ಕ್ರೋಷಿಯಾ
ಕಳೆದ ಹಲವಾರು ವರ್ಷಗಳ ಇತಿಹಾಸ ನೋಡಿದರೆ ಕ್ರೋಷಿಯಾ ತಂಡದಲ್ಲಿ ಯಾವಾಗಲೂ ಪ್ರತಿಭಾನ್ವಿತ ಆಟಗಾರರು ಇದ್ದೇ ಇರುತ್ತಾರೆ. ಆದರೆ, ಈ ಬಾರಿಯ ಕ್ರೋಷಿಯಾ ತಂಡ ಶ್ರೇಷ್ಠ ಆಟಗಾರರಿಂದ ಕೂಡಿದ್ದು, ನಿಸ್ಸಂಶಯವಾಗಿ ಅತ್ಯುತ್ತಮ ಹಾಗೂ ಅತಿ ಸಮತೋಲಿತ ತಂಡವಾಗಿದೆ.
ಮಿಡ್ ಫೀಲ್ಡ್ ಆಟಗಾರರಾದ ಲೂಕಾ ಮಾಡ್ರಿಕ್, ಇವಾನ್ ರ್ಯಾಕಿಟಿಕ್, ಮ್ಯಾಟ್ಟೆಯೊ ಕೊವಾಸಿಕ್, ಮಾರ್ಸೆಲೊ ಬ್ರೊಜೊವಿಕ್ ಹಾಗೂ ಮಿಲಾನ್ ಬಡೆಲ್ಜ್ ಅವರನ್ನೊಳಗೊಂಡ ಕ್ರೋಷಿಯಾದ ಮಿಡ್ಫೀಲ್ಡ್ ಈಗ ವಿಶ್ವದಲ್ಲಿಯೇ ಅತಿ ಬಲಿಷ್ಠವಾಗಿದೆ.ಇನ್ನು ಮುಂಚೂಣಿ ಆಟಗಾರರಾದ ಮಾರಿಯೊ ಮಾಂಡಜುಕಿಕ್, ಅಂಡ್ರೆಜ್ ಕ್ರಮಾರಿಕ್, ನಿಕೊ ಕಾಲಿನಿಕ್ ಹಾಗೂ ಇಂಟರ್ ಮಿಲಾನ್ ಸ್ಟಾರ್ ಆಟಗಾರ ಇವಾನ್ ಪೆರಿಸಿಕ್ ಎಂಥದೇ ರಕ್ಷಣೆಯನ್ನು ಭೇದಿಸಿ ಚೆಂಡನ್ನು ಗೋಲ್ ಪೋಸ್ಟ್ ವರೆಗೆ ಒಯ್ಯುವ ಸಾಮರ್ಥ್ಯ ಪಡೆದಿದ್ದಾರೆ. ಈ ತಂಡದ ರಕ್ಷಣಾ ಸಾಮರ್ಥ್ಯ ದಾಳಿಗಿಂತ ಕಡಿಮೆ ಇದ್ದರೂ ಕಡೆಗಣಿಸುವಂತಿಲ್ಲ.
ಒಂದು ಕಾಲಕ್ಕೆ ದಾವೋರ್ ಸುಕರ್ ನಂಥ ವಿಶ್ವ ಶ್ರೇಷ್ಠ ಆಟಗಾರ ಕ್ರೋಷಿಯಾ ತಂಡದಲ್ಲಿ ಆಡಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು. ಒಟ್ಟಾರೆಯಾಗಿ ನೋಡಿದರೆ ಛಲದಿಂದ ಆಟವಾಡಿದಲ್ಲಿ ಕ್ರೋಷಿಯಾ ಗೆಲುವಿನ ಸನಿಹ ಬರುವುದು ಅಸಾಧ್ಯವೇನಲ್ಲ.
ಸೆನೆಗಲ್
2002 ರ ವಿಶ್ವಕಪ್ ಪಂದ್ಯಾವಳಿಯಲ್ಲಿ 1998 ರ ಚಾಂಪಿಯನ್, ಪ್ರಬಲ ಫ್ರಾನ್ಸ್ ತಂಡವನ್ನು ಸೆನೆಗಲ್ ಮಣಿಸಿ ಅಚ್ಚರಿ ಮೂಡಿಸಿತ್ತು. ಫ್ರಾನ್ಸ್ ಅನ್ನು ಸೋಲಿಸಿ ಸೆನೆಗಲ್ ಕ್ವಾರ್ಟರ್ ಫೈನಲ್ ತಲುಪಿತ್ತು. ಆಗ ತಂಡದ ಆಟಗಾರನಾಗಿದ್ದ ಅಲಿಯು ಸಿಸ್ಸೆ ಈಗ ಸೆನೆಗಲ್ ತಂಡದ ಕೋಚ್.
ಫೀಫಾ ವಿಶ್ವಕಪ್ 2018: ಸೆನೆಗಲ್ ಗೆಲ್ಲುವ ಸಾಧ್ಯತೆಗಳೆಷ್ಟು?
ಸೆಂಟ್ರಲ್ ಮಿಡ್ ಫೀಲ್ಡರ್ಗಳಾದ ಚೇಖೊ ಕೋಯಾಟೆ ಹಾಗೂ ಇದ್ರಿಸಾ ಗುಯೆಯ್ ಅವರನ್ನು ಸನೆಗಲ್ ಡಿಫೆನ್ಸಿವ್ ಮಿಡ್ ಫೀಲ್ಡರ್ ಗಳನ್ನಾಗಿಸುವ ಸಾಧ್ಯತೆಯಿದೆ. ಇದು ಮಾನೆ ಹಾಗೂ ಕೇಟಾ ಬಾಲ್ಡೆ ಅವರಿಗೆ ಫಾರ್ವರ್ಡ್ಗಳಾಗುವ ಅವಕಾಶ ಕಲ್ಪಿಸುವ ಸಾಧ್ಯತೆಯಿದೆ.
