ ಅವಧಿಯನ್ನು ಅಂಪಾಯರ್ಗಳು ಸೂಚನೆ ನೀಡುತ್ತಾರೆ.
ಫಲಿತಾಂಶ ಬಾರದಿದ್ದರೆ?
ಇನ್ನು ಮೀಸಲು ದಿನದಲ್ಲಿಯೂ ಫಲಿತಾಂಶವನ್ನು ಪಡೆಯಲು ಸಾಧ್ಯವಾಗದೆ ಡ್ರಾ ಅಥವಾ ಟೈನಲ್ಲಿ ಅಂತ್ಯವಾದರೆ ಭಾರತ ಹಾಗೂ ನ್ಯೂಜಿಲೆಂಡ್ ತಂಡಗಳನ್ನು ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ನ ಜಂಟಿ ವಿಜೇತರು ಎಂದು ಘೋಷಿಸಲಾಗುತ್ತದೆ. ಇಬ್ಬರು ನಾಯಕರು ಕೊನೆಯ ಅವಧಿಗೂ ಮುನ್ನವೇ ಪಂದ್ಯವನ್ನು ಡ್ರಾ ಎಂದು ಘೋಷಿಸಲು ಒಪ್ಪಿಕೊಂಡರೆ ಯಾವುದೇ ಅವಧಿಯಲ್ಲಾದರೂ ಪಂದ್ಯವನ್ನು ಡ್ರಾ ಎಂದು ಘೋಷಿಸುವ ಅವಕಾಶ ಮೀಸಲು ದಿನದಲ್ಲಿ ಇದೆ.