ಸೆನೆಗಲ್ ಜಪಾನ್ ವಿರುದ್ಧ ಗೆಲ್ಲಬೇಕು. ಜೊತೆಗೆ ಗ್ರೂಪ್ ನಲ್ಲಿನ ಒಂದು ದೊಡ್ಡ ತಂಡದ ವಿರುದ್ಧ ಕನಿಷ್ಠ ಡ್ರಾ ಮಾಡಿಕೊಂಡರೆ ಮಂದಿನ ಹಂತಕ್ಕೆ ಸುಲಭವಾಗಿ ಪ್ರವೇಶ ಪಡೆಯಬಹುದು.
ಬೆಲ್ಜಿಯಂ
ಈ ಸಲದ ಬೆಲ್ಜಿಯಂ ತಂಡ ವಿಶ್ವದಲ್ಲೇ ಅತಿ ಬಲಿಷ್ಠ ತಂಡಗಳಲ್ಲೊಂದಾಗಿದೆ. ಆದರೆ ವಿಶ್ವಮಟ್ಟದಲ್ಲಿ ಈವರೆಗೆ ಅಂಥ ಯಾವ ಸಾಧನೆಯನ್ನು ಮಾಡಿರದ ಕಾರಣ ಬೆಲ್ಜಿಯಂ ಫೇವರಿಟ್ ಆಗಿ ಕಾಣುತ್ತಿಲ್ಲ. ಬೆಲ್ಜಿಯಂನ ಆಟಗಾರರು ತಮ್ಮ ಸಂಪೂರ್ಣ ಶಕ್ತಿ ಒರೆಗೆ ಹಚ್ಚಿದಲ್ಲಿ ವಿಶ್ವಕಪ್ ಗೆಲುವು ಅವರಿಗೆ ಅಸಾಧ್ಯವೇನಲ್ಲ.
ಆದರೆ, ಬ್ರೆಜಿಲ್ ಅಥವಾ ಜರ್ಮನಿಯ ಆಟಗಾರರು ಹೊಂದಿರುವ ಮಟ್ಟದ ಮಾನಸಿಕ ದೃಢತೆ ಬೆಲ್ಜಿಯಂ ಆಟಗಾರರಿಗೆ ಇಲ್ಲ ಎಂಬುದು ಒಂದು ಮೈನಸ್ ಪಾಯಿಂಟ್ ಆಗಿದೆ. ಇಷ್ಟಾದರೂ ಎಲ್ಲ ವಿಭಾಗಗಳಲ್ಲಿನ ಶ್ರೇಷ್ಠ ಪ್ರತಿಭಾವಂತ ಆಟಗಾರರು ಈ ವಿಶ್ವಕಪ್ನಲ್ಲಿ ಅಚ್ಚರಿಯ ಫಲಿತಾಂಶ ನೀಡಲು ಸಮರ್ಥರಾಗಿದ್ದಾರೆ.
ಇಂಗ್ಲೆಂಡ್ ತಂಡ
ಸದ್ಯಕ್ಕೆ ಇಂಗ್ಲೆಂಡ್ ತಂಡ ಯಾರಿಗೂ ಗೆಲ್ಲುವ ಕುದುರೆ ಅಥವಾ ಫೇವರಿಟ್ ತಂಡ ಎನಿಸಿಲ್ಲ. ಒಂದು ಕಾಲದ ಗತವೈಭವವನ್ನು ಮರುಕಳಿಸುವಲ್ಲಿ ಇಂಗ್ಲೆಂಡ್ ವಿಫಲವಾಗಿದೆ ಎಂದೇ ಹೇಳಬಹುದು. ಏಕೆಂದರೆ 2006 ಹಾಗೂ 20010 ರಲ್ಲಿ ವಿಶ್ವಕಪ್ ನಲ್ಲಿ ಆಡಿದ ಇಂಗ್ಲೆಂಡ್ ತಂಡಗಳಿಗೆ ಹೋಲಿಸಿದರೆ ಈ ಬಾರಿಯ ತಂಡ ಅತ್ಯಂತ ಸಾಮಾನ್ಯವಾಗಿ ಕಂಡು ಬರುತ್ತದೆ.
ಆದರೂ ಮ್ಯಾನೇಜರ್ ಗರೆಥ್ ಸೌತ್ಗೇಟ್ ನೇತೃತ್ವದಲ್ಲಿ ಇಂಗ್ಲೆಂಡ್ ತಂಡ ಬಲಿಷ್ಠವಾಗಿ ಸಂಘಟಿತವಾಗಿದೆ. ಸಾಮರ್ಥ್ಯ ಪ್ರದರ್ಶನಕ್ಕೆ ಈ ಬಾರಿ ಯಾವುದೇ ದೊಡ್ಡ ಒತ್ತಡ ಇರದೇ ಇರುವುದು ಇಂಗ್ಲೆಂಡ್ ಆಟಗಾರರಿಗೆ ಒಳ್ಳೆಯ ಆಟವಾಡಲು ಅನುಕೂಲವಾಗಬಹುದು.